យោងតាមប្រភពមួយបានឱ្យដឹងថា តុលាការដែលគ្រប់គ្រងដោយរបបយោធាមីយ៉ាន់ម៉ា នៅថ្ងៃពុធនេះ បានកាត់ទោសអតីតមេដឹកនាំមីយ៉ាន់ម៉ាដែលត្រូវបានទម្លាក់ពីតំណែង លោកស្រី អ៊ុងសាន ស៊ូជី ឱ្យជាប់ពន្ធនាគាររយៈពេល៣ឆ្នាំបន្ថែមទៀត ពីបទ «ទទួលសំណូក»។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ម្ចាស់ពានរង្វាន់ណូបែលសន្តិភាព អាយុ៧៧ឆ្នាំរូបនេះ បច្ចុប្បន្ន ត្រូវបានតុលាការចោទប្រកាន់ពីបទប្រព្រឹត្តបទល្មើសប្រមាណ២០ករណីហើយ ដែលក្នុងនោះរួមមាន ការនាំចូលអាយកូមដោយខុសច្បាប់ បទរំលោភវិធានការទប់ស្កាត់វិបត្តិកូវីដ-១៩ បទរំលោភការសម្ងាត់រដ្ឋ និងបទចោទធ្ងន់ធ្ងរមួយចំនួនទៀត ដែលអាចនឹងជាប់ពន្ធនាគារសរុបរហូតដល់ប្រមាណជា១៩០ឆ្នាំ បើតុលាការរកឃើញថា លោកស្រីមានកំហុសក្នុងសំណុំរឿងទាំងនេះ។
ទោះជាយ៉ាងណា បទចោទទាំងអស់នេះត្រូវបានច្រានចោលដោយលោកស្រី អ៊ុងសាន ស៊ូជី។
ប្រទេសមីយ៉ាន់ម៉ា បានធ្លាក់ចូលក្នុងភាពច្របូកច្របល់ គិតចាប់តាំងពីក្រុមយោធាបានដណ្តើមយកអំណាចមកគ្រប់គ្រងកាលពីខែកុម្ភៈឆ្នាំមុន និងបានផ្តួលរំលំរដ្ឋាភិបាលជាប់ឆ្នោតរបស់លោកស្រី អ៊ុងសាន ស៊ូជី ដែលបង្កឱ្យមានជាបាតុកម្មកើតឡើងជាញឹកញាប់នៅក្នុងប្រទេស ក្នុងនោះ ជនស៊ីវិលរាប់ពាន់នាក់ក៏ត្រូវបានសម្លាប់នៅក្នុងការបង្ក្រាបកូដកម្ម និងបាតុកម្មនានាផងដែរ៕