ខណៈប្រតិបត្តិការចុះត្រួតពិនិត្យរដ្ឋបាលទីតាំងអគារទាំងឡាយនៅក្នុងខេត្តព្រះសីហនុ បាននិងកំពុងបន្តធ្វើឡើង អាជ្ញាធរបានអះអាងថា ខ្លួនពុំបានសង្កេតឃើញមានបទល្មើសអ្វីមួយគួរឱ្យកត់សម្គាល់ឡើយ។
តាមរយៈប្រតិបត្តិការចុះត្រួតពិនិត្យ ដែលធ្វើឡើងកាលពីសប្ដាហ៍មុន ក្នុងនោះមានទីតាំងអាគារកម្ពស់ ៧ជាន់មួយកន្លែង ត្រូវបានអាជ្ញាធរអះអាងថា ពុំមានមនុស្សស្នាក់នៅឡើយ ខណៈកម្លាំងចម្រុះបានរកឃើញតែជនជាតិខ្មែរជាបុគ្គលិកអនាម័យចំនួន ០៤នាក់ និងចុងភៅជនជាតិចិនម្នាក់ ដែលពួកគេទើបតែចូលធ្វើការបានចំនួន ៥ថ្ងៃប៉ុណ្ណោះ។
ទីតាំងអាគារនេះមានឈ្មោះថា ហ្វូ បេន ហាវ ឯ.ក (Fu Ben Hao) ដែលស្ថិតនៅក្នុងសង្កាត់លេខ២ ក្រុងព្រះសីហនុ ខេត្តព្រះសីហនុ។
គួរបញ្ជាក់ថា ប្រតិបត្តិការចុះត្រួតពិនិត្យរដ្ឋបាលទីតាំងអគារទាំងនេះ គឺជាផ្នែកមួយនៃវិធានការរបស់អាជ្ញាធរក្នុងរយៈពេលប៉ុន្មានសប្តាហ៍កន្លងមកនេះ ដែលបានកំណត់គោលដៅ ជាពិសេសលើទីតាំងប្រតិបត្តិការឆបោកទាំងឡាយដែលរួមមានក្នុងខេត្តព្រះសីហនុ ខេត្តសៀមរាប និងរាជធានីភ្នំពេញ ខណៈមានប្រតិបត្តិការមួយចំនួន ក៏បានបិទអាជីវកម្មអត់ច្បាប់របស់ខ្លួនដោយខ្លួនឯងផងដែរ។
យោងតាមសេចក្តីប្រកាសព័ត៌មាន របស់រដ្ឋបាលខេត្តព្រះសីហនុ ប្រតិបត្តិការចុះត្រួតពិនិត្យរដ្ឋបាលទីតាំងអគារចំនួន៦ ចុងក្រោយដែលធ្វើឡើងកាលពីសប្ដាហ៍មុនរួមមាន៖
- អាគារ ហ្វូ បេន ហាវ ឯ.ក (Fu Ben Hao) កម្ពស់ ៧ជាន់ ស្ថិតនៅក្នុងសង្កាត់លេខ២ ដែលត្រូវបានចុះត្រួតពិនិត្យកាលពីថ្ងៃទី២៨ ខែកញ្ញា ក្នុងនោះបានរកឃើញនូវជនជាតិខ្មែរជាបុគ្គលិកអនាម័យចំនួន ៤នាក់ និងចុងភៅជនជាតិចិនម្នាក់ ខណៈទីតាំងនេះពុំមានសញ្ញាណនៃបទល្មើសផ្សេងៗនោះទេ។
- អគារ រ៉ូយ៉ាល់យ៉ុងលិ (The Royal Yong Li) ក្នុងសង្កាត់លេខ៤ ដែលត្រូវបានចុះត្រួតពិនិត្យកាលពីថ្ងៃទី២៨ ខែកញ្ញា។ ក្នុងប្រតិបត្តិការនេះ ក្រុមការងារពុំបានរកឃើញនូវជនអន្តោប្រវេសន៍ស្នាក់នៅខុសច្បាប់ ករណីបង្ខាំងធ្វើទារុណកម្ម និងជួញដូរមនុស្សនោះទេ។
- អគារ ជីង ឆាយ ៣ (Jincai 3) ក្នុងសង្កាត់លេខ៣ កម្ពស់ ៨ជាន់ ដែលមានបន្ទប់ស្នាក់នៅសរុបចំនួន ៩០បន្ទប់ ការិយាល័យធ្វើការសរុបចំនួន ៥២បន្ទប់ ត្រូវបានចុះត្រួតពិនិត្យកាលពីថ្ងៃទី ២៨ ខែកញ្ញា បានរកឃើញមនុស្សសរុបចំនួន ៣៥នាក់ ក្នុងនោះមានជនជាតិខ្មែរសរុបចំនួន ១១នាក់ និងជនជាតិចិនចំនួន ២៤នាក់ (មានឯកសារគ្រប់គ្រាន់) ដោយពុំឃើញមានជនរងគ្រោះ និងសញ្ញាណនៃបទល្មើសផ្សេងៗនោះទេ។
- ទីតាំងអគារស្នាក់នៅរបស់កាស៊ីណូ ឆាង ឆឹង (Chang Cheng) ស្ថិតនៅក្នុងសង្កាត់លេខ៤ កម្ពស់ ១២ជាន់ ដែលមានបន្ទប់ស្នាក់នៅសរុបចំនួន ១៦៤បន្ទប់ ត្រូវបានចុះត្រួតពិនិត្យកាលពីថ្ងៃទី៣០ ខែកញ្ញា បានរកឃើញមនុស្សចំនួន ៣៧នាក់ (ជនជាតិចិន ៣៤នាក់, វៀតណាម ២ នាក់ និងថៃម្នាក់) ដែលក្នុងនោះមាន ១១នាក់ គ្មានលិខិតឆ្លងដែន និង ១៧នាក់ គ្មានប័ណ្ណការងារ។
- ទីតាំងសណ្ឋាគារ វ័ន សឺតា អីនវេសម៉ិន ឌីវេឡុបម៉ិន ឯ.ក (Won Siuta) ស្ថិតនៅក្នុងសង្កាត់លេខ៣ ត្រូវបានចុះត្រួតពិនិត្យកាលពីថ្ងៃទី៣០ ខែកញ្ញា ដោយបានរកឃើញមនុស្សចំនួន ៤០ នាក់ (ជនជាតិចិន ៣៦នាក់, ម៉ាឡេស៊ី ២នាក់ និងចិនតៃវ៉ាន់ ២នាក់) ក្នុងនោះ ២៩នាក់ គ្មានប័ណ្ណការងារ។
- ទីតាំងសណ្ឋាគារ ហ្គួយ ហឺ ហ្គូ ជី (Guoy Heu Guon Ji) ស្ថិតនៅក្នុងសង្កាត់លេខ៣ មានកម្ពស់ ១៦ ជាន់ និងបន្ទប់ស្នាក់នៅចំនួន ១៥៣បន្ទប់ ត្រូវបានចុះត្រួតពិនិត្យកាលពីថ្ងៃទី៣០ ខែកញ្ញា ដោយរកឃើញមានមនុស្សចំនួន ១៣០នាក់ (ជនជាតិខ្មែរ៤៦នាក់ ចិន៥៩នាក់ វៀតណាម១៩នាក់ តួកគីម្នាក់ ឥណ្ឌូនេស៊ីម្នាក់ កូរ៉េ ២នាក់ ចិនតៃវ៉ាន់ម្នាក់ និងមីយ៉ាន់ម៉ាម្នាក់) ក្នុងនោះ ៣៤នាក់ គ្មានប័ណ្ណការងារ និងម្នាក់ជាជនអន្តោប្រវេសន៍ស្នាក់នៅខុសច្បាប់ ប៉ុន្តែពុំមានករណីបង្ខាំងធ្វើទារុណកម្ម និងជួញដូរមនុស្សនោះទេ។
ទាក់ទិននឹងករណីនេះ រដ្ឋលេខាធិការក្រសួងមហាផ្ទៃ លោក សុខ ផល បានឱ្យដឹងកាលពីថ្ងៃសុក្រថា អាជីវកម្មខុសច្បាប់ប្រមាណជា ៩០ភាគរយ បានបញ្ឈប់សកម្មភាពរបស់ខ្លួនហើយ គិតចាប់តាំងពីអាជ្ញាធរបានបើកយុទ្ធនាការបង្ក្រាបនៅទូទាំងប្រទេស។
លោក សុខ ផល បន្ថែមថា៖ «ទីតាំងដែលនៅសេសល់គឺស្ថិតនៅក្នុងចំនួនតិចតួចប៉ុណ្ណោះ ដោយយើងក៏មិនទាន់ដឹងពីមូលហេតុយ៉ាងម៉េចដែរ ដូច្នេះយើងនឹងសហការជាមួយអាជ្ញាធរបន្ថែមទៀត ដើម្បីបន្តបោសសម្អាត និងបញ្ឈប់ទីតាំងខុសច្បាប់ទាំងនេះ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Seven-Story Building Raided, Only 4 Cleaners, 1 Chef Found