សមត្ថកិច្ចឱ្យដឹងថា បុរសជាជនជាតិវៀតណាមម្នាក់បានស្លាប់បាត់បង់ជីវិត កាលពីថ្ងៃទី១៣ ខែកញ្ញា បន្ទាប់ពីលោតពីជាន់ទី២នៃបរិវេណអគារក្រុមហ៊ុនមួយកន្លែងក្នុងក្រុងបាវិត ខណៈជនរងគ្រោះបានប៉ុនប៉ងរត់គេចចេញពីទីតាំងដែលខ្លួនកំពុងធ្វើការមួយនេះ។
អធិការនគរបាលក្រុងបាវិត លោក ឯម សុវណ្ណារិទ្ធ បានលើកឡើងថា បុរសម្នាក់នេះត្រូវបានគេប្រទះឃើញដេកផ្កាប់មុខស្លាប់នៅលើផ្លូវបេតុងមួយកន្លែង។
លោកបន្តថា៖ «ការស៊ើបអង្កេតបានបញ្ចប់ហើយ ដោយតាមរយៈវីដេអូក្នុងកាមេរ៉ាសុវត្ថិភាពបង្ហាញថា រូបគាត់បានប៉ុនប៉ងរត់គេចខ្លួនពីបរិវេណក្រុមហ៊ុនមួយកន្លែង»។
លោកបន្ថែមថា៖ «អ្នកនៅទីតាំងកើតហេតុបានរាយការណ៍ថា គាត់នៅមានដង្ហើម ប៉ុន្តែនៅពេលដែលមន្ត្រីរបស់យើងទៅដល់ទីតាំង គាត់បានស្លាប់បាត់ទៅហើយ។ មុនករណីនេះកើតឡើង បុរសរូបនេះមិនបានរងការវាយដំអ្វីឡើយ ខណៈគាត់ពិតជាបានស្លាប់ដោយសារតែលោតពីលើអគារ ហើយបោកក្បាលទៅនឹងបេតុងពិតមែន»។
កាលពីពេលកន្លងទៅ ក៏មានករណីបុរសជាជនជាតិវៀតណាមម្នាក់បានស្លាប់បាត់បង់ជីវិតភ្លាមៗផងដែរ បន្ទាប់ពីធ្លាក់ពីជាន់ទី៨ នៃអាគារកាស៊ីណូក្នុងក្រុងបាវិតមួយកន្លែង។
ក្នុងករណីមួយទៀត បុរសជាជនជាតិវៀតណាមម្នាក់ទៀតក៏ត្រូវបានគេប្រទះឃើញស្លាប់ដោយចងកនៅកាស៊ីណូក្នុងទីក្រុងបាវិតមួយកន្លែងផងដែរ ខណៈសមត្ថកិច្ចបានអះអាងនៅពេលនោះថា បុរសរូបនេះមានវិបត្តិផ្លូវចិត្តដែលឈានដល់ការសម្លាប់ខ្លួនឯងតែម្ដង។
ទោះជាយ៉ាងណា សម្រាប់ករណីចុងក្រោយនេះ លោក ឯម សុវណ្ណារិទ្ធ បានបញ្ជាក់ថា៖ «វាមិនមែនជាឃាតកម្ម ឬបង្ខាំងអ្វីឡើយ ដោយករណីនេះក៏មិនបង្កឱ្យមានជាការសង្ស័យណាមួយផងដែរ»។
យោងតាមវីដេអូដែលត្រូវបានបង្ហោះក្នុងបណ្ដាញសង្គមតីកតុក (Tik Tok) បានបង្ហាញពីរូបភាពបុរសម្នាក់បានឡើងទៅកាន់ជាន់ទី២នៃអាគារមួយ ដែលបន្ទាប់មក បុរសរូបនោះក៏បានលោតមកក្រោមតែម្ដង៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Bavet Escape Attempt Leads to Falling Death
