រដ្ឋបាលខេត្តព្រះវិហារ អំពាវនាវដល់ប្រជាពលរដ្ឋរស់នៅតាមដងស្ទឹងសែន និងតាមមាត់ទន្លេមេគង្គ ដែលជាតំបន់ងាយរងគ្រោះដោយទឹកជំនន់ ត្រូវប្រុងប្រយ័ត្ន និងស្វែងរកទីទួលមានសុវត្ថិភាពដែលនៅជិត ជៀសវាងកើតមាននូវគ្រោះថ្នាក់ផ្សេងៗចាប់ពីចុងខែសីហានេះទៅ។
ក្នុងសេចក្តីជូនដំណឹងរបស់រដ្ឋបាលខេត្តព្រះវិហារ បានឱ្យដឹងកាលពីថ្ងៃទី២៧ ខែសីហាថា ក្រសួងធនធានទឹក និងឧតុនិយម បានព្យាករស្ដីពីស្ថានភាពអាកាសធាតុជ្រលងសម្ពាធទាបឥណ្ឌា នឹងរំកិលចុះមកជាមួយនឹងសម្ពាធ(ITCZ) ដែលអូសបន្លាយនៅភាគខាងជើងប្រទេសថៃ ឡាវ និងវៀតណាម ដោយភ្ជាប់ជាមួយនឹងសម្ពាធទាបស្ថិតនៅក្នុងសមុទ្រចិនខាងត្បូង និងរបបខ្យល់មូសុងនិរតីកម្រិតកម្ពស់មធ្យមទៅបង្គួរ ។
ស្ថានភាពបែបនេះ នឹងធ្វើឱ្យខេត្តព្រះវិហារ ទទួលរងភ្លៀងធ្លាក់ក្នុងកម្រិតពីមធ្យមទៅខ្លាំងជាប់គ្នា ក្នុងរយៈពេលប៉ុន្មានថ្ងៃនេះ ដែលធ្វើឱ្យទឹកស្ទឹងសែនហក់ឡើងខ្លាំងលើសពីកម្រិតប្រកាសអាសន្ន ។ គិតត្រឹមថ្ងៃទី២៧ ខែសីហាឆ្នាំ២០២២ នេះស្ទឹងសែនមានកម្ពស់ ១១.៦០ម៉ែត្រ លើសពីកម្រិតប្រកាសអាសន្ន០.១០ម៉ែត្រ។
ករណីនេះ រដ្ឋបាលខេត្តព្រះវិហារ អំពាវនាវដល់ប្រជាពលរដ្ឋក្នុងខេត្តទាំងអស់ ជាពិសេសអ្នកដែលកំពុងរស់នៅតាមដងស្ទឹងសែន តាមមាត់ទន្លេមេគង្គ និងពលរដ្ឋរស់នៅតំបន់ងាយរងគ្រោះដោយសារទឹកជំនន់ ដើម្បីធានាសុវត្ថិភាព និងបង្ការនូវគ្រោះមហន្តរាយជាយថាហេតុ ត្រូវប្រុងប្រយ័ត្ន និងស្វែងរកទីទួលមានសុវត្ថិភាពដែលនៅជិត ជៀសសវាងកើតមាននូវគ្រោះថ្នាក់ផ្សេងៗ។
រដ្ឋបាលខេត្តព្រះវិហារ បង្ហាញការជឿជាក់ថា ប្រជាពលរដ្ឋទាំងអស់ក្នុងខេត្តនិងប្រុងប្រយ័ត្ន ហើយបង្កើនការយកចិត្តទុកដាក់ខ្ពស់ ចំពោះស្ថានភាពកម្ពស់ទឹកស្ទឹងសែន និងទឹកទន្លេ ដែលកំពុងហក់ឡើងជាបន្តបន្ទាប់នោះផងដែរ។
បន្ថែមពីនេះ រដ្ឋបាលខេត្តក៏ស្នើទៅប្រជាពលរដ្ឋទាំងអស់ចូលរួមសហការជាមួយអាជ្ញាធរដែនដីក្នុងការបង្ការ និងទប់ស្កាត់គ្រោះថ្នាក់ជាយថាហេតុផ្សេងៗដែលបណ្ដាលមកពីជំនន់ទឹកភ្លៀងនាពេលនេះ ឱ្យមានប្រសិទ្ធភាព ៕