ប្រភពមួយបានឱ្យដឹងថា អតីតមេដឹកនាំមីយ៉ាន់ម៉ាដែលត្រូវបានទម្លាក់ពីតំណែង លោកស្រី អ៊ុងសាន ស៊ូជី នៅថ្ងៃសុក្រនេះ ត្រូវបានតុលាការកាត់ទោសឱ្យជាប់ពន្ធនាគាររយៈពេល៣ឆ្នាំបន្ថែមទៀត ក្រោយរកឃើញថា លោកស្រីមានទោសពីបទក្លែងបន្លំលទ្ធផលការបោះឆ្នោតដែលប្រព្រឹត្តក្នុងឆ្នាំ២០២០កន្លងទៅ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទាក់ទិននឹងករណីនេះ យោធាមីយ៉ាន់ម៉ាធ្លាប់បានលើកឡើងកាលពីពេលកន្លងទៅថា ការដែលខ្លួនសម្រេចចោទបទនេះឡើង គឺដោយសារតែជ័យជម្នះកាលពីពេលកន្លងទៅរបស់គណបក្សសម្ព័ន្ធជាតិដើម្បីលទ្ធិប្រជាធិបតេយ្យ (NLD) របស់លោកស្រី អ៊ុងសាន ស៊ូជី គឺផ្អែកលើការបោះឆ្នោតដែលបានរៀបចំទុក បើទោះបីជាគណបក្សនេះបានច្រានចោលបទចោទ និងថ្លែងអះអាងថា ជ័យជម្នះដែលខ្លួនទទួលបាននៅពេលនោះ គឺដោយយុត្តិធម៌ និងត្រឹមត្រូវយ៉ាងណាក្ដី។
គិតរហូតមកដល់ពេលបច្ចុប្បន្ន ម្ចាស់ពានរង្វាន់ណូបែលសន្តិភាពរូបនេះ ត្រូវបានតុលាការចោទប្រកាន់ពីបទប្រព្រឹត្តបទល្មើសប្រមាណជា២០ករណីហើយ ដែលក្នុងនោះរួមមាន ការនាំចូលអាយកូមដោយខុសច្បាប់ បទរំលោភវិធានការទប់ស្កាត់វិបត្តិកូវីដ-១៩ បទទទួលសំណូក រំលោភការសម្ងាត់រដ្ឋ រួមនឹងបទចោទធ្ងន់ធ្ងរមួយចំនួនទៀត ដែលអាចនឹងជាប់ពន្ធនាគារសរុបរហូតដល់រយៈពេលប្រមាណជា១៩០ឆ្នាំ បើតុលាការកឃើញថា លោកស្រីមានកំហុសក្នុងសំណុំរឿងទាំងនេះ។
ប្រទេសមីយ៉ាន់ម៉ាបានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងកាលពីថ្ងៃទី១ ខែកុម្ភៈ ឆ្នាំមុន និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះជនស៊ីវិលរាប់ពាន់នាក់ក៏ត្រូវបានសម្លាប់នៅក្នុងការបង្ក្រាបកូដកម្មនិងបាតុកម្មនានាផងដែរ៕
