តំណាងរាស្ត្រខេត្តរតនគិរីមកពីគណបក្សប្រជាជនកម្ពុជា លោក ប៊ូ ឡាំ បានទទួលមរណភាពកាលពីថ្ងៃចន្ទ ទី១២ ខែកញ្ញា ឆ្នាំ២០២២ ម្សិលមិញនេះ ដោយរោគាពាធ។
អ្នកនាំពាក្យរដ្ឋសភា លោក ឡេង ប៉េងឡុង បានថ្លែងនៅថ្ងៃទី១២ ខែកញ្ញាថា លោក ប៊ូ ឡាំ ដែលត្រូវជាប្អូនប្រុសរបស់ប្រធានសហគមន៍ជនជាតិដើមភាគតិចដ៏ល្បីឈ្មោះម្នាក់លោក ប៊ូ ថង បានទទួលមរណភាពនៅខេត្តរតនគិរី កាលពីថ្ងៃចន្ទម្សិលមិញនេះ ដោយសារជំងឺរ៉ាំរ៉ៃ។
លោកបន្តថា លោក ប៊ូ ឡាំ ជាតំណាងរាស្រ្តបីទៅបួនអាណត្តិ ហើយលោកមិនច្បាស់ថាតើគាត់បានចូលរួមក្នុងសភាតាំងពីពេលណានោះទេ។
លោក ឡេង ប៉េងឡុង បានថ្លែងថា៖«យើងកំពុងទាក់ទងទៅគ្រួសារសព ដើម្បីរៀបចំពិធីបុណ្យសពផ្លូវការជូនគាត់»។
យោងតាមប្រវត្តិរូបសង្ខេបរបស់លោក ប៊ូ ឡាំ ដែលតម្កល់នៅរដ្ឋសភា លោកធ្លាប់ជាអភិបាលខេត្តរតនគិរី ពីឆ្នាំ២០០៥ ដល់ឆ្នាំ២០០៩ ហើយបន្ទាប់មកជាសមាជិកក្រុមប្រឹក្សាខេត្តរតនគិរី ពីឆ្នាំ២០០៩ ដល់ឆ្នាំ២០១៣។ លោកកើតនៅថ្ងៃទី១ ខែមករា ឆ្នាំ១៩៥៥ និងមានកូនចំនួន៥
នាក់។
សមាជិកព្រឹទ្ធសភា និងជាអ្នកនាំពាក្យគណបក្សប្រជាជនកម្ពុជាលោក សុខ ឥសាន មានប្រសាសន៍ថា លោកមិនទាន់បានទទួលដំណឹងអំពីមរណភាពនេះទេ គិតត្រឹមរសៀលថ្ងៃចន្ទម្សិលមិញ ហើយបានបញ្ជូនសំណួរទៅកាន់រដ្ឋសភា។
លោកបានបន្ថែមថា លោក ប៊ូ ឡាំ ជាជនជាតិដើមភាគតិច ហើយជាតំណាងសហគមន៍ដែលរស់នៅភាគឦសាន។ លោក សុខ ឥសាន បាននិយាយថា លោក ប៊ូ ឡាំ បានចូលរួមក្នុងការប្រយុទ្ធដើម្បីរំដោះប្រទេសពីខ្មែរក្រហម។
បងប្រុសរបស់លោក ប៊ូ ឡាំ ឈ្មោះ ប៊ូ ថង ក៏ជាប្រធានសហគមន៍ជនជាតិដើមភាគតិចទំពួនដែរ ដែលដំបូងឡើយបានចូលរួមជាមួយខ្មែរក្រហម ដើម្បីប្រយុទ្ធជាមួយ លន់ នល់ ប៉ុន្តែក្រោយមកបានរត់ចោលជួរ និងផ្តួលរំលំរបបឃាតកម្មនេះ [របបខ្មែរក្រហម]។ លោក ប៊ូ ថង បានទទួលមរណភាពនៅឆ្នាំ២០១៩។ កូនប្រុសរបស់លោក ប៊ូ ថង គឺលោក ថង សាវុន បច្ចុប្បន្នជាអភិបាលខេត្តមណ្ឌលគិរី និងជាអតីតអភិបាលខេត្តរតនគិរី៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Bou Thang’s Brother and CPP Lawmaker Bou Lam Dies at Age 67