ប្រធានាធិបតីតៃវ៉ាន់ លោកស្រី សៃ អ៊ីងវេន (Tsai Ing-wen) បានឱ្យដឹងនៅថ្ងៃចន្ទនេះថា សង្គ្រាមរវាងតៃវ៉ាន់ និងចិន គឺពិតជាមិនមែនជាជម្រើសឡើយ ខណៈលោកស្រីក៏បានបញ្ជាក់សាជាថ្មីអំពីឆន្ទៈក្នុងការពិភាក្សាជាមួយចិន និងសន្យាពង្រឹងការការពារដែនកោះមួយនេះបន្ថែមទៀតផងដែរ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ថ្លែងក្នុងសុន្ទរកថានាថ្ងៃបុណ្យជាតិរបស់កោះតៃវ៉ាន់ នៅខាងក្រៅការិយាល័យរបស់ខ្លួន ប្រធានាធិបតីរូបនេះបានលើកឡើងថា វាពិតជាគួរឱ្យសោកស្ដាយ ដែលប្រទេសចិនបានបង្កើនការបំភិតបំភ័យ និងគំរាមកំហែងដល់សន្តិភាព និងស្ថិរភាពនៅក្នុងច្រកសមុទ្រតៃវ៉ាន់ និងតំបន់។
ទាក់ទិននឹងករណីនេះ លោកស្រីថា៖ «ខ្ញុំចង់បញ្ជាក់ឱ្យច្បាស់ទៅកាន់អាជ្ញាធរទីក្រុងប៉េកាំងថា ការប្រឈមមុខដាក់គ្នាប្រដាប់ដោយអាវុធ គឺពិតជាមិនមែនជាជម្រើសសម្រាប់ភាគីទាំងពីររបស់យើងនោះទេ»។
លោកស្រីបន្ថែមថា៖ «មានតែការគោរពដល់ការប្តេជ្ញាចិត្តរបស់ប្រជាជនតៃវ៉ាន់ ចំពោះអធិបតេយ្យភាព លទ្ធិប្រជាធិបតេយ្យ និងសេរីភាពរបស់យើងប៉ុណ្ណោះ ទើបអាចជាមូលដ្ឋានគ្រឹះសម្រាប់ការបន្តទំនាក់ទំនងឡើងវិញនៅទូទាំងច្រកសមុទ្រតៃវ៉ាន់»។
គួរបញ្ជាក់ថា ភាពតានតឹងរវាងតៃវ៉ាន់ និងចិន បានកើនឡើងខ្លាំងក្នុងរយៈពេលចុងក្រោយនេះ ខណៈដែលចិននៅតែបន្តអះអាងថា តៃវ៉ាន់គឺជាទឹកដីរបស់ខ្លួន។
ទោះជាយ៉ាងណា តៃវ៉ាន់ធ្លាប់បានលើកឡើងថា ខ្លួននឹងបន្តពង្រឹងការការពាររបស់ខ្លួន ដើម្បីធានាឱ្យបានថាគ្មាននរណាម្នាក់អាចបង្ខំឱ្យកោះនេះ ទទួលយកផ្លូវដែលចិនបានរៀបចំដោយមិនផ្តល់សេរីភាព និងប្រជាធិបតេយ្យនោះទេ៕