រដ្ឋមន្ត្រីក្រសួងមហាផ្ទៃ លោក ស ខេង បានព្រមានគ្រូបណ្ដុះបណ្ដាលជាន់ខ្ពស់ម្នាក់នៃបណ្ឌិត្យសភានគរបាលកម្ពុជាថា លោកនឹងដកតំណែងគ្រូបណ្ដុះបណ្ដាលរូបនោះ ប្រសិនបើគាត់មិនប្រគល់ដីទៅឱ្យសាលាបណ្ដុះបណ្ដាលវិញ។
លោក ស ខេង បានព្រមានលោក យស ផន ក្នុងឱកាសថ្លែងសុន្ទរកថានៅសាលានគរបាលជាតិ ភូមិភាគ១ ក្នុងខេត្តស្ទឹងត្រែង។
លោក យស ផន ធ្លាប់ធ្វើជានាយកសាលាបណ្ដុះបណ្ដាលនោះ ហើយបច្ចុប្បន្នលោកជាគ្រូបណ្ដុះបណ្ដាលនៅសាលាបណ្ដុះបណ្ដាលនគរបាលខេត្តកណ្ដាល។
នៅក្នុងសុន្ទរកថារបស់លោក ស ខេង បាននិយាយថា លោកបានឮថា លោក យស ផន មានជម្លោះដីធ្លីជាមួយសាលាបណ្ដុះបណ្ដាលនគរបាលខេត្តស្ទឹងត្រែង ហើយសាលាបានដាក់ពាក្យបណ្ដឹងទៅតុលាការប្រឆាំងនឹងអតីតនាយកសាលាបណ្តុះបណ្តាលរូបនេះ។ សាលាបានចោទថា អតីតនាយកសាលារូបនេះបានយកដីសាលាបណ្តុះបណ្តាលមកធ្វើជាកម្មសិទ្ធិឯកជន។
លោក ស ខេង បានថ្លែងថា ឯកសារដែលបញ្ជាក់ថា ដីរបស់សាលាបណ្តុះបណ្តាលនគរបាលជាកម្មសិទ្ធិរបស់រដ្ឋ ចុះឆ្នាំ២០០៣ គឺមានភាពច្បាស់លាស់អំពីទំហំរបស់ដីនេះ។
លោកថា មានជម្រើសតែពីរប៉ុណ្ណោះក្នុងការដោះស្រាយជម្លោះនៅពេលនេះ។
លោក ស ខេង មានប្រសាសន៍ថា៖ «ជម្រើសទី១ ប្រសិនបើគាត់ចង់រក្សាតួនាទីរបស់គាត់ជាគ្រូបណ្តុះបណ្តាលក្នុងក្របខណ្ឌនគរបាលជាតិ គាត់ត្រូវតែប្រគល់ដីឱ្យសាលាបណ្តុះបណ្តាលខេត្តស្ទឹងត្រែងវិញ ព្រោះដីនេះមិនមែនជាកម្មសិទ្ធិរបស់គាត់ទេ។ ជម្រើសទី២ ប្រសិនបើគាត់មិនប្រគល់ដីឱ្យសាលាបណ្តុះបណ្តាលវិញទេ គាត់ត្រូវតែដើរចេញពីក្របខណ្ឌនគរបាល គាត់មិនរួចខ្លួនទេ! ហើយករណីនេះនឹងត្រូវបន្តនីតិវិធីទៅតុលាការ»។
ទោះជាយ៉ាងណា លោក ស ខេង បានលើកឡើងថា លោក យស ផន នៅតែអាចទទួលបានដីខ្លះ។
លោក ស ខេង មានប្រសាសន៍ថា៖ «សម្រាប់ជម្រើសទីមួយ យើងគិតថានឹងផ្តល់ដីក្នុងទំហំសមស្របឱ្យគាត់ ដើម្បីសង់ផ្ទះសម្រាប់រស់នៅ។ យើងមិនអាចប្រើការដឹងគុណ [ចំពោះការងាររបស់គាត់] ដើម្បីអនុញ្ញាតឱ្យគាត់យកដីសាលាបណ្តុះបណ្តាលមកធ្វើជាកម្មសិទ្ធិរបស់គាត់
ឡើយ»។
លោក ម៉ែន គុង នាយករងរដ្ឋបាលខេត្តស្ទឹងត្រែង មានប្រសាសន៍ថា វិវាទដីធ្លីនៅសាលាបណ្តុះបណ្តាលនោះបានកើតឡើងតាំងពីឆ្នាំ២០១៣។ លោកនិយាយថា លោក យស ផន មានបណ្ណកម្មសិទ្ធិដីនេះ ប៉ុន្តែបណ្ណកម្មសិទ្ធិនោះត្រូវបានធ្វើនៅក្រោយកាលបរិច្ឆេទដែលបានចុះនៅលើ
បណ្ណកម្មសិទ្ធិដីរបស់សាលាបណ្តុះបណ្តាល ដែលធ្វើឱ្យប៉ះពាល់ដល់សេចក្តីសម្រេចផ្នែករដ្ឋបាល ឬសេចក្តីសម្រេចរបស់តុលាការ។
លោក ម៉ែន គុង បានមានប្រសាសន៍ថា៖ «បញ្ហានេះនៅតែជាប់គាំង និងនៅតែបន្ត ពីព្រោះសេចក្តីសម្រេចកាលពីមុនរបស់តុលាការ […] បានរកឃើញឯកសារមួយចំនួនដែលពាក់ព័ន្ធនឹងដីនេះ ក្នុងបណ្ណកម្មសិទ្ធិដីរបស់សាលាបណ្តុះបណ្តាលភូមិភាគ១ ដោយបន្ថែមថា បញ្ហានេះទាមទារឱ្យមានការស៊ើបអង្កេតបន្ថែម»៕
បកប្រែ និងសម្រួលចេញពីអត្ថបទដើមភាសាអង់គ្លេស៖ Sar Kheng Warns Police Instructor to Return Land to Training School
