នគរបាលបាននិយាយថា ពលរដ្ឋហ្វីលីពីនចំនួន៤នាក់ដែលត្រូវបានស្ថានទូតហ្វីលីពីនស្នើសុំឱ្យជួយសង្រ្គោះកាលពីដើមខែនេះ លែងនៅទីតាំងក្រុមហ៊ុន «យូញៀន ឌីវីឡុបមិន គ្រុប – Union Development Group (UDG)» ខេត្តកោះកុងទៀតហើយ នៅពេលមន្រ្តីនគរបាលទៅដល់។
លិខិតរបស់ស្ថានទូតហ្វីលីពីន ផ្ញើជូនអាជ្ញាធរកម្ពុជា ចុះថ្ងៃទី៨ ខែសីហា បានឱ្យដឹងថា ពលរដ្ឋហ្វីលីពីនចំនួន៤នាក់ត្រូវបានបង្ខាំងនៅជាន់ទី៤ នៃកាស៊ីណូ Long Bay ក្នុងស្រុកគិរីសាគរ ខេត្តកោះកុង។ តាមរយៈលិខិតនោះ ស្ថានទូតបានឱ្យដឹងថា ពលរដ្ឋហ្វីលីពីនទាំងនោះត្រូវបានតម្រូវឱ្យបង់ប្រាក់ច្រើន ដើម្បីអាចចេញពីក្រុមហ៊ុន។
ការបង្ខាំងទុកនេះហាក់ដូចជារូបភាពនៃពលកម្មដោយបង្ខំ និងការជួញដូរមនុស្ស ដែលជនបរទេសត្រូវបានបញ្ឆោតឱ្យមកប្រទេសកម្ពុជា បន្ទាប់មកត្រូវបានបង្ខំឱ្យប្រព្រឹត្តអំពើឆបោកតាមអ៊ីនធឺណិតជាសកល ឬប្រឈមមុខនឹងអំពើហិង្សា។
អ្នកនាំពាក្យនគរបាលខេត្តកោះកុង លោក ស សារ៉ាត់ មានប្រសាសន៍ថា កម្លាំងរបស់លោកបានទទួលលិខិតពីស្ថានទូតហ្វីលីពីននៅចន្លោះពីថ្ងៃទី១០ ដល់ថ្ងៃទី១៧ ខែសីហា។ លោកបានថ្លែងនៅថ្ងៃទី២០ ខែសីហា ថានគរបាលនៅតែបន្តធ្វើការលើករណីនេះនៅពេលនោះ។
លោក ស សារ៉ាត់ បាននិយាយកាលពីថ្ងៃសុក្រថា ចាប់តាំងពីពេលនោះមក មន្ត្រីនគរបាលបានចូលទៅកាន់កាស៊ីណូ ដែលមានទីតាំងស្ថិតនៅក្នុងគម្រោងក្រុមហ៊ុន យូញៀន ឌីវីឡុបមិន គ្រុប (UDG) ដែលមានភាពចម្រូងចម្រាស ប៉ុន្តែមិនឃើញជនរងគ្រោះឡើយ។
លោកបន្តថា៖ «ករណីនេះបានបញ្ចប់ហើយ។ ក្រុមការងារបានចុះទៅពិនិត្យទីតាំងនោះ ហើយបានរកឃើញថា ជនរងគ្រោះបានចាកចេញមុនយើងទៅដល់ទីនោះ»។
លោកបានបដិសេធថាមិនមានការបង្ខាំងមនុស្សទុកឡើយ ដោយនិយាយថាមិនមានការជួញដូរមនុស្សនោះទេ បើទោះបីជាកាលពីពេលថ្មីៗនេះ មន្ត្រីថ្នាក់ជាតិបានទទួលស្គាល់ពីស្ថានការណ៍ជួញដូរមនុស្សក៏ដោយ។
លោកបន្ថែមថា៖ «គ្មានការបង្ខាំងអ្នកទាំង៤នោះទេ។ ពួកគេមកធ្វើការ ហើយឥលូវបានចាកចេញហើយ»។
ស្ថានទូតហ្វីលីពីន មិនបានឆ្លើយតបនឹងសំណើសុំការអត្ថាធិប្បាយនោះឡើយ។
យោងតាមទីភ្នាក់ងារសារព័ត៌មានវៀតណាម VnExpress នគរបាលវៀតណាមបាននិយាយអំពីការលំបាកក្នុងការធានាការជួយសង្គ្រោះពលរដ្ឋរបស់ខ្លួនដែលចាញ់បោកគេ និងជាប់នៅក្នុងប្រទេសកម្ពុជា។
ដោយស្រង់សម្តីរបស់លោក ឃុង ង៉ុកអាញ់ (Khong Ngoc Oanh) រដ្ឋមន្រ្តីក្រសួងសន្តិសុខសាធារណៈវៀតណាម សារព័ត៌មានដដែលនេះបានរាយការណ៍ថា មនុស្សរាប់ពាន់នាក់ប្រហែលជាត្រូវបានរត់ពន្ធមកប្រទេសកម្ពុជាដើម្បីជួញដូរ។ លោក ង៉ុកអាញ់ បានបន្តថា ប៉ុន្តែមានការលំបាកក្នុងការចូលទៅកាន់ទីតាំងឆបោកនៅកម្ពុជា។
ទីភ្នាក់ងារសារព័ត៌មាន VnExpress បានរាយការណ៍ថា នៅក្នុងឆមាសទីមួយឆ្នាំនេះ ពលរដ្ឋវៀតណាមចំនួន២៥០នាក់ដែលចាញ់បោកគេទៅធ្វើការដោយខុសច្បាប់នៅកម្ពុជា ត្រូវបានជួយសង្គ្រោះ៕
បកប្រែ និងសម្រួលចេញពីអត្ថបទដើមភាសាអង់គ្លេស៖ Filipinos Who Sought Rescue in Koh Kong Not There When Police Arrived
