ប្រជាពលរដ្ឋជិត១០០គ្រួសារ រស់នៅឃុំតាំងក្រសាំង ស្រុកទឹកផុស ខេត្តកំពង់ឆ្នាំង ត្រៀមឡើងមករកកិច្ចអន្តរាគមន៍ពីលោកនាយករដ្ឋមន្ត្រី ហ៊ុន សែន ឱ្យជួយដោះស្រាយវិវាទដីធ្លី ក្រោយគ្មានដំណោះស្រាយពីអាជ្ញាធរស្រុកនិងខេត្ត។
កាលពីថ្ងៃទី១០ ខែសីហា ឆ្នាំ២០២២ មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពង់ឆ្នាំង បានផ្ញើលិខិតមួយទៅអភិបាលស្រុកទឹកផុស ឱ្យអញ្ជើញមេភូមិក្រាំងតាមុំ មេឃុំតាំងក្រសាំង តំណាងពលរដ្ឋ និងភាគីពាក់ព័ន្ធចូលរួមដោះស្រាយបញ្ចប់វិវាទដីធ្លី រវាងពលរដ្ឋចំនួន៧៥គ្រួសារ និងបុគ្គល២នាក់ឈ្មោះ ដុស សុវណ្ណៈ និងឈ្មោះ ពេជ ចរិយា នៅថ្ងៃទី១៥ ខែសីហានេះ ក្រោយមានបញ្ជាពីក្រសួងរៀបចំដែនដី ប៉ុន្តែអ្នកភូមិថា ការដោះស្រាយនេះមិនទទួលបានផលនោះទេ។
លោក ឆែម សឿម ប្រជាពលរដ្ឋរស់នៅភូមិក្រាំងតាមុំ ឃុំតាំងក្រសាំង ប្រាប់វីអូឌីនៅថ្ងៃចន្ទនេះថា អ្នកភូមិដែលកំពុងមានជម្លោះនេះបានកើនដល់ជាង៩០គ្រួសារហើយ និងមានដីទំហំជាង១១៣ហិកតា។ តំណាងពលរដ្ឋរូបនេះបន្តថា ដីកំពុងមានជម្លោះនោះ អ្នកភូមិកាន់កាប់និងអាស្រ័យផលដោយធ្វើស្រែតាំងពីឆ្នាំ១៩៧៩ជាបន្តបន្ទាប់រហូតមកដល់បច្ចុប្បន្ន ទើបតែនៅឆ្នាំ២០២០ បុគ្គលឈ្មោះ ដុស សុវណ្ណៈ និងឈ្មោះ ពេជ ចរិយា បានចេញមុខមកអះអាងថា ខ្លួនមានដីនៅតំបន់នោះជាង១០០ហិកតា ដោយមានបណ្ណកម្មសិទ្ធិទៅវិញ។
លោក ឆែម សឿម បន្តថា អំឡុងពេលអាជ្ញាធរមូលដ្ឋានហៅពួកគាត់ទៅដោះស្រាយនោះ ខាងអាជ្ញាធរបានសម្របសម្រួលឱ្យភាគីជម្លោះសម្បទានដី៥០ភាគរយឱ្យគ្នាទៅវិញទៅមក ដើម្បីបញ្ចប់ជម្លោះ ប៉ុន្តែប្រជាពលរដ្ឋមិនព្រម។ លោកថា អ្នកភូមិទាមទារយកដីទាំងអស់ និងចេញបណុ្ណកម្មសិទ្ធិ ដោយសារពួកគាត់មានដីចន្លោះពី១ហិកតាទៅ២ហិកតាប៉ុណ្ណោះក្នុងមួយគ្រួសារ សម្រាប់ធ្វើស្រែចិញ្ចឹមជីវិត។
លោកបន្ថែមថា៖ «ការដោះស្រាយរបស់អាជ្ញាធរកាលពីថ្ងៃទី១៥ ខែសីហាហ្នឹង គឺគេគ្រាន់តែយើងមកសម្របសម្រួល របៀបថាចែកគ្នា៥០ៗភាគរយ ដល់អ៊ីចឹងប្រជាពលរដ្ឋយើងអត់ព្រមទេ ឱ្យអ្នកមានប្លង់ហ្នឹងស្រាវជ្រាវ[រក]អ្នកលក់ ឱ្យមកជួបជាមួយប្រជាពលរដ្ឋផ្ទាល់មក។ ប្រជាពលរដ្ឋអត់ដឹងអ្នកហ្នឹងលក់ពីពេលណាផង អត់មានស្នាមមេដៃ សាក្សី ព្រំត្រឹមត្រូវផងហ្នឹង»។
តំណាងពលរដ្ឋម្នាក់ទៀត អ្នកស្រី ទួន គន្ធា ឱ្យដឹងថា បុគ្គល២នាក់ឈ្មោះ ដុស សុវណ្ណៈ និងឈ្មោះ ពេជ ចរិយា ជាអ្នករស់នៅរាជធានីភ្នំពេញ មិនដឹងជាមកលួចធ្វើបណ្ណកម្មសិទ្ធិលើដីនេះដោយរបៀបណានោះទេ។ អ្នកស្រីថា គ្រួសាររបស់អ្នកស្រីក៏បានប៉ះពាល់ដីស្រែប្រហែល២ហិកតាផងដែរ។
អ្នកស្រី ទួន គន្ធា បន្តថា កន្លងមក អ្នកភូមិធ្លាប់បានដាក់ញត្តិនៅក្រសួងរៀបចំដែនដី និងអង្គភាពប្រឆាំងអំពើពុករលួយ ដើម្បីស្នើឱ្យស្ថាប័នទាំង២នេះ ស៊ើបអង្កេត និងដោះស្រាយជូនពលរដ្ឋដែរ ប៉ុន្តែរហូតមកដល់ពេលនេះ ពុំមានដំណោះស្រាយនៅឡើយទេ។
អ្នកស្រីបន្ថែមថា៖ «បើអត់មានដំណោះស្រាយ ប្រជាជននឹងទៅរកសម្តេច [ហ៊ុន សែន] ឱ្យជួយរកយុត្តិធម៌ហើយ ព្រោះពួកគាត់អត់សុខចិត្តទេ។ បើអត់ដោះស្រាយឱ្យ អ្នកណាក៏មិនអាចចូលធ្វើបានដែរ អត់ឱ្យចូលធ្វើដាច់ខាត។ ពួកខ្ញុំសុខចិត្តស្លាប់នៅលើដីនេះហើយ ព្រោះពួកខ្ញុំមានដីតែប៉ុណ្ណឹងទេ សម្រាប់ធ្វើស្រែចិញ្ចឹមជីវិត។ បងប្អូនប្រជាពលរដ្ឋយើងអត់បានទៅយកដីរបស់អ្នកណាទេ គឺពួកគាត់បានកាន់កាប់បន្តពីដូនតាមក»។
តែយ៉ាងណា ក្រុមពលរដ្ឋនៅមិនទាន់កំណត់ពេលវេលាជាក់លាក់ ក្នុងការឡើងមកដាក់ញត្តិនៅខុទ្ទកាល័យនាយករដ្ឋមន្ត្រីពេលណានៅឡើយ។
វីអូឌី មិនទាន់អាចរកការឆ្លើយតបពីបុគ្គលឈ្មោះ ដុស សុវណ្ណៈ និងឈ្មោះ ពេជ ចរិយា ដែលជាភាគីជម្លោះម្ខាងទៀតបានទេ នៅថ្ងៃចន្ទនេះ។
មេឃុំតាំងក្រសាំង លោក ពុធ ឃឿន មានប្រសាសន៍ថា ពលរដ្ឋបានកាន់កាប់ និងអាស្រ័យផលដោយធ្វើស្រែលើដីកំពុងមានជម្លោះនោះតាំងពីក្រោយសម័យខ្មែរក្រហម រហូតមកដល់បច្ចុប្បន្ននេះ ប៉ុន្តែពុំមានបណ្ណកម្មសិទ្ធិឡើយ។ ចំណែកភាគីម្ខាងទៀតមានបណ្ណកម្មសិទ្ធិលើដីនោះតាំងពីឆ្នាំ១៩៩៥ ប៉ុន្តែមិនដែលចូលមកអាស្រ័យផលនោះទេ។
មេឃុំរូបនេះអះអាងថា ខ្លួនមិនជាប់ពាក់ព័ន្ធ ឬដឹងឮចំពោះការចេញបណ្ណកម្មសិទ្ធិនេះឡើយ។
លោកបន្ថែមថា៖ «ដីហ្នឹងជាដីរបស់ប្រជាពលរដ្ឋហ្នឹងហើយ ព្រោះគាត់បានទៅនៅតាំងពីក្រោយសង្គ្រាមមក។ ចំណែកភាគីម្ខាងទៀតមានបណ្ណកម្មសិទ្ធិតាំងពីឆ្នាំ១៩៩៥ ប៉ុន្តែអត់បានមកកាន់កាប់ទេ។ ដល់អ៊ីចឹងប្រជាពលរដ្ឋបានចូលទៅធ្វើស្រែលើដីហ្នឹង ក្រោយមកអស់ខ្មែរក្រហម ពួកគាត់ចូលទៅរស់នៅភូមិហ្នឹងរហូត។ រឿងចេញប្លង់ហ្នឹង ខ្ញុំអត់ដឹងទេ! អាហ្នឹងបែបខាងជំនាញ គេអ្នកធ្វើការ»។
ប្រធានមន្ទីររៀបចំដែនដី នគរូបនីយកម្ម និងសំណង់ខេត្តកំពង់ឆ្នាំង លោក លី សុភា មានប្រសាសន៍ថា ភាគីខាងលោក ដុស សុវណ្ណៈ និងអ្នកស្រី ពេជ ចរិយា មានបណ្ណកម្មសិទ្ធិលើដីទំហំ១២៥ហិកតា តាំងពីឆ្នាំ១៩៩៥។ លោកថា ករណីនេះ អាជ្ញាធរពាក់ព័ន្ធកំពុងដំណើរការសម្របសម្រួលដោះស្រាយមិនទាន់ចប់នៅឡើយទេ។
លោកបន្ថែមថា៖ «ឥលូវនេះ យើងកំពុងស្រាវជ្រាវរកភាគីពាក់ព័ន្ធ ឯកសារពាក់ព័ន្ធ និងទីតាំងដី ដើម្បីសម្របសម្រួលដោះស្រាយបញ្ចប់»។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តកំពង់ឆ្នាំង លោក សំ ចាន់គា មានប្រសាសន៍ថា ជម្លោះដីធ្លីដែលពាក់ព័ន្ធជាមួយអ្នកមានបណ្ណកម្មសិទ្ធិ និងពលរដ្ឋរស់នៅជាក់ស្តែងនេះ បានកើតឡើងច្រើននៅក្នុងខេត្តកំពង់ឆ្នាំង ដោយសារអ្នកទិញមួយចំនួនបានទិញតែបណ្ណ ប៉ុន្តែមិនបានទៅពិនិត្យមើលដីជាក់ស្តែងឡើយ។ មន្ត្រីសិទ្ធិមនុស្សរូបនេះបានស្នើដល់អាជ្ញាធរត្រូវដោះស្រាយករណីនេះឱ្យមានតម្លាភាពនិងយុត្តិធម៌ សម្រាប់គ្រប់ភាគីពាក់ព័ន្ធ ដើម្បីកុំឱ្យពួកគេខាតបង់ផលប្រយោជន៍ដោយសារបញ្ហានេះ។
លោកបន្ថែមថា៖ «ភាគីអ្នកទិញមួយចំនួនធំអត់ដែលស្គាល់ដីទេ គាត់ទិញតែបណ្ណទេ! ដល់ពេលគាត់ចុះមករកដី បង្កឱ្យមានជាជម្លោះដីធ្លីនេះកើតឡើង ហើយកន្លែងអាជ្ញាធរហ្នឹងពិបាកក្នុងការដោះស្រាយដែរ នៅពេលដែលភាគីមួយមានបណ្ណ និងភាគីប្រជាពលរដ្ឋដែលគាត់កាន់កាប់តាំងយូរណាស់មកហ្នឹង។ អ៊ីចឹងយើងស្នើដល់អាជ្ញាធរដែលចុះដោះស្រាយហ្នឹង ពិនិត្យមើលជាក់ស្តែង ថាតើភាគីមានបណ្ណហ្នឹង គាត់បានចូលកាន់កាប់ជាក់ស្តែងតាំងពីពេលណាមក ហើយពលរដ្ឋចូលកាន់កាប់តាំងពីពេលណាដែរ និងមានការដឹងឮពីអាជ្ញាធរដែរឬទេ»៕
