ព្រះមហាក្សត្រី អេលីហ្សាប៊ែតទី២ (Elizabeth II) ដែលជាក្សត្រមួយអង្គសោយរាជ្យយូរជាងគេរបស់អង់គ្លេស និងក្នុងចំណោមស្ដេចដែលសោយរាជ្យយូរបំផុតក្នុងពិភពលោក បានសោយទិវង្គតក្នុងព្រះជន្ម៩៦ព្រះវស្សា នៅថ្ងៃព្រហស្បតិ៍ ទី៨ ខែកញ្ញា ឆ្នាំ២០២២ ម្សិលមិញនេះ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Al Jazeera។
ព្រះរាជវាំងបាក់ឃីងហ៊ែម (Buckingham) បានប្រកាសថា ទ្រង់បានសោយទិវង្គត នៅឯវិមានបលម៉ូរ៉ល (Balmoral) ក្នុងប្រទេសស្កុតឡេន។
ព្រះរាជវាំងបាក់ឃីងហ៊ែម (Buckingham) បាននិយាយនៅក្នុងសេចក្តីថ្លែងការណ៍មួយថា៖ «ព្រះមហាក្សត្រី អេលីហ្សាប៊ែតទី២ [Elizabeth II] បានសោយទិវង្គតនៅឯវិមានបលម៉ូរ៉ល [Balmoral] នៅរសៀលនេះ [ថ្ងៃទី៨ ខែកញ្ញា ឆ្នាំ២០២២]»។
បន្ទាប់ពីទទួលដំណឹងថា ព្រះមហាក្សត្រី អេលីហ្សាប៊ែតទី២ (Elizabeth II) សោយទិវង្គត មានសារចូលរួមរំលែកទុក្ខពីអ្នកនយោបាយ និងថ្នាក់ដឹកនាំជុំវិញពិភពលោកជាបន្តបន្ទាប់។
លោកស្រី លីស ត្រាស់ (Liz Truss) ដែលជានាយករដ្ឋមន្រ្តីអង់គ្លេសថ្មី បានមានប្រសាសន៍ថា៖ «ព្រះមហាក្សត្រី អេលីហ្សាប៊ែតទី២ [Elizabeth II] គឺជាស្ថាបនិកប្រទេសអង់គ្លេសសម័យទំនើប។ ប្រទេសរបស់យើងបានរីកចម្រើន និងរុងរឿង ក្រោមរជ្ជកាលរបស់ទ្រង់»។
អគ្គលេខាធិការអង្គការសហប្រជាជាតិ លោក អាន់តូនីញ៉ូ ហ្គូតធឺរ៉េស (Antonio Guterres) បាននិយាយថា៖ «ក្នុងនាមជាប្រមុខរដ្ឋដែលមានព្រះជន្មវែងបំផុត និងសោយរាជ្យយូរបំផុតរបស់អង់គ្លេស ព្រះមហាក្សត្រី អេលីហ្សាប៊ែតទី២ [Elizabeth II] ត្រូវបានស្ងើចសរសើរចំពោះព្រះគុណ សេចក្តីថ្លៃថ្នូរ និងការលះបង់របស់ទ្រង់នៅជុំវិញពិភពលោក»។
បុត្រាច្បងរបស់ព្រះមហាក្សត្រី អេលីហ្សាប៊ែត (Elizabeth) គឺព្រះអង្គម្ចាស់ឆាលស៍ (Charles) ព្រះជន្ម៧៣ព្រះវស្សា នឹងក្លាយជាព្រះមហាក្សត្រថ្មីរបស់អង់គ្លេសដោយស្វ័យប្រវត្តិ និងជាប្រមុខរដ្ឋនៃរាជបុរីចំនួន១៤ផ្សេងទៀត រួមទាំងប្រទេសអូស្ត្រាលី កាណាដា និងនូវែលសេឡង់។
គួរបញ្ជាក់ថា ព្រះមហាក្សត្រី អេលីហ្សាប៊ែតទី២ (Elizabeth II) ប្រសូត្រកាលពីថ្ងៃទី២១ ខែមេសា ឆ្នាំ១៩២៦ និងបានគ្រងព្រះសិរីរាជ្យសម្បត្តិតាំងពីទ្រង់មានព្រះជន្ម២៥ព្រះវស្សា ក្នុងឆ្នាំ១៩៥២ បន្ទាប់ពីព្រះបិតារបស់ទ្រង់ព្រះនាម ហ្សកទី៦ (George VI) សោយទិវង្គត៕
