មន្ត្រីក្រសួងរៀបចំដែនដី នគរូបនីយកម្ម និងសំណង់ បាននិយាយថា ការអភិវឌ្ឍបឹងតាមោកនៅភាគខាងជើងរាជធានីភ្នំពេញ មានអាទិភាពខ្ពស់ជាងការអភិរក្ស ដោយបន្ថែមថាមានតែបឹងដូចជាបឹងទន្លេសាបទេដែលមានតម្លៃក្នុងការអភិរក្ស។
ក្រសួងរៀបចំដែនដី នគរូបនីយកម្ម និងសំណង់ បានបង្ហាញសមិទ្ធផលរយៈពេល៥ឆ្នាំ នៅទីស្ដីការគណៈរដ្ឋមន្ត្រី កាលពីថ្ងៃពុធ ខណៈអ្នកនាំពាក្យក្រសួងនេះ លោក សេង ឡូត មានប្រសាសន៍ថា អត្ថប្រយោជន៍ដែលទទួលបានពីការអភិវឌ្ឍ គឺច្រើនជាងការអភិរក្សធនធានធម្មជាតិ [សំដៅលើបឹងតាមោក]។
លោកបន្តថា៖ «សម្រាប់ខ្ញុំ នៅពេលដែលការអភិវឌ្ឍមានអត្ថប្រយោជន៍ច្រើនជាងការអភិរក្ស ខ្ញុំយល់ឃើញថា ការចាត់ថ្នាក់ដីឡើងវិញជារឿងត្រឹមត្រូវ»។
លោកបន្ថែមថា៖ «ប៉ុន្តែប្រសិនបើការអភិរក្សមានអត្ថប្រយោជន៍ច្រើន ដូចជាបឹងទន្លេសាបដែលជាជម្រកត្រីក្នុងតំបន់ ដែលមិនអាចប៉ះពាល់បាននោះ វានឹងផ្ដល់អត្ថប្រយោជន៍ច្រើន។ ដូច្នេះយើងត្រូវអភិរក្ស»។
បឹងតាមោក ត្រូវបានរដ្ឋាភិបាលធ្វើសម្បទានមួយផ្នែកទៅឱ្យឧកញ៉ាក្នុងស្រុក ស្ថាប័នរដ្ឋាភិបាល និងបុគ្គលដែលមានទំនាក់ទំនងល្អជាមួយរដ្ឋាភិបាល។ ប្រជាពលរដ្ឋដែលរស់នៅតាមច្រាំងបឹងតាមោក និយាយថា ពួកគាត់មានការព្រួយបារម្ភខ្លាចមានការបណ្ដេញចេញ ហើយពលរដ្ឋប្រមាណ១០នាក់ត្រូវបានចោទប្រកាន់ពីបទញុះញង់ ដោយមានបំណងឱ្យរដ្ឋធានាដីរបស់ពួកគាត់។
ការផ្តល់ដីសម្បទានត្រូវបានធ្វើឡើងនៅទូទាំងប្រទេស ជាញឹកញាប់ ទៅឱ្យបុគ្គលដែលមានទំនាក់ទំនងជិតស្និទ្ធនឹងរដ្ឋាភិបាល។
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ បានបញ្ជាក់អំពីករណីបឹងទន្លេសាប និងបានមានប្រសាសន៍ថា លោកនាយករដ្ឋមន្ត្រី ហ៊ុន សែន បានអនុម័តលើការចាត់ថ្នាក់ដីឡើងវិញនៅតំបន់ការពារ បន្ទាប់ពីមានការបង្ក្រាបដើម្បីទាមទារយកមកវិញនូវដីរដ្ឋពីការទន្ទ្រានរបស់អ្នកភូមិ។
លោក សេង ឡូត បាននិយាយថា ផ្ទៃដីប្រហែល១២ ០០០ហិកតាត្រូវបានចាត់ថ្នាក់ឡើងវិញពីតំបន់២ ទៅតំបន់១ នៃតំបន់ការពារ ដោយអនុញ្ញាតឱ្យមានកម្មសិទ្ធិឯកជនលើដីនោះ។ លោកបានបន្ថែមថា ការចាត់ថ្នាក់ឡើងវិញនឹងជួយដល់គ្រួសារចំនួន១០ ០០០នាក់។
តំបន់១នៃឋបនីយជីវមណ្ឌលបឹងទន្លេសាប អនុញ្ញាតឱ្យមានលំនៅឋានឯកជន និងកម្មសិទ្ធិដីធ្លី ចំណែកឯតំបន់២ អនុញ្ញាតឱ្យពលរដ្ឋអាចប្រកបរបរមួយចំនួនដើម្បីចិញ្ចឹមជីវិត ហើយតំបន់៣ គឺជាតំបន់ការពារយ៉ាងតឹងរ៉ឹង។
លោកថ្លែងថា៖ «អត្ថប្រយោជន៍ គឺថាប្រជាពលរដ្ឋទទួលបានដី និងមានសិទ្ធិពេញលេញលើដី ដែលពួកគាត់មានសិទ្ធិដាំដុះនិងគ្រប់គ្រង»។
លោកនាយករដ្ឋមន្ត្រី ហ៊ុន សែន បានបង្ហោះសារនៅលើទំព័រហ្វេសប៊ុករបស់លោកកាលពីខែវិច្ឆិកា ឆ្នាំ២០២១ ថា «មានការកាប់បំផ្លាញព្រៃឈើយ៉ាងអនាធិបតេយ្យ» នៅក្នុងតំបន់អភិរក្សមួយ។ កងរាជអាវុធហត្ថ និងមន្ត្រីខេត្តបានរឹបអូសយកមកវិញនូវផ្ទៃដីរាប់ម៉ឺនហិកតា។ សកម្មភាពនេះកើតឡើងបន្ទាប់ពីប្រតិបត្តិការមួយផ្សេងទៀតក្នុងការបង្រ្កាបការនេសាទខុសច្បាប់នៅបឹងទន្លេសាប រួមទាំងសហគមន៍នេសាទវៀតណាមផងដែរ។
លោក ថេង ច័ន្ទសង្វារ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានផ្ដល់ស្ថិតិបន្ថែមមួយចំនួនអំពីវិវាទ និងការផ្ទេរកម្មសិទ្ធិដីធ្លី។ លោកបន្តថា ផ្ទៃដីទំហំ៣ ០០០ហិកតា ក្នុងឆមាសទី១ ឆ្នាំនេះ ត្រូវបានផ្ដល់ឱ្យអតីតយុទ្ធជន និងអតីតមន្ត្រីនគរបាលចំនួន៦៩គ្រួសារ។
លោកបានបន្ថែមថា ប្រជាពលរដ្ឋចំនួន២ ៥២៤គ្រួសារដែលរងផលប៉ះពាល់ដោយដីសម្បទានសេដ្ឋកិច្ចនៅខេត្តកោះកុង ឧត្តរមានជ័យ ព្រះវិហារ និងខេត្តកំពង់ស្ពឺ ទទួលបានដីចំនួន៥ ៣៦១ហិកតា និងសំណងចំនួន២,១៦លានដុល្លារ។
ជាមួយគ្នានេះដែរ ប្រជាពលរដ្ឋចំនួន១ ២៣១គ្រួសារ ក្នុងចំណោម១ ៣៣៣គ្រួសារ ដែលរងផលប៉ះពាល់ដោយគម្រោងអភិវឌ្ឍន៍ខ្នាតធំរបស់ក្រុមហ៊ុន «យូញៀន ឌីវេឡុបមេន គ្រុប ខូ អិលធីឌី (Union Development Group Co., Ltd.)» នៅស្រុកបទុមសាគរ ខេត្តកោះកុង បានទទួលដីចំនួន៧៥៨ហិកតា និងសំណងចំនួន១,៤៣លានដុល្លារ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Boeng Tamok’s Development Outweighs Preservation of Lake, Says Land Official
