សមត្ថកិច្ចបានឱ្យដឹងថា ព្រះរាជអាជ្ញាបានចោទប្រកាន់ជាបណ្ដោះអាសន្នទៅលើជនសង្ស័យជនជាតិចិននិងខ្មែរចំនួន៦នាក់ ពីបទជួញដូរមនុស្ស ជាផ្នែកមួយនៃការបង្ក្រាបដែលបានជួយសង្គ្រោះជនរងគ្រោះជាង១០០នាក់ ក្នុងរយៈពេល១២ថ្ងៃ និងបានរកឃើញដំបងឆក់ និងខ្នោះដៃនៅទីតាំងមួយក្នុងក្រុងព្រះសីហនុ។
ការបន្ទាបចំណាត់ថ្នាក់នៅក្នុងរបាយការណ៍ស្ដីពីការជួញដូរមនុស្សរបស់សហរដ្ឋអាមេរិក និងការប្រឈមមុខនឹងសម្ពាធអន្តរជាតិកាន់តែខ្លាំង ខណៈអាជ្ញាធរកម្ពុជាបានផ្សព្វផ្សាយជាសាធារណៈអំពីការចាប់ខ្លួន និងការជួយសង្គ្រោះបន្ថែមទៀតពីទីតាំងការងារដោយបង្ខំ ដែលភាគច្រើននៅក្នុងក្រុងព្រះសីហនុ បើទោះបីជាកន្លងមកពួកគេបាននិយាយសម្រាលអំពីប្រតិបត្តិការឆបោកជាសកលនៅក្នុងទីតាំងទាំងនោះក៏ដោយ។
ព្រះរាជអាជ្ញារងអមសាលាដំបូងខេត្តព្រះសីហនុ លោក ហួត វិចិត្រ បាននិយាយកាលពីថ្ងៃទី១ ខែកញ្ញា ឆ្នាំ២០២២ ថាជាផ្នែកមួយនៃការបង្រ្កាបនាពេលថ្មីៗនេះ ជនសង្ស័យចំនួន៦នាក់ត្រូវបានចោទប្រកាន់បណ្ដោះអាសន្នពីបទ«ជួញដូរមនុស្សឆ្លងដែន»។
ពួកគេត្រូវបានចាប់ខ្លួនកាលពីថ្ងៃទី២៦ ខែសីហា ឆ្នាំ២០២២ បន្ទាប់ពីជនរងគ្រោះដាក់ពាក្យបណ្ដឹងទៅរដ្ឋមន្ត្រីក្រសួងមហាផ្ទៃ លោក ស ខេង។ ពួកគេត្រូវបានចោទប្រកាន់ពីបទនាំមនុស្សពីប្រទេសចិនមកខេត្តព្រះសីហនុតាមផ្លូវទឹក។ ក្រសួងមហាផ្ទៃបាននិយាយថា ជនជាតិចិនចំនួន៣៥នាក់ត្រូវបានរត់ពន្ធតាមទឹក ទៅអគារ Li Sheng ក្នុងសង្កាត់លេខ៤។
ជនសង្ស័យទាំង៦នាក់នោះ រួមមាន ឈ្មោះ ហ៊្សា ជុនហ៊ៅ (Xia Junhao) អាយុ២០ឆ្នាំ ជាអ្នកគ្រប់គ្រង, សន ពិសិដ្ឋ អាយុ៤៣ឆ្នាំ ជាអ្នកបើកបរ និងអង្គរក្ស, លូ ហ្ស៊ីនយូ (Lu Xinyou) អាយុ៣៦ឆ្នាំ ជាប្រធានផ្នែកចាត់ចែងលក់, ហ្សាង យ៉ុង (Zhang Yong) អាយុ២៦ឆ្នាំ ជាប្រធានផ្នែកចាត់ចែងលក់, ម៉ូ ហ្សេងយុន (Mo Zhengyun) អាយុ១៩ឆ្នាំ ជាចុងភៅ, និង គី វង្ស (Ky Vong) អាយុ៣១ឆ្នាំ ជាអ្នកបើកបរ។
លោក ហួត វិចិត្រ បន្តថា ចៅក្រមស៊ើបសួរកំពុងបន្តនីតិវិធីបន្តក្នុងសំណុំរឿងនេះ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា អាជ្ញាធរបានចាត់វិធានការលើបណ្ដឹងចំនួន៤០ និងជួយសង្គ្រោះជនរងគ្រោះបានជាង១០០នាក់ កាលពីថ្ងៃទី១៨ ដល់ថ្ងៃទី២៩ ខែសីហា ឆ្នាំ២០២២។ លោកថា ក្នុងចំណោមជនរងគ្រោះទាំងនេះ មានជនជាតិអាមេរិកម្នាក់ ខ្មែរ-អាមេរិកាំងម្នាក់ ឥណ្ឌូនេស៊ី២នាក់ ចិន៣៨នាក់ ម៉ាឡេស៊ី៥៣នាក់ វៀតណាម៥នាក់ និងតៃវ៉ាន់៣នាក់។
លោក ខៀវ សុភ័គ បន្ថែមថា កាលពីរសៀលថ្ងៃទី៣០ ខែសីហា ឆ្នាំ២០២២ ជនជាតិចិនម្នាក់អាយុ២៨ឆ្នាំ ដែលត្រូវបានបង្ខាំងឱ្យធ្វើការនៅសង្កាត់លេខ៤ ត្រូវបានជួយសង្គ្រោះ ហើយអ្នកគ្រប់គ្រងជាជនជាតិចិនត្រូវបាននាំខ្លួនមកសាកសួរ។
កាលពីថ្ងៃទី៣១ ខែសីហា ឆ្នាំ២០២២ ស្ត្រីជនជាតិចិនម្នាក់ អាយុ២៤ឆ្នាំ ត្រូវបានជួយសង្គ្រោះ ហើយអ្នកគ្រប់គ្រងក៏ត្រូវបានចាប់ខ្លួនផងដែរ។
លោកបានរៀបរាប់ពីប្រតិបត្តិការ៣ផ្សេងទៀត កាលពីថ្ងៃទី៣១ ខែសីហា ឆ្នាំ២០២២ ថាបុរសជនជាតិចិនចំនួន២នាក់ត្រូវបានជួយសង្គ្រោះពីកាស៊ីណូ Oscar នៅសង្កាត់លេខ៤, ស្ត្រីម្នាក់នៅសង្កាត់លេខ១ ដែលត្រូវបានបញ្ជូនទៅកាន់ទីតាំងផ្សេង ត្រូវបានបញ្ជូនមកវិញតាមបញ្ជារបស់នគរបាល រួមជាមួយនឹងមិត្តប្រុសរបស់នាង និងបុរសជនជាតិម៉ាឡេស៊ីម្នាក់ អាយុ៣៨ឆ្នាំ ត្រូវបានជួយសង្គ្រោះពីសណ្ឋាគារ Jing Chai Ou ក្នុងសង្កាត់លេខ១ កន្លែងដែលដំបងឆក់និងខ្នោះដៃពីរគូត្រូវបានរកឃើញនៅជាន់ទី៧៕
បកប្រែ និងសម្រួលចេញពីអត្ថបទដើមភាសាអង់គ្លេស៖ Six Charged, 100 Rescued in Human Trafficking Crackdown
