ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ប្រជាពលរដ្ឋរស់នៅលើសំណង់ខុសច្បាប់តំបន់រមណីយដ្ឋានអង្គរ ក្នុងខេត្តសៀមរាប ជិត៧០០គ្រួសារ បានស្ម័គ្រចិត្តរុះរើទៅរស់នៅភូមិធម្មជាតិរុនតាឯក ដែលស្ថិតនៅស្រុកបន្ទាយស្រីវិញ។
តាមសេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងនៅថ្ងៃទី២៤ ខែសីហានេះថា ក្រុមកាងារជំនាញវាស់វែងក្បាលដីបានចំនួន២០ ០៣១ក្បាលដី ក្នុងនោះ ក្បាលដីមានសំណង់ចំនួន១២ ៣១៥ក្បាលដី ក្បាលដីគ្មានសំណង់ចំនួន៦ ៧៣៧ក្បាលដី ក្នុងទំហំសរុប៤០ ១១៨ហិកតានៃទីតាំងទាំងបីដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា។
ទាក់ទិនបញ្ហានេះ ប្រជាពលរដ្ឋ៦៩៨គ្រួសារ ស្មើនឹង៧២,៤៨ភាគរយ បានស្ម័គ្រចិត្តរុះរើទៅរស់នៅភូមិធម្មជាតិរុនតាឯក ក្នុងនោះមាន២៣៤គ្រួសារ ស្ថិតនៅភូមិទក្សិណត្បូង និង៤៤៥គ្រួសារ ស្ថិតនៅភូមិត្រពាំងសេះ ដែលត្រូវចូលរួមចាប់ឆ្នោតទទួលយកដីឡូត៍ នៅថ្ងៃទី២៥ ខែសីហា ឆ្នាំ២០២២ នៅសាលាខេត្តសៀមរាប។
សេចក្ដីប្រកាសព័ត៌មានបញ្ជាក់ថា៖ «ប្រជាពលរដ្ឋស្ម័គ្រចិត្តរុះរើតូបលក់ដូរសរុបចំនួន៤៤តូប ក្នុងនោះ ៣៤តូបលក់វត្ថុអនុស្សាវរីយ៍ ស្ថិតនៅលើខឿនជុំវិញស្រះស្រង់ ភូមិស្រះស្រង់ខាងត្បូង សង្កាត់នគរធំ និង ១០តូប ស្មើ៧៩ផ្ទះ ស្ថិតនៅភូមិទក្សិណត្បូង និងភូមិវាល សង្កាត់គោកចក»។
សេចក្ដីប្រកាសដដែលបញ្ជាក់ថា ការអនុវត្តតាមសេចក្ដីសម្រេចរបស់រដ្ឋាភិបាល កាលពីថ្ងៃទី១៨ ខែមេសា ឆ្នាំ២០២២ ស្តីពីការបង្កើតក្រុមការងារតម្រង់ទិស ដើម្បីដោះស្រាយបញ្ហាសំណង់ខុសច្បាប់និងដីធ្លីក្នុងតំបន់រមណីយដ្ឋានអង្គរ និងតំបន់ដទៃទៀតស្ថិតនៅក្រោមការគ្រប់គ្រងរបស់អាជ្ញាធរជាតិអប្សរា៕