លោកនាយករដ្ឋមន្ត្រី ហ៊ុន សែន បានបញ្ជាទៅរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ឱ្យដោះស្រាយសំណងជូនកម្មកររោងចក្រ ឃែនធើរេន ដែលត្រូវបានថៅកែបិទទ្វារអាជីវកម្មរត់ចោល ដោយមិនបានបើកប្រាក់ឈ្នួល និងទូទាត់អត្ថប្រយោជន៍ផ្សេងៗជូនពួកគេ។
ថ្លែងក្នុងពិធីប្រគល់សញ្ញាបត្រជូននិស្សិតសាកលវិទ្យាល័យពុទ្ធិសាស្ត្រ នៅថ្ងៃទី១៧ ខែសីហា ឆ្នាំ២០២២ លោកនាយករដ្ឋមន្ត្រី ហ៊ុន សែន បានលើកឡើងថា លោកបានមើលព័ត៌មានតាមបណ្ដាញសង្គម ដោយឃើញកម្មកររោងចក្រមួយដែលមានគ្នាជាង៣០០នាក់បានយកញត្តិទៅដាក់នៅខុទ្ទកាល័យនាយករដ្ឋមន្ត្រី ដើម្បីសុំឱ្យលោកជួយដោះស្រាយវិវាទការងាររបស់ពួកគេ ប៉ុន្តែរហូតមកដល់ពេលនេះបានរំលងជាច្រើនខែហើយ នៅពុំទាន់មានដំណោះស្រាយណាមួយសម្រាប់ពួកគេនៅឡើយ។
ពាក់ព័ន្ធករណីនេះ លោក ហ៊ុន សែន បានប្រើសម្ដីខ្លាំងៗ ដោយបញ្ជាទៅរដ្ឋមន្ត្រីក្រសួងការងារ លោក អ៊ិត សំហេង ឱ្យដោះស្រាយសំណងជូនកម្មករ តាមរយៈការខ្ចីលុយពីរដ្ឋាភិបាលទូទាត់ជូនពួកគេ និងមានចំណាត់ការជាមួយថៅកែជាក្រោយ ដើម្បីកុំឱ្យកម្មករទាំងនោះបន្តរងទុក្ខលំបាក។
លោកបន្ថែមថា៖ «ក្មួយៗហ្នឹងគួរឱ្យអាណិតណាស់។ គាត់[កម្មករ]ថា ចុងក្រោយខ្ញុំមិនដឹងទៅកន្លែងណា មានតែមកកន្លែងសម្ដេចនាយកហ្នឹងតែម្ដង ហើយបើមកដល់កន្លែងហ្នឹង ដោះមិនបានទៀត វាចប់។ ឯកឧត្ដម អ៊ិត សំហេង អើយ! កុំពិបាកពេក! អត់មកទេថ្ងៃនេះ ថ្ងៃនេះប្រហែលខាងក្រសួងការងារអត់មានអ្នកមកទៀត។ កាលពីមុន ខ្ញុំធ្លាប់ឱ្យអស់លោកខ្ចីលុយយកទៅដោះស្រាយឱ្យកម្មករ ហេតុអីបានជាពេលនេះលោកមិនដោះ?»
បើទោះជាលោកនាយករដ្ឋមន្ត្រី មិនបានបញ្ជាក់ពីឈ្មោះរោងចក្រ ប៉ុន្តែលោកទំនងសំដៅទៅលើកម្មករនៅរោងចក្រឃែនធើរេន ស្ថិតក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ដែលបានតវ៉ានិងដេកយាមនៅមុខរោងចក្រប្រមាណ៤ខែមកហើយ។ ក្រុមកម្មករបានដាក់ញត្តិនៅខុទ្ទកាល័យនាយករដ្ឋមន្ត្រី កាលពីថ្ងៃទី២១ ខែមិថុនា ឆ្នាំ២០២២ ដើម្បីស្នើលោក ហ៊ុន សែន ជួយអន្តរាគមន៍ករណីថៅកែបិទរោងចក្រដោយមិនបានបើកប្រាក់ឈ្នួល និងទូទាត់អត្ថប្រយោជន៍ផ្សេងៗជូនពួកគាត់តាមផ្លូវច្បាប់។
វីអូឌី មិនអាចសុំការបញ្ជាក់ជុំវិញករណីនេះពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានទេ នៅរសៀលថ្ងៃពុធនេះ។
អ្នកស្រី តាំង ចិន្ដា ដែលអះអាងថាជាកម្មការិនីបម្រើការងារនៅរោងចក្រ ឃែនធើរេន រយៈពេល១៧ឆ្នាំ និយាយទាំងអួលដើមកថា អ្នកស្រីសប្បាយចិត្តពេលឮប្រសាសន៍លោកនាយករដ្ឋមន្ត្រីបញ្ជាទៅមន្ត្រីក្រោមឱវាទឱ្យដោះស្រាយបញ្ចប់វិវាទការងារនៅរោងចក្រនេះ ខណៈអ្នកស្រី និងកម្មករផ្សេងទៀតកំពុងរងទុក្ខលំបាកដោយសារខ្វះខាតលើការចំណាយប្រចាំថ្ងៃផ្សេងៗ និងដេកយាមមុខរោងចក្រ ហាលថ្ងៃ ហាលភ្លៀង ជាច្រើនខែមកហើយ។
អ្នកស្រីបន្ថែមថា៖ «ខ្ញុំត្រេកអរណាស់ បន់ឱ្យតែគាត់គិតគូរដោះស្រាយឱ្យពួកខ្ញុំឱ្យបានឆាប់។ ទី១ ខ្ញុំប្រឈមមុខអត់ការងារធ្វើ ហើយទី២ ប្រឈមមុខអត់លុយចិញ្ចឹមកូន កូនខ្ញុំនៅតូច ហើយខ្ញុំត្រូវចិញ្ចឹមម្នាក់ឯងទៀត។ ហើយមួយទៀត គ្មានលុយបង់បន្ទប់ជួល ទឹកភ្លើង និងចំណាយប្រចាំថ្ងៃ។ រាល់ថ្ងៃហ្នឹង ខ្ញុំរស់ពឹងលើប្អូនរបស់ខ្ញុំទេ»។
ប្រធានសហភាពចលនាកម្មករកម្ពុជា លោក ប៉ាវ ស៊ីណា សាទរចំពោះចំណាត់ការរបស់ប្រមុខរដ្ឋាភិបាលដែលដោះស្រាយបញ្ចប់វិវាទការងារករណីថៅកែរត់ចោលកម្មករនេះ។ លោកក៏បង្ហាញការគាំទ្រចំពោះការបញ្ចេញកញ្ចប់ថវិការដ្ឋមកដោះស្រាយជូនកម្មករជាមុន និងដោះស្រាយជាមួយថៅកែជាក្រោយនោះ។
មេសហជីពរូបនេះបានស្នើដល់រដ្ឋាភិបាលកំណត់ជាគោលនយោបាយថ្នាក់ជាតិ ដោយតម្កល់ប្រាក់ទុកសម្រាប់ដោះស្រាយជូនកម្មករក្នុងករណីថៅកែរោងចក្របិទទ្វារ ហើយរត់ចោលកម្មករ ដើម្បីកុំឱ្យកម្មកររងទុក្ខលំបាកដោយការយាមនៅមុខរោងចក្រ និងបញ្ចៀសការដើរតវ៉ារកកិច្ចអន្តរាគមន៍នៅតាមស្ថាប័នរដ្ឋផ្សេងៗ ជាដើម។
លោកបន្ថែមថា៖ «ទាំងអស់នេះជាអ្វីដែលសហជីពចង់បាន ជាអ្វីដែលបងប្អូនកម្មករគាត់សាទរ ហើយយើងក៏ចង់ឃើញយន្តការនេះជាយន្តការសម្រាប់ការដោះស្រាយនៅពេលក្រោយទៀត ប្រសិនជាមានករណីរោងចក្រកាត់ដេរ រោងចក្រផលិតកាបូប រោងចក្រផលិតស្បែកជើង និងរោងចក្រដទៃទៀតដែលបានបិទទ្វារ រត់ចោលកម្មករ ដោយមិនបានបើកប្រាក់ឈ្នួលនិងទូទាត់អត្ថប្រយោជន៍ផ្សេងៗជូនបងប្អូនកម្មករ»។
លោក ប៉ាវ ស៊ីណា បន្ថែមថា ករណីថៅកែបិទទ្វារអាជីវកម្ម រត់ចោលកម្មករដោយមិនបានបើកប្រាក់ឈ្នួលនិងទូទាត់អត្ថប្រយោជន៍ផ្សេងៗជូនកម្មករនេះបានកើតឡើងជាបន្តបន្ទាប់ ហើយអាជ្ញាធរពាក់ព័ន្ធមិនដែលចាត់វិធានការឱ្យថៅកែទាំងនោះមកដោះស្រាយសំណងតាមផ្លូវច្បាប់ជូនកម្មករឡើយ។
បើតាមញត្តិរបស់កម្មករដែលដាក់ទៅខុទ្ទកាល័យនាយករដ្ឋមន្ត្រីនោះ គឺរោងចក្រ ឃែនធើរេន បានបើកដំណើរការតាំងពីឆ្នាំ១៩៩៧ ដែលមានថៅកែធំឈ្មោះ YAP FUNG KONG សញ្ជាតិម៉ាឡេស៊ី ហើយនាយកក្រុមហ៊ុនឈ្មោះ CHHOONG WEI PIAU និងបានជំពាក់បំណុលកម្មករចំនួន៣២០នាក់។ ញត្តិដដែលបន្តថា ក្នុងអំឡុងពេលថ្ងៃឈប់សម្រាកបុណ្យចូលឆ្នាំខ្មែរ ថ្នាក់ដឹកនាំរោងចក្របានលួចដឹកសម្ភារចេញ ដូចជា ម៉ាស៊ីនភ្លើង ម៉ាស៊ីនដេរថ្មីៗ និងក្រណាត់ ជាដើម ផ្ទេរទៅរោងចក្រកាត់ដេរសម្លៀកបំពាក់ ខ្វលលីធី តេក្សស្ទីល ជាក្រុមហ៊ុនមានថៅកែតែមួយជាមួយក្រុមហ៊ុន ឃែនធើរេន។
ប្រភពដដែលបន្ថែមថា កាលពីថ្ងៃទី៣ ខែឧសភា ឆ្នាំ២០២២ ថ្នាក់ដឹកនាំក្រុមហ៊ុន រហូតដល់មន្ត្រីរដ្ឋបាលរោងចក្រ បានដាក់ពាក្យលាឈប់ពីការងារ ដោយពុំមានអ្នកទទួលខុសត្រូវក្នុងការទូទាត់ប្រាក់ឈ្នួលនិងអត្ថប្រយោជន៍ផ្សេងៗជូនកម្មករស្របតាមច្បាប់ស្តីពីការងារឡើយ ខណៈអាគាររោងចក្រក៏ត្រូវបានបិទទ្វារទាំងស្រុង។
បើតាមសហជីព ថៅកែរោងចក្រ ឃែនធើរេន នៅជំពាក់ប្រាក់ឈ្នួលចុងក្រោយ ប្រាក់ជូនដំណឹង ប្រាក់សំណងជំងឺចិត្ត ប្រាក់អតីតភាពការងារ និងប្រាក់ដំណាច់ឆ្នាំដែលនៅសល់ ដែលតាមការគណនាបឋមមានទឹកប្រាក់សរុបខ្ទង់៧០ម៉ឺនទៅ៨០ម៉ឺនដុល្លារ៕