អន្តរជាតិ

អាមេរិកនឹងប្រកាសផ្ដល់ជំនួយយោធាបន្ថែមចំនួន៣ពាន់លានដុល្លារដល់អ៊ុយក្រែន

លោក លី សេងហន
| ២៤ សីហា ២០២២
ម៉ោង ១៥:៤៨

ក្រុមកម្លាំងអ៊ុយក្រែនចូលរួមក្នុងការដឹកជំនួយយោធារបស់សហរដ្ឋអាមេរិក ដែលបានបញ្ជូនតាមយន្តហោះ ដែលជាផ្នែកនៃកញ្ចប់ជំនួយផ្នែកសន្តិសុខសម្រាប់អ៊ុយក្រែន នៅអាកាសយានដ្ឋានអន្តរជាតិ Boryspil ខាងក្រៅទីក្រុង Kyiv ប្រទេសអ៊ុយក្រែន កាលពីថ្ងៃទី១០ ខែកុម្ភៈ ឆ្នាំ២០២២។ (REUTERS/Valentyn Ogirenko)

មន្ត្រីអាមេរិកមួយរូបបាននិយាយនៅថ្ងៃអង្គារនេះថា សហរដ្ឋអាមេរិកនឹងប្រកាសកញ្ចប់ជំនួយសន្តិសុខថ្មីមួយសម្រាប់អ៊ុយក្រែនប្រហែល៣ ០០០លានដុល្លារ នៅថ្ងៃពុធនេះ ដែលជាកញ្ចប់ជំនួយដ៏ច្រើនបំផុតសម្រាប់ទីក្រុងកៀវ ចាប់តាំងពីការឈ្លានពានរបស់រុស្ស៊ីអស់រយៈពេល៦ខែកន្លងមក។ នេះបើតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៤ ខែសីហា ឆ្នាំ២០២២នេះ។

កញ្ចប់ជំនួយនេះកំពុងត្រូវបានរៀបចំស្របគ្នានៃថ្ងៃបុណ្យឯករាជ្យជាតិរបស់អ៊ុយក្រែន នៅថ្ងៃពុធនេះ។

កញ្ចប់ជំនួយនេះប្រើប្រាស់មូលនិធិពីគំនិតផ្ដួចផ្ដើមជំនួយសន្តិសុខអ៊ុយក្រែន (USAI) អនុម័តដោយសភា ដែលអនុញ្ញាតឱ្យរដ្ឋបាល លោក Biden ទិញអាវុធពីឧស្សាហកម្មលក់អាវុធ ជាជាងយកពីឃ្លាំងអាវុធរបស់សហរដ្ឋអាមេរិក។

ថ្លែងក្នុងលក្ខខណ្ឌសុំមិនបញ្ចេញឈ្មោះ មន្ត្រីរូបនេះបាននិយាយថា កញ្ចប់ជំនួយនេះនឹងផ្ដោតលើគ្រាប់រំសេវ និងប្រព័ន្ធការពារ។

មន្ត្រីដដែលបាននិយាយថា ចំនួននិងប្រភេទសព្វាវុធអាចមានការផ្លាស់ប្តូរមុនពេលប្រកាសជាផ្លូវការ។

ទីក្រុងវ៉ាស៊ីនតោន បានផ្តល់ជំនួយយោធាចំនួនជាង១០ពាន់លានដុល្លារ (១០,៦) ដល់រដ្ឋាភិបាលរបស់ប្រធានាធិបតី វ៉ូឡូឌីមៀ ហ្សេលេនស្គី (Volodymyr Zelenskiy) ចាប់តាំងពីថ្ងៃទី២៤ ខែកុម្ភៈ។

ប្រភពមួយទៀតបានប្រាប់ Reuters ថា ប្រទេសអាល្លឺម៉ង់គ្រោងនឹងផ្តល់សព្វាវុធបន្ថែមទៀត រួមទាំងប្រព័ន្ធការពារដែនអាកាស គ្រាប់រ៉ុក្កែត និងគ្រាប់រំសេវ ដល់អ៊ុយក្រែន ដែលមានតម្លៃជាង៥០០លានអឺរ៉ូ ឬស្មើប្រមាណ៥០០លានដុល្លារ ក្នុងឆ្នាំ២០២៣។

គួរបញ្ជាក់ថា ទីក្រុងមូស្គូ កំពុងព្យាយាមគ្រប់គ្រងតំបន់ដុនបាស (Donbas) រួមមាន ខេត្តលូហាន់ (Luhansk) និងខេត្តដូណេតស្ក៍ (Donetsk) ដែលក្រុមផ្ដាច់ខ្លួនគាំទ្រទីក្រុងម៉ូស្គូដណ្ដើមយកបាន។

ស្ថានទូតអាមេរិកបានប្រាប់ពលរដ្ឋរបស់ខ្លួនឱ្យចាកចេញពីប្រទេសអ៊ុយក្រែន ដោយសារតែភ័យខ្លាចការវាយប្រហារដោយមីស៊ីលពីរុស្ស៊ី ខណៈប្រទេសអ៊ុយក្រែនប្រារព្ធពិធីបុណ្យឯករាជ្យជាតិ ៣១ឆ្នាំ របស់ខ្លួន នៅថ្ងៃពុធនេះ។

ទីក្រុងកៀវ (Kyiv) បានព្រមានតបតទីក្រុងម៉ូស្គូយ៉ាងចាស់ដៃ ប្រសិនបើរុស្ស៊ីហ៊ានបើកការវាយប្រហារ៕

រុស្ស៊ី, អាមេរិក, អ៊ុយក្រែន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។