កម្មវិធីស្បៀងអាហារពិភពលោកនៃអង្គការសហប្រជាជាតិ (WFP) សហការជាមួយនាយកដ្ឋានសុខភាពសិក្សានៃក្រសួងអប់រំ យុវជន និងកីឡា នឹងចាប់ផ្ដើមបើកយុទ្ធនាការទំនាក់ទំនង ដើម្បីផ្លាស់ប្តូរឥរិយាបទសង្គម ទាក់ទងនឹងរបបអាហាររបស់កុមារក្នុងវ័យសិក្សានៅកម្ពុជា។
សេចក្តីប្រកាសព័ត៌មានរបស់ WFP នៅថ្ងៃទី១៣ ខែកញ្ញា ឆ្នាំ២០២២នេះ បានឱ្យដឹងថា ផែនការយុទ្ធនាការលើកកម្ពស់អាហារូបត្ថម្ភក្នុងសាលារៀននេះ ត្រូវបានបង្កើតឡើងដោយ WFP និងក្រសួងអប់រំ នៅក្នុងសិក្ខាសាលាមួយកាលពីចុងសប្តាហ៍មុន ដែលមានការចូលរួមពីទីភ្នាក់ងារអង្គការសហប្រជាជាតិ អង្គការសង្គមស៊ីវិល ក្រសួងសុខាភិបាល និងការិយាល័យអប់រំខេត្តកំពង់ឆ្នាំង កំពង់ធំ និងសៀមរាប។
លោកស្រី គ្លែរ កូណាន់ តំណាង និងនាយកប្រចាំប្រទេសរបស់ WFP បានលើកឡើងក្នុងសេចក្តីប្រកាសព័ត៌មាននោះថា មានកត្តាជាច្រើនដែលរួមចំណែកឱ្យកុមារក្នុងវ័យសិក្សាមានអាហាររូបត្ថម្ភមិនល្អ ហើយឥរិយាបថរបស់ពួកគេ និងអ្នកថែទាំពួកគេ គឺជាកត្តាកំណត់មួយក្នុងចំណោមកត្តាកំណត់ទាំងឡាយ។
លោកស្រីបន្តថា៖ «យុទ្ធនាការប្រកបដោយប្រសិទ្ធភាព ដែលអប់រំកុមារអំពីសារៈសំខាន់នៃរបបអាហារមានជីវជាតិ និងមានតុល្យភាព នឹងក្លាយជាចំណុចសំខាន់មួយដែលរួមចំណែកដល់ការអភិវឌ្ឍន៍សុខភាពរយៈពេលវែងរបស់ពួកគាត់។ បន្ថែមទៅលើការចូលរួមដ៏យូរអង្វែងកន្លងមករបស់យើង នៅក្នុងកម្មវិធីផ្ដល់ស្បៀងអាហារតាមសាលារៀន ឥឡូវនេះយើងកំពុងសហការជាមួយនាយកដ្ឋានសុខភាពសិក្សា និងដៃគូនានា ដើម្បីបង្កើតយុទ្ធនាការដែលលើកទឹកចិត្តឱ្យមានការបង្កើនការបរិភោគផ្លែឈើ បន្លែ និងប្រូតេអ៊ីន»។
បើតាមសេចក្តីប្រកាសព័ត៌មានរបស់ WFP នៅកម្ពុជា សិស្សសាលាទទួលរងនូវបញ្ហាអាហារូបត្ថម្ភផ្សេងៗ ដូចជា កង្វះមីក្រូសារជាតិកម្រិតខ្ពស់ អត្រាលើសទម្ងន់និងធាត់ជ្រុល និងកង្វះអាហារូបត្ថម្ភយូរអង្វែង ហើយការកើនឡើងយ៉ាងឆាប់រហ័សនូវប្រជាប្រិយភាពរបស់អាហារកែច្នៃ ក្នុងរយៈពេលប៉ុន្មានឆ្នាំថ្មីៗនេះ បានជះឥទ្ធិពលយ៉ាងខ្លាំងទៅលើគុណភាពរបបអាហារ។
ប្រភពដដែលបន្តថា ទន្ទឹមនឹងនេះ របបអាហារចម្រុះនៅតែមានកម្រិតទាប ក្នុងនោះការទទួលទានបាយ សាច់ និងត្រីមានបរិមាណខ្ពស់ ចំណែកការទទួលទានផ្លែឈើ បន្លែ និងប្រភេទប្រូតេអ៊ីនផ្សេងទៀត ដូចជា ទឹកដោះគោ ឬស៊ុត នៅមានកំរិតទាបខ្លាំងជាងកំរិតដែលណែនាំដោយគោលការណ៍អន្តរជាតិនៅឡើយ។
លោក ឆាយ គឹមសុធាវី ប្រធាននាយកដ្ឋានសុខភាពសិក្សា ត្រូវបានស្រង់ប្រសាសន៍មកផ្សព្វផ្សាយក្នុងសេចក្តីប្រកាសព័ត៌មានដែរថា៖ «ករណីនេះ គឺជាក្ដីបារម្ភយ៉ាងខ្លាំង ពីព្រោះថា ទោះបីជាមានវឌ្ឍនភាពខ្លះៗ ក្នុងការកាត់បន្ថយអត្រានៃភាពស្គមស្គាំង ក្រេសក្រិន និងខ្វះទម្ងន់ក៏ដោយ កង្វះអាហារូបត្ថម្ភនៅតែជាបញ្ហាដែលបន្តកើតមាននៅក្នុងកម្រិតគ្រួសារ»។
គួរបញ្ជាក់ថា WFP សហការជាមួយរដ្ឋាភិបាលកម្ពុជា បាននិងកំពុងផ្តល់ស្បៀងអាហារតាមសាលារៀនដល់សិស្សសាលាបឋមសិក្សា និងមត្តេយ្យសិក្សាតាំងពីឆ្នាំ១៩៩៩ ដោយបានរួមចំណែកលើកកម្ពស់លទ្ធផលផ្នែកអាហារូបត្ថម្ភ ក៏ដូចជាវត្តមាន ការផ្តោតអារម្មណ៍ និងការរៀនសូត្ររបស់សិស្ស។ ទោះជាយ៉ាងណាក៏ដោយ ការផ្ដល់ស្បៀងអាហារតាមសាលារៀនគ្រាន់តែជាផ្នែកមួយប៉ុណ្ណោះនៃរបបអាហាររបស់កុមារ វាមិនអាចសំដៅដោះស្រាយបញ្ហាទទួលទានអាហារនៅផ្ទះ ឬឥរិយាបថទទួលទាននំចំណីដែលមិនល្អនោះទេ ដែលករណីនេះ សាលារៀននៅតែជាវេទិកាមួយដែលផ្ដល់លទ្ធភាព និងឱកាស ក្នុងការលើកកម្ពស់របបអាហាររបស់កុមារ ឱ្យកាន់តែទូលំទូលាយ៕
