គណៈរដ្ឋមន្ត្រីរបស់ប្រទេសជប៉ុន បានសម្រេចដាក់ទណ្ឌកម្មថ្មីលើប្រទេសរុស្ស៊ី បន្ទាប់ពីទីក្រុងមូស្គូភ្ជាប់តំបន់ចំនួន៤របស់អ៊ុយក្រែនទៅជាទឹកដីរបស់ខ្លួនដោយឯកតោភាគី។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន NHK នៅថ្ងៃទី៧ ខែតុលា ឆ្នាំ២០២២នេះ។
មនុស្សសរុបចំនួន៨១នាក់ និងស្ថាប័នចំនួន៩ នឹងត្រូវបានដាក់បញ្ចូលទៅក្នុងបញ្ជីដែលនឹងត្រូវបង្កកទ្រព្យសម្បត្តិ។
បុគ្គលទាំងនោះ រួមមាន ក្រុមផ្ដាច់ខ្លួនដែលគាំទ្ររុស្ស៊ីនៅភាគខាងកើត និងភាគខាងត្បូងអ៊ុយក្រែន ដែលត្រូវបានគេជឿថាជាអ្នកទទួលខុសត្រូវផ្ទាល់ ចំពោះការដាក់បញ្ចូលតំបន់ទាំង៤របស់អ៊ុយក្រែនជាទឹកដីរុស្ស៊ី។ លើសពីនេះ ក៏មានមន្ត្រីរដ្ឋាភិបាលជាន់ខ្ពស់ និងស្ថាប័នពាក់ព័ន្ធនឹងយោធាផងដែរ។
នាយរងខុទ្ទកាល័យជប៉ុន លោក គីហារ៉ា សេអ៊ិជី (Kihara Seiji) បានប្រាប់អ្នករាយការណ៍ព័ត៌មានថា ចំណាត់ការដែលរុស្ស៊ីហៅថា «ការធ្វើប្រជាមតិ» និង «ការរួមបញ្ចូល» រំលោភលើអធិបតេយ្យភាព និងបូរណភាពទឹកដីរបស់អ៊ុយក្រែន និងបំពានច្បាប់អន្តរជាតិ។
លោកបាននិយាយថា ប្រទេសជប៉ុនថ្កោលទោសយ៉ាងខ្លាំងចំពោះទង្វើនេះ ដោយបន្ថែមថា ប្រទេសរបស់លោកមិនអាចអត់ទោសចំពោះការប៉ុនប៉ងរបស់រុស្ស៊ី ក្នុងការផ្លាស់ប្តូរស្ថានភាពជាឯកតោភាគីនោះទេ។
លោក Kihara បាននិយាយថា ប្រទេសជប៉ុននឹងបន្តកិច្ចសហប្រតិបត្តិការជាមួយសមាជិកបណ្តាប្រទេស G7 ផ្សេងទៀត និងសហគមន៍អន្តរជាតិ ដើម្បីជំរុញការដាក់ទណ្ឌកម្មកាន់តែខ្លាំងលើរុស្ស៊ី។
គួរបញ្ជាក់ថា កាលពីថ្ងៃទី៥ ខែតុលា ឆ្នាំ២០២២ ប្រធានាធិបតីរុស្ស៊ី លោក វ្លាឌីមៀរ ពូទីន (Vladimir Putin) បានសម្រេចដាក់បញ្ចូលទឹកដីអ៊ុយក្រែនជាង១៥ភាគរយ មកជាទឹកដីរបស់ខ្លួនជាផ្លូវការ ដែលក្នុងនោះមានតំបន់ចំនួន៤ រួមមាន ដូណេតស្ក៍ (Donetsk) លូហាន់ស៍ (Luhansk) ខឺសុន (Kherson) និង ហ្សាប៉ូរីសហ្ស៉ីយ៉ា (Zaporizhzhia)៕
