តៃវ៉ាន់ និងសហរដ្ឋអាមេរិក គឺជាសម្ពន្ធមិត្តសន្តិសុខនិងសេដ្ឋកិច្ចដ៏សំខាន់នៅក្នុងតំបន់ឥណ្ឌូប៉ាស៊ីហ្វិក ហើយសម្ពន្ធមិត្តប្រជាធិបតេយ្យត្រូវតែឈរជាមួយគ្នា។ នេះបើតាមលោកស្រី សៃ អ៊ីងវេន (Tsai Ing-wen) ប្រធានាធិបតីតៃវ៉ាន់ បានប្រាប់មន្រ្តីសហរដ្ឋអាមេរិកដែលទៅធ្វើទស្សនកិច្ចដែនកោះមួយនេះ កាលពីថ្ងៃចន្ទ និងត្រូវបានទីភ្នាក់ងារសារព័ត៌មាន Reuters យកមកចុះផ្សាយនៅថ្ងៃទី២២ ខែសីហា ឆ្នាំ២០២២នេះ។
សុន្ទរកថារបស់លោកស្រី សៃ អ៊ីងវេន (Tsai Ing-wen) ទៅកាន់លោក អ៊ីរិក ហល់ខម (Eric Holcomb) អភិបាលរដ្ឋ អ៊ីនឌីណា (Indiana) សហរដ្ឋអាមេរិក ធ្វើឡើងជាលើកទី៣ នៃដំណើរទស្សនកិច្ចរបស់មន្ត្រីជាន់ខ្ពស់សហរដ្ឋអាមេរិក រួមទាំងប្រធានសភា លោកស្រី ណានស៊ី ផេឡូស៊ី (Nancy Pelosi) ដែលបានធ្វើឱ្យចិនខឹងសម្បារ ដោយចិនចាត់ទុកថា តៃវ៉ាន់ជាអាណាខេត្តរបស់ខ្លួនតែប៉ុណ្ណោះ។
ប្រទេសចិនបានធ្វើសមយុទ្ធយោធានៅជិតកោះតៃវ៉ាន់ ចាប់តាំងពីដំណើរទស្សនកិច្ចរបស់លោកស្រី ណានស៊ី ផេឡូស៊ី (Nancy Pelosi)។ រដ្ឋាភិបាលកោះតៃវ៉ាន់បានច្រានចោលការទាមទារអធិបតេយ្យភាពរបស់ទីក្រុងប៉េកាំង ដោយនិយាយថា ពលរដ្ឋតៃវ៉ាន់អាចសម្រេចអំពីអនាគតរបស់ពួកគេ។
លោកស្រី សៃ អ៊ីងវេន (Tsai Ing-wen) បានប្រាប់លោក អ៊ីរិក ហល់ខម (Eric Holcomb) ក្នុងអំឡុងកិច្ចប្រជុំនៅឯការិយាល័យរបស់លោកស្រី ក្នុងទីក្រុងតៃប៉ិ ថា៖ «តៃវ៉ាន់បានប្រឈមនឹងការគំរាមកំហែងផ្នែកយោធាពីប្រទេសចិន នៅក្នុងនិងជុំវិញច្រកសមុទ្រតៃវ៉ាន់»។
នៅក្នុងសុន្ទរកថាដែលបានផ្សាយផ្ទាល់នៅលើទំព័របណ្ដាញសង្គម លោកស្រី សៃ អ៊ីងវេន បន្ថែមថា៖ «នៅពេលនេះ សម្ពន្ធមិត្តប្រជាធិបតេយ្យត្រូវតែឈរជាមួយគ្នា និងជំរុញកិច្ចសហប្រតិបត្តិការលើគ្រប់វិស័យ»។
លោកស្រីបន្ថែមថា៖ «សន្តិសុខសេដ្ឋកិច្ចគឺជាសសរស្តម្ភដ៏សំខាន់នៃសន្តិសុខជាតិ និងក្នុងតំបន់។ តៃវ៉ាន់មានឆន្ទៈ និងអាចពង្រឹងកិច្ចសហប្រតិបត្តិការជាមួយដៃគូប្រជាធិបតេយ្យ ក្នុងការកសាងខ្សែចង្វាក់ប្រជាធិបតេយ្យប្រកបដោយនិរន្តរភាព»៕