មន្ត្រីមន្ទីរបរិស្ថានកំពុងសាកសួរបុរស២នាក់ ក្រោយប្រើកាំភ្លើងបាញ់សម្លាប់សត្វព្រៃ នៅឃុំជីផាត ស្រុកថ្មបាំង ខេត្តកោះកុង ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធី។
ប្រធានមន្ទីរបរិស្ថានខេត្តកោះកុង លោក ហ៊ុន ម៉ារ៉ាឌី ប្រាប់វីអូឌីនៅថ្ងៃទី៧ ខែកញ្ញា ថាកាលពីយប់រំលងអធ្រាត្រ ថ្ងៃទី៦ ខែកញ្ញា ឆ្នាំ២០២២ មន្ត្រីបរិស្ថានខេត្ត សហការជាមួយកម្លាំងកងរាជអាវុធហត្ថ និងកម្លាំងអង្គការសម័្ពន្ធមិត្តសត្វព្រៃ បានឃាត់ខ្លួនបុរស២នាក់ជាជនសង្ស័យ ក្រោយពួកគេប្រើប្រាស់កាំភ្លើងបាញ់សត្វព្រៃ។
ប៉ុន្តែពេលដែលវីអូឌីសួរថា តើអ្នកដែលប្រើកាំភ្លើងបាញ់សត្វព្រៃនោះជាពលរដ្ឋធម្មតា ឬជាមន្ត្រីរាជការ ហើយកាំភ្លើងដែលពួកគេប្រើប្រាស់ត្រូវច្បាប់ឬខុសច្បាប់ គឺលោក ហ៊ុន ម៉ារ៉ាឌី មិនទាន់អាចបញ្ជាក់បានទេ ដោយថា កំពុងដំណើរការសាកសួរជុំវិញរឿងនេះនៅឡើយ។
លោកបន្ថែមថា៖ «ករណីឃាត់ខ្លួនមនុស្ស២នាក់ហ្នឹងមែន ប៉ុន្តែគ្រាន់តែឥលូវនេះ កំពុងស្ថិតនៅក្នុងនីតិវិធីដែលពួកខ្ញុំកំពុងធ្វើកិច្ចការងារ ហើយកំពុងស្ដាប់ចម្លើយរបស់ពួកសិន ទើបយើងបញ្ជូនទៅតុលាការ។ ពួកគាត់បានបាញ់សម្លាប់សត្វប្រើសមួយក្បាល សំពោចមួយក្បាល និងមានសាច់ឈ្លូសខ្លះ»។
បើតាមការស្រង់សម្តីសមត្ថកិច្ចយកមកចុះផ្សាយតាមបណ្តាញសង្គមហ្វេសប៊ុក កាលពីល្ងាចថ្ងៃទី៦ ខែកញ្ញា គឺសមត្ថកិច្ចបានឃាត់ខ្លួនមនុស្ស២នាក់ ដោយម្នាក់ឈ្មោះ ស្រី វាសនា អាយុ៣៥ឆ្នាំ មានទីលំនៅនៅភូមិអូរដឹម សង្កាត់ចោមចៅ ខណ្ឌសែនសុខ រាជធានីភ្នំពេញ និងម្នាក់ទៀតឈ្មោះ ហុង រ័ត្នមុនី អាយុ២៩ឆ្នាំ មានទីលំនៅនៅសង្កាត់ទឹកល្អក់១ ខណ្ឌទួលគោក រាជធានីភ្នំពេញ។
បើតាមរូបភាព វត្ថុតាងដែលសមត្ថកិច្ចចាប់បាន រួមមាន រថយន្តទំនើបម៉ាកហ្វត ពាក់ស្លាកលេខ «២-៤៧៩៣ ខេមរភូមិន្ទ២» ចំនួន១គ្រឿង, សត្វប្រើស ១ក្បាល, សំពោច ១ក្បាល, សាច់ឈ្លូសមួយស្បោង និងកាំភ្លើងចំនួន៥ដើម ក្នុងនោះកាំភ្លើងវែងសម្រាប់បាញ់សត្វ២ដើម កាំភ្លើងខ្លី៣ដើម និងគ្រាប់ចំនួន៥៩គ្រាប់។
កាលពីថ្ងៃទី៥ ខែកញ្ញា ឆ្នាំ២០២២ រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្រ្តា បានសរសេរលើហ្វេសប៊ុករបស់លោក ដោយប្រាប់ដល់ម្ចាស់ទំព័រហ្វេសប៊ុក Kaa Official បញ្ឈប់ការផ្សព្វផ្សាយការធ្វើមុខម្ហូបពីសាច់សត្វព្រៃជាបន្ទាន់។
លោក នេត្រ ភក្រ្តា បញ្ជាក់ថា បើយោងតាមវីដេអូដែលហ្វេសប៊ុក Kaa Official បានផ្សព្វផ្សាយនោះ គឺបានយក «សត្វក្ដាន់ញ៉ែង» ដែលជាសត្វព្រៃកម្រមកធ្វើជាម្ហូប។ លោកថា សត្វក្តាន់ញ៉ែង ជាសត្វព្រៃដែលត្រូវអភិរក្ស ហើយបច្ចុប្បន្ននេះ ក្រសួងបរិស្ថានកំពុងដឹកនាំការធ្វើ «យុទ្ធនាការអន្ទាក់សូន្យ» ដើម្បីបញ្ឈប់ការបរបាញ់ ការដាក់អន្ទាក់ចាប់សត្វព្រៃគ្រប់ប្រភេទ ការផ្លាស់ប្តូរឥរិយាបថជនមួយចំនួនដែលនិយមហូបសាច់សត្វព្រៃ ឱ្យងាកមកចូលរួមការពារអភិរក្សសត្វព្រៃ និងផ្តល់ជម្រកសុវត្ថិភាពដល់សត្វព្រៃ។
អ្នកនាំពាក្យរូបនេះបន្ថែមថា ការបង្ហោះមុខម្ហូបធ្វើពីសាច់សត្វព្រៃជាទង្វើអសីលធម៌ និងជាការបំពានច្បាប់ ហើយបានអំពាវនាវឱ្យបញ្ឈប់ទង្វើទាំងនេះ និងលុបចោលវីដេអូដែលបានផ្សព្វផ្សាយចោលផងដែរ។
លោកបន្ថែមថា៖ «សូមបញ្ឈប់សកម្មភាពនេះជាបន្ទាន់ ព្រោះពលរដ្ឋភាគច្រើនលើសលុប សូម្បីក្នុងវីដេអូដែលផុស បងប្អូនប្រជាពលរដ្ឋទាំងអស់មានការយល់ដឹង និងចូលរួមថែរក្សាសត្វព្រៃ។ សូមបញ្ឈប់សកម្មភាពនេះ ព្រោះមនុស្សទូទៅមិនគាំទ្រ និងមិនកោតសរសើរនូវទង្វើខ្វះទទួលខុសត្រូវនេះឡើយ និងបានក្លាយជាជនចម្លែកតែឯង»។
ក្រោយប្រកាសរបស់លោក នេត្រ ភក្រ្តា មួយថ្ងៃ ម្ចាស់ហ្វេសប៊ុកឈ្មោះ Kaa Official បានទទួលស្គាល់កំហុស ដោយស្ម័គ្រចិត្តលុបវីដេអូចេញពីហ្វេសប៊ុករបស់ខ្លួន ហើយបានចុះកិច្ចសន្យាបញ្ឈប់ការយកសាច់សត្វព្រៃធ្វើជាម្ហូប និងឈប់ហូបសាច់សត្វព្រៃ រួមទាំងកិច្ចសន្យាផ្សេងទៀត បន្ទាប់ពីសមត្ថកិច្ច និងរដ្ឋបាលស្រុកកំពង់ត្រាច ខេត្តកំពត ចាត់វិធានការអប់រំ។
ប្រធានកម្មវិធីផ្នែកស្រាវជ្រាវ និងតស៊ូមតិ នៃសមាគមបណ្ដាញយុវជនកម្ពុជា លោក ហេង គឹមហុង សាទរចំពោះវិធានការនានារបស់សមត្ថកិច្ច ពាក់ព័ន្ធទៅលើជនសម្លាប់សត្វព្រៃ ប៉ុន្តែលោកជំរុញឱ្យមានវិធានការច្បាប់តឹងរ៉ឹងជាងនេះបន្ថែមទៀត ខណៈការចាប់សត្វព្រៃ និងផ្សព្វផ្សាយលក់សាច់សត្វព្រៃ នៅតែបន្តកើតមានជាហូរហែ។
មន្ត្រីសង្គមស៊ីវិលផ្នែកបរិស្ថាន និងព្រៃឈើរូបនេះ ក៏ស្នើឱ្យមានការស៊ើបអង្កេតតាមភោជនីយដ្ឋានមួយចំនួននៅខេត្តជាប់តំបន់ការពារ ជាពិសេសខេត្តក្រចេះ ព្រះវិហារ កោះកុង និងខេត្តផ្សេងទៀត ដោយថា កន្លងមក មានភោជនីយដ្ឋានខ្លះបានផ្សព្វផ្សាយលក់មុខម្ហូបសាច់សត្វព្រៃ។
លោកបន្ថែមថា៖ «បើគ្រាន់តែធ្វើកិច្ចសន្យា នេះគឺជាករណីមួយធូររលុងមែនទែន ហើយផ្ទុយទាំងស្រុងនៃខ្លឹមសារច្បាប់ ហើយក៏លើកទឹកចិត្តដល់អ្នកបរបាញ់សត្វហ្នឹងរួចផុតពីសំណាញ់ច្បាប់ និងនៅតែបន្តបរបាញ់សត្វដោយខុសច្បាប់ដដែល។ អ៊ីចឹងរដ្ឋាភិបាល ជាពិសេសអាជ្ញាធរមានសមត្ថកិច្ច ត្រូវមានវិធានការតឹងរ៉ឹង ឬឃាត់ខ្លួនចំពោះជនទាំងឡាយណាដែលបរិភោគសត្វព្រៃ និងបរបាញ់សត្វព្រៃដោយខុសច្បាប់ ឱ្យពួកគេទទួលខុសត្រូវចំពោះមុខច្បាប់។ បើសិនជាលក្ខណៈវិនិច្ឆយនៃទោសត្រូវកំណត់ឱ្យជាប់ពន្ធធនាគារ គួរតែមានភាពតឹងរ៉ឹងក្នុងការដាក់ទណ្ឌកម្មបែបនេះដែរ ដើម្បីព្រមានដល់ប្រជាពលរដ្ឋផ្សេងទៀត[ដែល]ហ៊ានទៅបរបាញ់ និងទិញសត្វព្រៃមកហូប»។
ក្រសួងបរិស្ថាន សង្គមស៊ីវិល និងអាជ្ញាធរពាក់ព័ន្ធ កំពុងធ្វើយុទ្ធនាការ «អន្ទាក់សូន្យ» ដោយបានដាក់ចេញនូវវិធានការបន្ទាន់នានា ដើម្បីបង្កើនការពង្រឹងការអនុវត្តច្បាប់ និងពិនិត្យមើលបទប្បញ្ញត្តិពាក់ព័ន្ធ ក្នុងគោលបំណងទប់ស្កាត់ការបរបាញ់សត្វព្រៃខុសច្បាប់ និងបញ្ចប់វិបត្តិអន្ទាក់ ដែលកំពុងគំរាមកំហែងដល់ជីវិតសត្វព្រៃនៅកម្ពុជា។
ក្នុងឆ្នាំ២០២១ ក្រសួងបរិស្ថាន និងស្ថាប័នអង្គការដៃគូរបស់ខ្លួន បានដកអន្ទាក់សរុបជាង៦ម៉ឺនអន្ទាក់ (៦១ ៦១១) ចេញពីតំបន់ការពារធម្មជាតិ ចំនួន៧២ និងច្រករបៀងជីវចម្រុះផ្សេងៗទៀតក្នុងប្រទេសកម្ពុជា។ ជាមធ្យម ក្នុងមួយឆ្នាំ មានអន្ទាក់សរុបចំនួនប្រមាណ ៤០ ០០០ ត្រូវបានដកចេញពីតំបន់ការពារធម្មជាតិទាំងនោះ។
បើតាមលោក នេត្រ ភក្ត្រា ក្នុងឆ្នាំ២០២១ ក្រុមសង្គ្រោះសត្វព្រៃបន្ទាន់មកពីអង្គភាពចម្រុះ បានចុះប្រតិបត្តិការបង្ក្រាបការជួញដូរសត្វព្រៃចំនួន៦២៥ករណី សង្គ្រោះសត្វព្រៃបាន១ ២៧១ក្បាល រឹបអូសសាច់សត្វព្រៃចំនួន៣ ៦០៩ក្បាល និងរឹបអូសសាច់សត្វព្រៃគ្រប់ប្រភេទបានចំនួន៣៥៤គីឡូក្រាម បញ្ជូនសំណុំរឿងចំនួន១១ទៅតុលាការ និងបានដោះលែងសត្វព្រៃចូលទៅព្រៃធម្មជាតិវិញចំនួន៨៦៤ក្បាល៕
