ប្រជាពលរដ្ឋជាង១៥០គ្រួសារ នៅឃុំម៉ឺនជ័យ ស្រុករំដួល ខេត្តស្វាយរៀង ស្នើអាជ្ញាធរឃុំជួយដោះស្រាយបញ្ហាដីធ្លី ក្រោយពីពួកគេអះអាងថាបានរងផលប៉ះពាល់ដោយគម្រោងអភិវឌ្ឍន៍ប្រឡាយទឹករបស់ក្រសួងធនធានទឹក និងឧតុនិយម នៅតំបន់នោះ។
លោក ស៊ិន សាម៉េត ប្រជាពលរដ្ឋរស់នៅភូមិហែកសំណាញ់ ឃុំម៉ឺនជ័យ ប្រាប់វីអូឌីថា ពលរដ្ឋជិត១០០នាក់ តំណាងឱ្យ១៥២គ្រួសារ នៅឃុំម៉ឺនជ័យ និងឃុំធ្មា បាននាំគ្នាប្រមូលផ្ដុំនៅមុខសាលាឃុំម៉ឺនជ័យ នៅថ្ងៃពុធនេះ ដើម្បីសុំឱ្យអាជ្ញាធរឃុំជួយដោះស្រាយដីធ្លី ក្រោយពីក្រសួងធនធានទឹក និងឧតុនិយម ឈូសឆាយសាងសង់ប្រឡាយទឹក ធ្វើឱ្យប៉ះពាល់ដល់ដីធ្លី និងលំនៅឋានរបស់ពួកគាត់។
ពលរដ្ឋរូបនេះ ឱ្យដឹងថា កាលពីឆ្នាំ២០១៣ ក្រសួងធនធានទឹក បានប្រើគ្រឿងចក្រកាយប្រឡាយទឹក ដោយធ្វើឱ្យប៉ះពាល់ដល់ដីស្រែ២៦ហិកតា ដីលំនៅឋាន៨ហិកតា និងផ្ទះ៤៦ខ្នងរបស់ប្រជាពលរដ្ឋ ហើយមិនបានដោះស្រាយសំណងណាមួយជូនពលរដ្ឋឡើយ។
លោក ស៊ិន សាម៉េត បន្តថា ក្រោមគម្រោងអភិវឌ្ឍន៍ប្រឡាយទឹករបស់ក្រសួង បានធ្វើឱ្យប្រជាពលរដ្ឋជួបបញ្ហាក្នុងជីវភាព ជំពាក់បំណុលធនាគារ និងចំណាកស្រុក ជាដើម ដោយសារគ្មានដីសម្រាប់បង្កបង្កើនផល និងបាត់បង់ផ្ទះសម្បែង។ លោកថា ដីលំនៅឋានទំហំ៦២៥ម៉ែត្រការ៉េ និងផ្ទះទំហំ៧ម៉ែត្រគុណ៨ម៉ែត្ររបស់លោក បានរងផលប៉ះពាល់ទាំងស្រុង។
លោកបន្ថែមថា៖ «តាំងពីមានការប៉ះពាល់ដីធ្លីប្រជាពលរដ្ឋមក គឺប្រជាពលរដ្ឋចាប់ផ្តើមជំពាក់លុយធនាគារ និងខ្វះស្បៀងអាហារ ព្រោះប្រជាពលរដ្ឋនៅខេត្តស្វាយរៀង មានដីធ្លីតែបន្តិចបន្តួចប៉ុណ្ណោះក្នុងមួយគ្រួសារ សម្រាប់សង់លំនៅឋាន និងធ្វើកសិកម្ម។ បើរដ្ឋមិនគិតគូរដោះស្រាយជូនពលរដ្ឋទេ តើប្រជាពលរដ្ឋបានអីហូប? អ៊ីចឹងពួកគាត់មានតែនាំគ្នាចំណាកស្រុក»។
ពលរដ្ឋនៅឃុំម៉ឺនជ័យម្នាក់ទៀត អ្នកស្រី ផាត់ សាវ៉ន និយាយថា ក្រោមគម្រោងអភិវឌ្ឍន៍ប្រឡាយទឹករបស់ក្រសួង បានធ្វើឱ្យប៉ះពាល់ដល់ដីលំនៅឋាន ដីស្រែ និងផលដំណាំរបស់ប្រជាពលរដ្ឋ ខណៈដីលំនៅឋានរបស់អ្នកស្រីជាង៣០០ម៉ែត្រការ៉េ និងផលដំណាំហូបផ្លែត្រូវឈូសឆាយចោលទាំងស្រុង។ ពលរដ្ឋរូបនេះបានទាមទារទៅអាជ្ញាធរពាក់ព័ន្ធឱ្យជួយដោះស្រាយទៅតាមស្ថានភាពជាក់ស្តែង និងតាមតម្លៃទីផ្សារដីនៅតំបន់នោះបច្ចុប្បន្ន។
អ្នកស្រីបន្ថែមថា៖ «ប៉ះពាល់ដំណាំហូបផ្លែគ្រប់យ៉ាងទាំងអស់ តាំងពីដូង ខ្នុរ ស្វាយ ចេក ម៉ាចប់! មិនផ្តល់សំណងអីឱ្យ ចេះតែឈូសចោលៗទាំងអស់ សុំឱ្យទុកអណ្តូងទឹកមួយសម្រាប់ប្រើប្រាស់ ក៏មិនបានផង។ អ្នកខ្លះអស់ផ្ទះ អ្នកខ្លះអស់ដីស្រែ អ្នកខ្លះអស់ដីភូមិ ពួកខ្ញុំរងទុក្ខលំបាកវេទនាខ្លាំងណាស់»។
មេឃុំម៉ឺនជ័យ លោក មៃ រឿន មានប្រសាសន៍ថា តាមគោលការណ៍ គម្រោងអភិវឌ្ឍន៍ប្រឡាយរបស់ក្រសួងធនធានទឹក គឺគ្មានការដោះស្រាយសំណងផលប៉ះពាល់ឡើយ។ យ៉ាងណា លោកថា សំណើសុំដោះស្រាយសំណងរបស់ប្រជាពលរដ្ឋនៅព្រឹកមិញនេះ មន្ត្រីរដ្ឋបាលឃុំបានបញ្ជូនទៅរដ្ឋបាលស្រុកហើយ ដោយសារអាជ្ញាធរឃុំគ្មានលទ្ធភាពក្នុងការដោះស្រាយសំណងជូនពលរដ្ឋក្នុងចំនួនច្រើនបែបនេះទេ។
លោកបន្ថែមថា៖ «បងប្អូនក្រុមប្រឹក្សាឃុំគាត់បានទទួលញត្តិពីប្រជាពលរដ្ឋហើយ ហើយយើងក៏បានបញ្ជូនទៅស្រុកហើយដែរ ខាងស្រុកគេសម្រេចយ៉ាងម៉េចនោះ យើងមិនទាន់ដឹងទេ»។
វីអូឌី មិនអាចសុំការបញ្ជាក់ពីអភិបាលស្រុករំដួល លោក សុខា រាម និងអ្នកនាំពាក្យក្រសួងធនធានទឹក និងឧតុនិយម លោក ចាន់ យុត្ថា បានទេ នៅថ្ងៃពុធនេះ។
ប្រធានសមាគមសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថា គោលដៅរបស់រដ្ឋាភិបាលដែលអភិវឌ្ឍប្រព័ន្ធធារាសាស្ត្រប្រឡាយទឹកនៅតំបន់នោះ គឺដើម្បីកាត់បន្ថយភាពលំបាក និងភាពក្រីក្ររបស់ពលរដ្ឋ។ ប៉ុន្តែលោកមើលឃើញថា ការអភិវឌ្ឍនោះបានបង្កផលប៉ះពាល់ដល់ដីធ្លីពលរដ្ឋ ហើយរដ្ឋបែរជាពន្យារពេលកាន់តែយូរ មិនមានយន្តការដោះស្រាយឱ្យបានត្រឹមត្រូវទៅវិញ។
ករណីនេះ លោកថា ការអភិវឌ្ឍនោះមិនឆ្លើយតបទៅនឹងតម្រូវការរបស់ពលរដ្ឋឡើយ ហើយបានធ្វើឱ្យពួកគេកាន់តែក្រីក្រថែមទៀត ដោយសារពួកគេគ្មានដីធ្លីបង្កបង្កើនផលសម្រាប់លើកកម្ពស់ជីវភាព។
លោកបន្ថែមថា៖ «ក្នុងច្បាប់អស្សាមិករណ៍ នៅពេលដែលរដ្ឋយកដីពលរដ្ឋទៅវិនិយោគ រដ្ឋត្រូវផ្តល់សំណងឱ្យបានសមរម្យ មានន័យថា ធ្វើឱ្យពលរដ្ឋអាចទទួលបាន ដែលពួកគាត់អាចទៅទិញកន្លែងថ្មី ឬការដោះដូរដែលគាត់ទទួលបានសមស្រប ប៉ុន្តែបើការផ្តល់សំណង ឬការដោះដូរនោះ មិនបានសមស្របទេ និងទទួលយកបានទេ អាហ្នឹងវាមិនមែនជាសំណងសមរម្យទេ អាហ្នឹងជាការបណ្តេញចេញ ឬអភិវឌ្ឍន៍ដោយបង្ខំហើយ»។
បើតាមក្រុមប្រជាពលរដ្ឋ ពួកគាត់ទាមទារឱ្យមានការផ្តល់សំណងសមរម្យលើផលប៉ះពាល់ផលដំណាំ និងអចលនទ្រព្យផ្សេងៗរបស់ពួកគាត់ ហើយស្នើអាជ្ញាធរកុំឱ្យមានការរើសអើងលើពួកគាត់ ចំពោះកិច្ចការស្វែងរកដំណោះស្រាយដីធ្លីនេះ និងសុំឱ្យអាជ្ញាធរឃុំសហការគ្នាជាមួយប្រជាពលរដ្ឋ ក្នុងការស្វែងរកដំណោះស្រាយដីធ្លីដែលរងផលប៉ះពាល់ផងដែរ៕