ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានឱ្យដឹងថា ខ្លួនមិនគិតថាការត្រៀមខ្លួនប្រើប្រាស់អាវុធនុយក្លេអ៊ែរដើម្បីការពារប្រទេសរុស្ស៊ី ដែលលើកឡើងដោយលោក វ្លាឌីមៀរ ពូទីន គឺជាករណីលេងសើចនោះទេ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ការលើកឡើងនេះត្រូវបានធ្វើឡើងបន្ទាប់ពីប្រធានាធិបតីរុស្ស៊ី លោក ពូទីន កាលពីសប្ដាហ៍មុន បានអះអាងសាជាថ្មីនៅក្នុងសុន្ទរកថាមួយថា ប្រទេសរបស់ខ្លួននឹងប្រើប្រាស់រាល់គ្រប់មធ្យោបាយដែលមានទាំងអស់ ដើម្បីការពារប្រទេសរុស្ស៊ី និងប្រជាជនរបស់ខ្លួន ក្នុងករណីដែលបូរណភាពទឹកដីរបស់ខ្លួនត្រូវបានគំរាមកំហែង។
ទាក់ទិននឹងករណីនេះ លោក ហ្សេលេនស្គី បានឱ្យដឹងកាលពីថ្ងៃអាទិត្យថា៖ «កាលលើកឡើង [គម្រោងប្រើប្រាស់អាវុធនុយក្លេអ៊ែររបស់លោក ពូទីន] កាលពីពេលកន្លងទៅ អាចថាជារឿងដែលមិនច្បាស់លាស់។ ប៉ុន្តែករណីនេះ បច្ចុប្បន្នអាចជាការពិតដែលអាចនឹងកើតមានឡើង»។
លោកបន្ថែមថា៖ «ខ្ញុំមិនគិតថាការលើកឡើង [របស់លោក ពូទីន] នេះ គឺជារឿងលេងសើចនោះទេ»។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង បន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន។
ករណីនេះក៏បានបង្កឱ្យមានជាការព្រួយបារម្ភពីបណ្ដាប្រទេសនានា ដែលថាការប៉ះទង្គិចរវាងប្រទេសទាំង២ នេះអាចនឹងវិវត្តទៅជាសង្រ្គាមដោយប្រើប្រាស់អាវុធនុយក្លេអ៊ែរ គីមី និងជីវសាស្ត្រ ជាដើម។
ទោះជាយ៉ាងណា អ្នកនាំពាក្យវិមានក្រឹមឡាំងមួយរូបធ្លាប់បានបញ្ជាក់ឱ្យដឹងកាលពីពេលកន្លងទៅថា គោលនយោបាយសន្តិសុខរបស់រុស្ស៊ីកំណត់ថា ប្រទេសរបស់ខ្លួននឹងប្រើប្រាស់អាវុធនុយក្លេអ៊ែរសម្រាប់តែករណីដែលអត្ថិភាពរបស់ខ្លួនត្រូវបានគំរាមកំហែងប៉ុណ្ណោះ៕