សមត្ថកិច្ចបានជួយសង្គ្រោះមនុស្ស២នាក់ទៀតពីទីតាំងមួយនៅខេត្តព្រះសីហនុ ដោយមិនបានបញ្ជាក់ពីទីតាំងច្បាស់លាស់ឡើយ និងបដិសេធថាករណីនេះមិនមែនជាការបង្ខាំងមនុស្សទុកឡើយ។
សមត្ថកិច្ចកម្ពុជាបាននិងកំពុងបើកប្រតិបត្តិការជួយសង្គ្រោះជនរងគ្រោះពីការជួញដូរកម្លាំងពលកម្មស្ទើររាល់ថ្ងៃ ខណៈសហគមន៍អន្តរជាតិកំពុងតែឃ្លាំមើលយ៉ាងយកចិត្តទុកដាក់ ចំពោះស្ថានភាពនៃពលករបរទេសរាប់ពាន់នាក់ដែលបានជាប់នៅក្នុងទីតាំងប្រព្រឹត្តអំពើឆបោក ដែលគ្រប់គ្រងដោយក្រុមឧក្រិដ្ឋកម្មដែលមានការរៀបចំ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍នៅថ្ងៃទី៣០ ខែសីហា ឆ្នាំ២០២២ ថាតាមរយៈខ្សែទូរសព្ទបន្ទាន់របស់ក្រសួង អាជ្ញាធរបានស៊ើបអង្កេតទីតាំងឆបោកមួយកន្លែងផ្សេងទៀត កាលពីថ្ងៃទី២៨ ខែសីហា ឆ្នាំ២០២២។ លោកបន្តថា អាជ្ញាធរបានជួយសង្រ្គោះជនជាតិចិន២នាក់ ក្នុងនោះ ម្នាក់មានអាយុ២៨ឆ្នាំ និងម្នាក់ទៀតមានអាយុ៣១ឆ្នាំ ពីកន្លែងធ្វើការរបស់ពួកគេ។ លោកបន្ថែមថា អ្នកគ្រប់គ្រងជនជាតិចិនម្នាក់នៅទីតាំងនោះ ក៏ត្រូវបានឃាត់ខ្លួនដើម្បីសួរនាំផងដែរ។
លោក ខៀវ សុភ័គ បាននិយាយថា៖ «ពួកគេថាមិនមានការបង្ខាំងមនុស្សទុកទេ។ ពួកគេធ្វើការធម្មតានៅក្នុងក្រុមហ៊ុន។ ពួកគេចង់ឈប់ពីការងារ ដោយសារលក្ខខណ្ឌការងារតឹងរ៉ឹង ហើយពួកគេចង់ត្រលប់ទៅប្រទេសកំណើតរបស់ពួកគេវិញ»។
បើទោះបីជារដ្ឋមន្ត្រីក្រសួងមហាផ្ទៃ លោក ស ខេង ទទួលស្គាល់ថាមានការជួញដូរពលករបរទេស «ដោយអមនុស្សធម៌» ក៏ដោយ ក៏មន្ត្រីនគរបាលនៅតែបន្តនិយាយសម្រាលពីស្ថានភាពនៃពលកម្មដោយបង្ខំ។
ដោយឡែក លោក ថេង កុសល មេប៉ុស្ត៍នគរបាលសង្កាត់ចោមចៅទី៣ រាជធានីភ្នំពេញ បានឱ្យដឹងថា កាលពីថ្ងៃទី២៩ ខែសីហា ឆ្នាំ២០២២ សមត្ថកិច្ចបានឃាត់រថយន្តមួយគ្រឿងដែលដឹកបុរសជនជាតិចិនចំនួន៣នាក់ និងបុរសម៉ាឡេស៊ីម្នាក់ ពីក្រុងព្រះសីហនុ មកកាន់អាកាសយានដ្ឋានអន្តរជាតិភ្នំពេញ តាមសំណើរបស់នាយកដ្ឋានប្រឆាំងភេរវកម្ម។
លោក កុសល បន្តថា៖ «ពួកគេមកតាមផ្លូវជាតិលេខ៤ ហើយយើងបានសហការជាមួយនគរបាលចរាចរណ៍រាជធានីភ្នំពេញ ដើម្បីឃាត់រថយន្តពួកគេ។ មន្ត្រីជំនាញក្រសួងមហាផ្ទៃ បានមកយកពួកគេ»។
លោកបន្ថែមថា អ្នកបើករថយន្តជាជនជាតិខ្មែរ មិនបានដឹងពីស្ថានភាពអ្នកដំណើររបស់ខ្លួនឡើយ។ ម្យ៉ាងវិញទៀត លោកថា ខាងសង្កាត់ក៏មិនអាចទាក់ទងជាមួយជនបរទេសដែលត្រូវបានចាប់ខ្លួនទាំង៤នាក់បានដែរ។ លោកមិនបានដឹងព័ត៌មានលម្អិតអំពីករណីនេះទេ។
លោក អ៊ី សុខឃី អគ្គស្នងការរងនគរបាលជាតិ បានបដិសេធមិនធ្វើអត្ថាធិប្បាយ និងបង្វែរសំណួរទៅប្រធាននាយកដ្ឋានស៊ើបការណ៍សម្ងាត់ ប៉ុន្តែមិនអាចទាក់ទងបានឡើយ។
ចំណែកបុរសម្នាក់ដែលបានលើកទូរសព្ទរបស់លោក ហ៊ុន សំណាង ប្រធាននាយកដ្ឋានប្រឆាំងភេរវកម្ម បានបដិសេធថា គាត់មិនមែនជាលោក ហ៊ុន សំណាង ទេ៕
បកប្រែ និងសម្រួលចេញពីអត្ថបទដើមភាសាអង់គ្លេស៖ More Trafficking ‘Hotline’ Rescues, More Denial About Detention