រដ្ឋាភិបាលវៀតណាម នៅថ្ងៃពុធនេះ បានធ្វើការក្រើនរំឭកដល់ពលរដ្ឋរបស់ខ្លួនឱ្យមានការប្រុងប្រយ័ត្នខ្ពស់ ទាក់ទងនឹងហានិភ័យពីទឹកជំនន់ និងការរអិលបាក់ដីដែលបណ្ដាលមកពីភ្លៀងធ្លាក់ខ្លាំង ដែលបង្កឡើងដោយព្យុះទីហ្វុងណូរុ (Noru)។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
បើតាមការឱ្យដឹងពីទីភ្នាក់ងារអាកាសធាតុ ដែលបានរាយការណ៍ប្រាប់ប្រព័ន្ធផ្សព្វផ្សាយរដ្ឋ ព្យុះទីហ្វុងនេះបានបោកបក់ក្នុងល្បឿនខ្យល់ ១១៧គីឡូម៉ែត្រក្នុងមួយម៉ោង ខណៈតំបន់ដែលរងនូវការវាយប្រហារខ្លាំង គឺរួមមានខេត្តក្វាងងៃ (Quang Ngai) និងខេត្តក្វាងណាំ (Quang Nam) ដោយក្នុងនោះ ពលរដ្ឋជាង១៣ម៉ឺននាក់ក៏ត្រូវបានជម្លៀសចេញផងដែរ។
ព្យុះណូរុ គឺជាព្យុះដ៏ខ្លាំងបំផុតមួយដែលបានបក់បោកវាយប្រហារដំបូងចេញពីប្រទេសហ្វីលីពីន កាលពីយប់ថ្ងៃអាទិត្យ ដោយក្នុងនោះមានមនុស្សយ៉ាងហោចណាស់៨នាក់បានស្លាប់បាត់បង់ជីវិត ដីស្រែចម្ការនិងសហគមន៍ត្រូវបានជន់លិច ខណៈដំណាំទាំងឡាយក៏រងនូវការបំផ្លិចបំផ្លាញផងដែរ។
យោងតាមទិន្នន័យផ្លូវការបានបង្ហាញថា គ្រោះមហន្តរាយធម្មជាតិដែលភាគច្រើនជាទឹកជំនន់ និងការរអិលបាក់ដី ដែលបង្កឡើងដោយព្យុះនានាក្នុងប្រទេសវៀតណាម បានឆក់យកជីវិតមនុស្ស១៣៩នាក់ និង១៥០នាក់ផ្សេងទៀតរងរបួស កាលពីឆ្នាំមុន៕