មន្ត្រីជាន់ខ្ពស់រាជរដ្ឋាភិបាលបានឱ្យដឹងថា រយៈពេល ៨ខែ ឆ្នាំ២០២២នេះ សមត្ថកិច្ចបានសង្គ្រោះជនបរទេសដែលរងគ្រោះដោយអំពើជួញដូរ និងរត់ពន្ធមនុស្សជិត ១ ០០០នាក់ ខណៈរដ្ឋមន្រ្តីក្រសួងមហាផ្ទៃ អំពាវនាវឱ្យសាធារណជន និងភាគីពាក់ព័ន្ធបន្តសហការផ្តល់ព័ត៌មានទាក់ទងនឹងអំពើជួញដូរមនុស្សបន្ថែមទៀត។
កាលពីរសៀលថ្ងៃទី២៦ ខែសីហា ឆ្នាំ២០២២ រដ្ឋមន្រ្តីក្រសួងមហាផ្ទៃ លោក ស ខេង បានបង្ហាញរបាយការណ៍ទាក់ទងការជួញដូរនិងរត់ពន្ធមនុស្ស គិតចាប់ពីថ្ងៃទី១ ខែមករា ដល់ថ្ងៃទី២០ ខែសីហា ឆ្នាំ២០២២នេះ។ លោកបន្តថា រយៈពេលជិត៨ ខែមកនេះ សមត្ថកិច្ចកម្ពុជា បានរកឃើញនិងជួយសង្គ្រោះជនបរទេសចំនួន ៨៧ករណី ស្មើប្រមាណ ៨៦៥នាក់ និងបានកសាងសំណុំរឿងបញ្ជូនទៅតុលាការចំនួន ១៧ករណី ដែលមានជនសង្ស័យចំនួន៦០នាក់។
សេចក្តីអំពាវនាវដដែលបន្តថា នៅសប្តាហ៍ទី៤ ខែសីហា ឆ្នាំ២០២២នេះ អាជ្ញាធរកម្ពុជាបានជួយសង្គ្រោះជនរងគ្រោះបានចំនួន២៥នាក់(មាន៦សញ្ជាតិ) សរុបចំនួន ៧ករណី និងឃាត់ខ្លួនជនសង្ស័យសរុបចំនួន២៣នាក់(មាន៤សញ្ជាតិ) នៅក្នុងខេត្តព្រះសីហនុ ខេត្តពោធិ៍សាត់ ខេត្តស្វាយរៀង និងខេត្តឧត្តរមានជ័យ ហើយនៅមានករណីសេសសល់បន្ថែមទៀតដែលអាជ្ញាធរមានសមត្ថកិច្ចកំពុងបន្តស្រាវជ្រាវដើម្បីសង្គ្រោះនិងបង្រ្កាប។
ពាក់ព័ន្ធករណីជួញដូរនិងរត់ពន្ធមនុស្សនេះដែរ រដ្ឋមន្ត្រីក្រសួងមហាផ្ទៃ លោក ស ខេង បានឱ្យដឹងថា ជនបរទេសមួយចំនួនធំត្រូវបានក្រុមឧក្រិដ្ឋជនដែលមានមេខ្លោងនៅក្នុងប្រទេសរបស់ខ្លួន និងមានបក្ខពួកនៅកម្ពុជាប្រើប្រាស់បណ្តាញទំនាក់ទំនងសង្គម ដើម្បីឆបោកឱ្យឆ្លងដែនខុសច្បាប់ចូលមកកម្ពុជា។
ការឆបោកទាំងនោះ ដោយពួកគេសន្យាផ្តល់ការងារដែលទទួលបានប្រាក់ឈ្នួលខ្ពស់ ប៉ុន្តែជនទាំងនោះត្រូវបានចាត់ឱ្យបម្រើការងារល្បែងស៊ីសងអនឡាខុសច្បាប់។ ជាមួយគ្នានេះ ពួកគេក៏បានក្លាយជាជនរងគ្រោះនៃអំពើជួញដូរនិងរត់ពន្ធមនុស្សនេះ ហើយត្រូវបានផ្ទេរឬលក់បន្តពីក្រុមហ៊ុនមួយទៅក្រុមហ៊ុនមួយទៀត ឬពីក្រុមមួយទៅក្រុមមួយទៀត ដោយមិនមានការព្រមព្រៀងពីសាមីខ្លួន។ ប្រភពដដែលថា ករណីខ្លះជនរងគ្រោះត្រូវរងអំពើហិង្សា និងការគំរាមកំហែងប្រសិនបើមិនធ្វើតាមការបង្គាប់បញ្ជារបស់ក្រុមឧក្រិដ្ឋជន។
បញ្ហានេះ រដ្ឋមន្រ្តីក្រសួងមហាផ្ទៃ បានអំពាវនាវដល់សាធារណជនជាតិនិងអន្តរជាតិ ស្ថាប័នតំណាងបរទេស សមត្ថកិច្ចនិងបណ្តាភាគីពាក់ព័ន្ធទាំងអស់ ឱ្យបន្តសហការផ្តល់ព័ត៌មានពាក់ព័ន្ធនឹងអំពើជួញដូរមនុស្ស និងឧក្រិដ្ឋកម្មឆ្លងដែនផ្សេងទៀត ដើម្បីបង្ការទប់ស្កាត់និងបង្ក្រាបបានទាន់ពេលវេលា៕