ប្រធានាធិបតីរុស្ស៊ី លោក វ្លាឌីមៀរ ពូទីន បានផ្ដល់សញ្ជាតិរុស្ស៊ីដល់អតីតមន្រ្តីទីភ្នាក់ងារសន្តិសុខជាតិអាមេរិក (NSA) មួយរូបឈ្មោះ Edward Snowden។ នេះបើតាមសេចក្ដីសម្រេចមួយចេញដោយរដ្ឋាភិបាលរុស្ស៊ី កាលពីថ្ងៃចន្ទ ដែលត្រូវបានយកមកចុះផ្សាយបន្តដោយសារព័ត៌មាន CNN។
ការទទួលបានសញ្ជាតិរុស្ស៊ីរបស់អតីតមន្រ្តីទីភ្នាក់ងារសន្តិសុខជាតិអាមេរិករូបនេះ ត្រូវបានធ្វើឡើងរួមគ្នាជាមួយនឹងជនបរទេសចំនួនប្រមាណជាង៧០នាក់ទៀត ដែលត្រូវបានរុស្សីបានផ្ដល់សញ្ជាតិដូចគ្នានេះផងដែរ។
ថ្លែងតាមរយៈបណ្ដាញសង្គម ធ្វីតធ័រ (Twitter) កាលពីថ្ងៃចន្ទ លោក Edward Snowden បានឱ្យដឹងថា៖ «បន្ទាប់ពីរងនូវបទពិសោធរស់នៅបែកបាក់អស់រយៈពេលជាច្រើនឆ្នាំពីឪពុកម្ដាយរបស់យើងមក ទាំងខ្ញុំ និងប្រពន្ធខ្ញុំ នៅពេលនេះ គឺគ្មានបំណងចង់បែកពីកូនប្រុសរបស់យើងទៀតទេ។ បន្ទាប់ពីរង់ចាំអស់រយៈពេល២ឆ្នាំ និងការរស់នៅនិរទេសខ្លួនជិត១០ឆ្នាំ អ្វីដែលទទួលបាននៅពេលនេះ [សញ្ជាតិរុស្ស៊ី] នឹងធ្វើឱ្យគ្រួសាររបស់ខ្ញុំមានភាពប្រសើរឡើង»។
គួរបញ្ជាក់ថា លោក Edward Snowden ត្រូវបានចោទប្រកាន់ពីបទចារកម្មនៅក្នុងសហរដ្ឋអាមេរិក បន្ទាប់ពីមានករណីបែកធ្លាយព័ត៌មានស្តីពី ការស៊ើបការណ៍សម្ងាត់របស់អាមេរិក និងកម្មវិធីឃ្លាំមើលដ៏ធំទៅកាន់ប្រព័ន្ធផ្សព្វផ្សាយ ខណៈរូបលោកត្រូវប្រឈមនឹងការជាប់ពន្ធនាគាររហូតដល់៣០ឆ្នាំនៅសហរដ្ឋអាមេរិក។
បន្ទាប់ពីមានការរកឃើញថា លោកបានទម្លាយឯកសារសម្ងាត់របស់រដ្ឋជាសាធារណៈនេះ រូបលោកបានរត់គេចមករស់នៅនិរទេសខ្លួននៅទីក្រុងមូស្គូ ប្រទេសរុស្ស៊ី ចាប់តាំងពីឆ្នាំ២០១៣ ដោយនៅក្នុងខែវិច្ឆិកា ឆ្នាំ២០២០ លោក និងប្រពន្ធរបស់ខ្លួនឈ្មោះ Lindsay Mills ក៏បានសម្រេចដាក់ពាក្យសុំសញ្ជាតិរុស្ស៊ី៕
