សេតវិមាន ឱ្យដឹងថា ប្រធានាធិបតីអាមេរិក លោក ចូ បៃឌិន (Joe Biden) បានប្រាប់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) កាលពីថ្ងៃអង្គារម្សិលមិញថា ទីក្រុងវ៉ាស៊ីនតោន នឹងផ្តល់ជំនួយសន្តិសុខថ្មីចំនួន ៦២៥លានដុល្លារ ដល់ទីក្រុងកៀវ (Kyiv) រួមទាំងប្រព័ន្ធមីស៊ីល HIMARS ផងដែរ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី៥ ខែតុលា ឆ្នាំ២០២២នេះ។
លោក Joe Biden បានគូសបញ្ជាក់នៅក្នុងសេចក្តីថ្លែងការណ៍មួយថា ទីក្រុងវ៉ាស៊ីនតោននឹងមិនទទួលស្គាល់ការភ្ជាប់តំបន់មួយចំនួនរបស់អ៊ុយក្រែនជាទឹកដីរបស់រុស្ស៊ីឡើយ។
សេចក្តីថ្លែងការណ៍ បន្តថា៖ «លោក Joe Biden បានសន្យាថា នឹងបន្តគាំទ្រអ៊ុយក្រែន ខណៈប្រទេសនេះការពារខ្លួនពីការឈ្លានពានរបស់រុស្ស៊ី»។
កញ្ចប់ជំនួយនេះ គឺជាកញ្ចប់ជំនួយដំបូង ចាប់តាំងពីរុស្ស៊ីប្រកាសភ្ជាប់តំបន់មួយចំនួនរបស់អ៊ុយក្រែនជាទឹកដីរបស់ខ្លួន។
កាលពីសប្តាហ៍មុន រុស្ស៊ី បានប្រកាសភ្ជាប់តំបន់មួយចំនួនរបស់អ៊ុយក្រែន ជាទឹកដីរបស់ខ្លួន ដោយហៅថា ជាការធ្វើប្រជាមតិក្នុងតំបន់ដែលខ្លួនបានកាន់កាប់។ រដ្ឋាភិបាលលោកខាងលិច និងទីក្រុងកៀវ (Kyiv) បាននិយាយថា ការធ្វើប្រជាមតិនេះ បានបំពានច្បាប់អន្តរជាតិ និងមានការបង្ខិតបង្ខំ។
ក្រសួងការបរទេសអាមេរិក បាននិយាយថា កញ្ចប់ជំនួយនោះ រួមមាន ប្រព័ន្ធមីស៊ីល HIMARS ចំនួន ៤គ្រឿង និងគ្រាប់រ៉ុក្កែត កាំភ្លើងធំ Howitzers ចំនួន ៣២គ្រឿង ជាមួយនឹងគ្រាប់ចំនួន ៧៥ ០០០គ្រាប់ រថពាសដែក MRAP ចំនួន ២០០គ្រឿង និងមីនប្រឆាំងមនុស្សរបស់ Claymore។
រដ្ឋមន្ត្រីការបរទេសអាមេរិក លោក អែនតូនី ប្លីងខិន (Antony Blinken) បាននិយាយនៅក្នុង
សេចក្តីថ្លែងការណ៍មួយថា៖ «ការវិវត្តថ្មីៗនេះ ពីការធ្វើប្រជាមតិក្លែងក្លាយរបស់រុស្ស៊ី និងការប៉ុនប៉ងភ្ជាប់តំបន់មួយចំនួនរបស់អ៊ុយក្រែនទៅជាទឹកដីរបស់ខ្លួន គឺគ្រាន់តែពង្រឹងការតាំងចិត្តរបស់យើងប៉ុណ្ណោះ»។
កាលពីសប្តាហ៍មុន សហរដ្ឋអាមេរិក បានបញ្ចេញកញ្ចប់សព្វាវុធចំនួន ១,១ពាន់លានដុល្លារ សម្រាប់ប្រទេសអ៊ុយក្រែន ដែលរួមមានប្រព័ន្ធមីស៊ីល HIMARS ចំនួន ១៨គ្រឿង រួមទាំងគ្រាប់រ៉ុក្កែត យន្តហោះគ្មានមនុស្សបើកប្រភេទផ្សេងៗគ្នា និងប្រព័ន្ធរ៉ាដា។
ទោះយ៉ាងណា កញ្ចប់ជំនួយកាលពីសប្តាហ៍មុន ត្រូវបានផ្តល់មូលនិធិដោយគំនិតផ្តួចផ្តើមជំនួយសន្តិសុខអ៊ុយក្រែន (USAI) ដែលមានន័យថា រដ្ឋាភិបាលត្រូវទិញអាវុធពីឧស្សាហកម្ម ជាជាងចកចេញពីឃ្លាំងអាវុធរបស់សហរដ្ឋអាមេរិកដែលមានស្រាប់។
ជំនួយសន្តិសុខរបស់អាមេរិក សម្រាប់អ៊ុយក្រែនរហូតមកទល់ពេលនេះ មានចំនួនជាង ១៦,៨ ពាន់លានដុល្លារ ចាប់តាំងពីរុស្ស៊ីបានឈ្លានពានអ៊ុយក្រែន នៅថ្ងៃទី២៤ ខែកុម្ភៈ ឆ្នាំ២០២២។
គួរបញ្ជាក់ថា ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង បន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមដោយប្រធានាធិបតី លោក វ្លាឌីមៀរ ពូទីន។
រុស្ស៊ី បានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែន តាមផ្លូវគោក ផ្លូវអាកាស និងសមុទ្រ កាលពីថ្ងៃទី២៤ ខែកុម្ភៈ ឆ្នាំ២០២២ ដែលបានធ្វើឱ្យបណ្ដាប្រទេសមួយចំនួននៅលើពិភពលោកសម្រេចដាក់ទណ្ឌកម្មយ៉ាងធ្ងន់ធ្ងរជាបន្តបន្ទាប់លើរុស្ស៊ី៕