តៃវ៉ាន់បានឱ្យដឹងនៅថ្ងៃពុធនេះថា ខ្លួននឹងអនុវត្តសិទ្ធិរបស់ខ្លួនក្នុងការការពារ និងវាយប្រហារតបតវិញ ប្រសិនបើកងកម្លាំងប្រដាប់អាវុធចិនឈ្លានពានចូលទៅក្នុងទឹកដីរបស់ខ្លួន។
ក្នុងសន្និសីទសារព័ត៌មានមួយ លោក Lin Wen-huang ប្រធាននាយកដ្ឋានប្រតិបត្តិការរួម នៃក្រសួងការពារជាតិតៃវ៉ាន់ ត្រូវបានទីភ្នាក់ងារសារព័ត៌មាន Reuters ស្រង់សម្ដីមកផ្សព្វផ្សាយថា៖ «ក្នុងករណីមានយន្តហោះ និងនាវាដែលបានចូលដែនសមុទ្រ និងដែនអាកាសរបស់យើង កងទ័ពជាតិនឹងអនុវត្តសិទ្ធិដើម្បីការពារខ្លួន និងការវាយប្រហារតបវិញដោយគ្មានការលើកលែងឡើយ»។
យោធាចិនក្នុងរយៈពេលចុងក្រោយនេះ ត្រូវបានសង្កេតឃើញថាមានការធ្វើសមយុទ្ធរបស់ខ្លួនជាច្រើននៅជិតកោះតៃវ៉ាន់ ដែលធ្វើឡើងបន្ទាប់ពីដំណើរទស្សនកិច្ចរបស់ប្រធានរដ្ឋសភាសហរដ្ឋអាមេរិក លោកស្រី ណានស៊ី ផេឡូស៊ី (Nancy Pelosi) ទៅកាន់ដែនកោះមួយនេះ។
ទាក់ទិននឹងករណីនេះ សហរដ្ឋអាមេរិកក៏ធ្លាប់បានជំរុញប្រទេសចិនកុំឱ្យមានប្រតិកម្មខ្លាំងលើសលុបចំពោះដំណើរទស្សនកិច្ចមួយនេះផងដែរ ដោយថា វាអាចនឹងធ្វើឱ្យស្ថានការណ៍កាន់តែតានតឹងបន្ថែមទៀត ខណៈក្រសួងការពារជាតិរបស់តៃវ៉ាន់ក៏ធ្លាប់បានអះអាងថា ខ្លួននឹងបន្តពង្រឹងការការពាររបស់ខ្លួន ដើម្បីធានាឱ្យបានថាគ្មាននរណាម្នាក់អាចបង្ខំឱ្យកោះនេះទទួលយកផ្លូវដែលចិនបានរៀបចំដោយមិនផ្តល់សេរីភាព និងប្រជាធិបតេយ្យនោះទេ៕