អ្នកសារព័ត៌មានVOD ចំនួន ៥នាក់ និងសកម្មជនបរិស្ថាន ៤នាក់ ត្រូវបានសមត្ថកិច្ចខេត្តតាកែវ ដោះលែងវិញហើយនៅយប់ថ្ងៃអង្គារនេះ ក្រោយឃាត់ខ្លួនសួរនាំជាច្រើនម៉ោង។
នៅព្រឹកថ្ងៃទី១៦ ខែសីហា អ្នកសារព័ត៌មាន VOD ចំនួន៥នាក់ ក្នុងនោះមានជនជាតិខ្មែរ៤នាក់និងបរទេសម្នាក់ ត្រូវបានសមត្ថកិច្ចខេត្តតាកែវនាំខ្លួនទៅសួរនាំនៅអធិការដ្ឋាននគរបាលស្រុកបាទី ខណៈពួកគេចុះយកព័ត៌មាន និងថតរូបនៅក្នុងបរិវេណភ្នំតាម៉ៅស្របពេលលោកនាយករដ្ឋមន្ត្រី ហ៊ុន សែន ទើបតែចេញបញ្ជាឱ្យលុបចោលទាំងអស់ចំពោះសកម្មភាពដោះដូរនិងអភិវឌ្ឍតំបន់ភ្នំតាម៉ៅក្រោយមានប្រតិកម្មពីមហាជនយ៉ាងច្រើន។
ក្រៅពីអ្នកសារព័ត៌មានវីអូឌីចំនួន ៥ នាក់នេះ នៅមានសកម្មជនបរិស្ថាននៃក្រុមយុវជនខ្មែរ ថាវរៈចំនួន ៤ នាក់ទៀត ក៏ត្រូវបានអាជ្ញាធរចាប់ខ្លួនបញ្ជូនទៅកាន់អធិការដ្ឋាននគរបាលស្រុកបាទីផងដែរ។ យុវជនទាំង ៤ នាក់នោះ រួមមានឈ្មោះ ហ៊ុន វណ្ណៈ ឈឿន ដារ៉ាវី ឆែម ស្រីគា និង សុគន្ធ តុលា។
អ្នករាយការណ៍ព័ត៌មានវីអូឌី ដែលបានចុះទៅយកព័ត៌មាននៅអធិការដ្ឋាននគរបាលស្រុកបាទី បានឱ្យដឹងថា អ្នកសារព័ត៌មានVOD និងសកម្មជនបរិស្ថានទាំង ៩រូបនោះ ត្រូវបានសមត្ថកិច្ចដោះលែងវិញហើយនៅម៉ោងជាង ៦ល្ងាចថ្ងៃអង្គារនេះ ក្រោយសាកសួរជាច្រើនម៉ោង និងតម្រូវឱ្យធ្វើកិច្ចសន្យាជាថ្នូរនឹងការដោះលែងនេះ។
វីអូឌី មិនទាន់អាចសុំការបញ្ជាក់ជុំវិញករណីនេះពីសមត្ថកិច្ចខេត្តតាកែវបាននៅឡើយទេ។
គួរបញ្ជាក់ដែរថា នៅមុនពេលចេញដំណើរទៅកាន់ភ្នំតាម៉ៅកាលពីព្រឹកមិញនេះ កញ្ញា ឈឿន ដារ៉ាវី បានប្រាប់វីអូឌីថា ក្រុមយុវជនខ្មែរថាវរៈធ្វើដំណើរទៅកាន់ភ្នំតាម៉ៅដើម្បីប្រមូលស្នាមមេដៃ និងគ្រោងដាក់ញត្តិទៅកាន់មន្ទីរកសិកម្មខេត្តតាកែវដើម្បីស្នើឱ្យប្រធានមន្ទីរកសិកម្មខេត្តតាកែវលោក ញិប ស្រ៊ន បកស្រាយអំពីព័ត៌មានដែលថាមានសកម្មភាពខួងរណ្តៅជម្រៅជ្រៅបោះបង្គោលនៅជុំវិញតំបន់ភ្នំតាម៉ៅដោយមិនឱ្យប្រជាពលរដ្ឋចូលទៅដាំកូនឈើ និងមិនឱ្យអ្នកសារព័ត៌មានចូលទៅក្នុងបរិវេណនៃតំបន់នោះ។
ផ្ទៃដីព្រៃភ្នំតាម៉ៅទំហំជិត៦០០ហិកតាដែលស្ថិតនៅក្រោមការគ្រប់គ្រងដោយរដ្ឋបាលព្រៃឈើត្រូវបានកាប់បំផ្លាញគិតចាប់តាំងពីចុងខែកក្កដាកន្លងទៅបន្ទាប់ពីតំបន់នេះត្រូវបានរដ្ឋាភិបាលប្រគល់ទៅឱ្យក្រុមហ៊ុនឯកជនដែលត្រូវបានគេស្គាល់ថាជារបស់លោកឡេងណាវ៉ាត្រានិងលោកឃុនសៀដើម្បីអភិវឌ្ឍ។
ទោះជាយ៉ាងណាការដោះដូរនិងអភិវឌ្ឍតំបន់ភ្នំតាម៉ៅនេះត្រូវបានលោកនាយករដ្ឋមន្ត្រីហ៊ុនសែនកាលពីថ្ងៃទី ៧ សីហាកន្លងទៅចេញបទបញ្ជាភ្លាមៗឱ្យលុបចោលទាំងអស់ចំពោះសកម្មភាពនេះក្រោយមានប្រតិកម្មពីមហាជនយ៉ាងច្រើន និងបញ្ជាឱ្យដំាដើមឈើឡើងវិញ៕
