មន្ទីរសុខាភិបាលខេត្តស្វាយរៀង បានលើកឡើងថា សារជាតិពុលរបស់ឪម៉ាល់បានធ្វើឱ្យកុមារីវ័យ៧ឆ្នាំម្នាក់ស្លាប់ ក្រោយពីសត្វឪម៉ាល់ទាំងនោះបានទិចនាងជាច្រើនកន្លែង ដែលធ្វើឱ្យប៉ះពាល់ដល់សរីរាង្គសំខាន់ៗ។
ករណីនេះបានកើតឡើងកាលពីថ្ងៃទី២២ ខែសីហា ឆ្នាំ២០២២ អំឡុងពេលដែលកុមារីម្នាក់ អាយុ៧ឆ្នាំ រស់នៅភូមិមេលោង សង្កាត់ចេក ក្រុងស្វាយរៀង ខេត្តស្វាយរៀង បានធ្វើដំណើរទៅចម្ការ និងត្រូវបានខ្យល់បក់បោកធ្វើឱ្យសំបុកសត្វឪម៉ាល់ផ្អើលទិចនាងប្រហែលលើសពី៣០ទ្រនិច នៅលើដៃជើង ដងខ្លួន និងក្បាល ហើយត្រូវបានគ្រួសារបញ្ជូនទៅមន្ទីរពេទ្យ។
សេចក្ដីប្រកាសព័ត៌មានរបស់មន្ទីរសុខាភិបាលខេត្តស្វាយរៀង កាលពីថ្ងៃទី២៣ ខែសីហា ដែលបានលើកឡើងពីរបាយការណ៍របស់មន្ទីរពេទ្យខេត្ត ឱ្យដឹងថា ក្រោយពីបានសង្គ្រោះបឋម ក្រុមគ្រូពេទ្យបានវាយតម្លៃពីស្ថានភាពអ្នកជំងឺឡើងវិញ ដោយរកឃើញថា ជាតិពុលរបស់សត្វទិចបានពុលទៅលើសារពាង្គកាយសំខាន់ៗគ្រប់ទីកន្លែង ដូចជា តម្រង់នោម ខួរក្បាល បេះដូង និងប្រព័ន្ធដកដង្ហើម។
យ៉ាងណា ក្រោយការជួយសង្គ្រោះជាង២ម៉ោង ស្ថានភាពអ្នកជំងឺនៅតែធ្ងន់ធ្ងរ និងដោយមានការទទូចស្នើសុំពីគ្រួសារ ទើបក្រុមគ្រូពេទ្យបានសម្រេចចិត្តបញ្ជូនអ្នកជំងឺទៅតាមរថយន្តសង្គ្រោះទៅមន្ទីរពេទ្យគន្ធបុប្ជាភ្នំពេញ ទាំងស្ថានភាពធ្ងន់ធ្ងរ។ ប្រភពដដែលបន្តថា ដោយសារស្ថានភាពធ្ងន់ធ្ងរ កុមារីរូបនេះបានបាត់បង់ជីវិត ហើយរថយន្តសង្គ្រោះបានដឹកជូនសពមកដល់លំនៅឋានវិញ ដោយពុំគិតថ្លៃសេវាដឹកជញ្ជូន។
ទាក់ទិនរឿងនេះ ឪពុកម្ដាយកុមារីរូបនោះបានបង្ហាញការមិនសុខចិត្ត ដោយថា គ្រូពេទ្យមិនបានយកចិត្តទុកដាក់ដិតដល់ ទើបបណ្ដាលឱ្យកូនស្រីរបស់ពួកគាត់កាន់តែធ្ងន់ធ្ងរ និងឈានរហូតដល់បាត់បង់ជីវិត។
យ៉ាងណា មន្ទីរសុខាភិបាលនៃរដ្ឋបាលខេត្តស្វាយរៀង បង្ហាញការសោកស្ដាយចំពោះរឿងអកុសលនេះដែលបានកើតឡើង និងបានចូលរួមរំលែកទុក្ខសោកសម្រាប់ក្រុមគ្រួសារនៃសព ចំពោះករណីមរណភាពរបស់កុមារីរូបនោះផងដែរ៕