ប្រជាពលរដ្ឋមួយចំនួននៅស្រុកបូទុមសាគរ ខេត្តកោះកុង អំពាវនាវទៅរដ្ឋាភិបាលជួយអន្តរាគមន៍ទៅអាជ្ញាធរពាក់ព័ន្ធពន្លឿនការដោះស្រាយវិវាទដីធ្លីជូនពួកគេឱ្យឆាប់ និងមានតម្លាភាព ខណៈអាជ្ញាធរចោទពួកគាត់ថាបានចូលទៅអាស្រ័យផលលើដី «ឧទ្យានជាតិបូទុមសាគរ» ដោយខុសច្បាប់។
វ័យ៦០ឆ្នាំ អ្នកស្រី ភន ណៃស៊ី ដែលអះអាងថាជាតំណាងប្រជាពលរដ្ឋនៅភូមិចម្លងគោ ឃុំថ្មស ស្រុកបូទុមសាគរ ខេត្តកោះកុង បានរៀបរាប់ប្រាប់វីអូឌីនៅថ្ងៃអង្គារនេះថា កន្លងមក ពួកគាត់ជាង១០០គ្រួសារបាននាំគ្នាយកញត្តិដាក់ទៅអាជ្ញាធរមូលដ្ឋាន អាជ្ញាធរខេត្ត និងក្រសួងមហាផ្ទៃ ដើម្បីស្នើសុំឱ្យថ្នាក់ដឹកនាំស្ថាប័នទាំងនោះជួយអន្តរាគមន៍ដោះស្រាយបញ្ហាដីធ្លីជូនប្រជាពលរដ្ឋឱ្យបានឆាប់ និងមានតម្លាភាព។ ប៉ុន្តែអ្នកស្រីថា គិតត្រឹមថ្ងៃនេះ មានរយៈពេលជិត១ឆ្នាំមកហើយ អាជ្ញាធរទាំងនោះនៅតែមិនទាន់មានការដោះស្រាយបញ្ចប់វិវាទដីធ្លីជូនពួកគាត់នៅឡើយទេ ហើយបែរជាអាជ្ញាធរមូលដ្ឋានចោទពួកគាត់ថាចូលទៅអាស្រ័យផលលើដី «ឧទ្យានជាតិបូទុមសាគរ» ដោយខុសច្បាប់ថែមទៀត។
អ្នកស្រីលើកឡើងថា៖ «សូមឱ្យសម្ដេច និងអាជ្ញាធរថ្នាក់ក្រោម អាជ្ញាធរគ្រប់ជាន់ថ្នាក់ ពន្លឿនការដោះស្រាយពីបញ្ហាដីធ្លីដែលមានទំនាស់ឱ្យពួកខ្ញុំឱ្យបានមុនការបោះឆ្នោត ពីព្រោះពួកខ្ញុំសុទ្ធតែអ្នកអត់ដី អត់ផ្ទះ អត់មានមុខរបរទេ នេសាទក៏អត់បាន ទៅខាងសមុទ្រគេចាប់ទៀត។ ខ្ញុំអាយុ៦០ឆ្នាំហើយ អត់មានមុខរបរទៀត។ រាល់ថ្ងៃ ខ្ញុំសង្ឃឹមតែចម្ការបន្តិចបន្តួច អាស្រ័យផលដាំគ្រាន់បានលក់ដូរ»។
អ្នកស្រី ព្រែក ផាន់នី តំណាងប្រជាពលរដ្ឋម្នាក់ទៀត និយាយថា ដីទំហំជាង៤០០ហិកតានោះត្រូវបានប្រជាពលរដ្ឋកាន់កាប់ និងចូលទៅអាស្រ័យផលលើដីកំពុងមានបញ្ហានោះ តាំងពីចន្លោះឆ្នាំ២០០៤ និង២០០៦ ជាបន្តបន្ទាប់មក។ ក្រោយមក នៅចុងឆ្នាំ២០២១ អ្នកស្រីថា អាជ្ញាធរបានចូលឈូសឆាយ កាប់បំផ្លាញដំណាំ និងវាយកម្ទេចផ្ទះរបស់ប្រជាពលរដ្ឋនៅក្នុងចម្ការអស់ប្រមាណជា៣០គ្រួសារ ព្រមទាំងចោទប្រជាពលរដ្ឋថាចូលទៅអាស្រ័យផលលើដី «ឧទ្យានជាតិបូទុមសាគរ» ដោយខុសច្បាប់ថែមទៀតផង។
អ្នកស្រីបន្តថា ក្រោយមានវិវាទដីធ្លីនេះ ពលរដ្ឋជួបបញ្ហាប្រឈមច្រើនក្នុងជីវភាពគ្រួសារ ដោយសារអាជ្ញាធរបានធ្វើរបងព័ទ្ធជុំវិញដីមានជម្លោះ ហើយមិនអនុញ្ញាតឱ្យពលរដ្ឋចូលទៅអាស្រ័យផល ខណៈពលរដ្ឋមួយចំនួនកំពុងជាប់បំណុលធនាគារផងដែរ។
អ្នកស្រីនិយាយថា៖ «គ្មានមុខរបរទេ មានតែដាំដំណាំ ស្លឹកគ្រៃ និងដំណាំទូទៅ ដើម្បីដោះស្រាយអាស្រ័យផល យកទៅផ្សារ បានដោះដូរខ្លះ។ ឥលូវជាប់លុយគេទៀត ហើយគ្នាអត់មានការងារធ្វើ ផ្ទះក៏អត់មាននៅ ផ្ទះក៏គេរំលំអស់ ពិបាកចិត្តណាស់ ពិបាកខ្លាំងណាស់ ឥលូវនិយាយលែងចេញហ្មង»។
វីអូឌី មិនអាចសុំការបញ្ជាក់ពីអ្នកនាំពាក្យក្រសួងមហាផ្ទៃ លោក ផាត សុផានិត និងប្រធានមន្ទីរបរិស្ថានខេត្តកោះកុង លោក ហ៊ុន ម៉ារ៉ាឌី បានទេ នៅថ្ងៃនេះ ។
ប៉ុន្តែកន្លងមក ប្រធានមន្ទីរបរិស្ថានខេត្តកោះកុង លោក ហ៊ុន ម៉ារ៉ាឌី ធ្លាប់ប្រាប់វីអូឌីថា ករណីអាជ្ញាធរចុះកាប់បំផ្លាញដំណាំពលរដ្ឋនោះ ដោយសារតែពួកគេចូលទៅអាស្រ័យផលក្នុងតំបន់ «ឧទ្យានជាតិបូទុមសាគរ» ដែលជាតំបន់ការពារ។
លោកថា៖ «ដោយពួកគាត់ចូលអាស្រ័យផលក្នុងតំបន់ឧទ្យានជាតិ។ ឥលូវខ្ញុំកំពុងប្រជុំជាមួយខេត្ត ជុំវិញរឿងនេះ ការកាត់ឆ្វៀលឬដោះស្រាយយ៉ាងណានោះ គឺរដ្ឋាភិបាលជាអ្នកសម្រេច ខ្ញុំគ្មានសិទ្ធិនោះទេ»។
មន្រ្តីសម្របសម្រួលអង្គការការពារសិទ្ធិមនុស្សលីកាដូប្រចាំខេត្តកោះកុង លោក ហ៊ួរ អ៊ីន ដែលតាមដានរឿងនេះ លើកឡើងថា អាជ្ញាធរមិនព្រមដោះស្រាយបញ្ហាដីធ្លីជូនប្រជាពលរដ្ឋ ជាការលម្អៀងទៅក្រុមហ៊ុនឯកជនមួយចំនួន ពីព្រោះដីនៅក្នុងតំបន់ឧទ្យានជាតិបូទុមសាគរនេះ រដ្ឋាភិបាលក៏បានកាត់មួយផ្នែកទៅឱ្យក្រុមហ៊ុនឯកជនមួយចំនួន ក្នុងនោះក៏មានក្រុមហ៊ុនរបស់លោកឧកញ៉ា គិត ម៉េង ផងដែរ។
ករណីនេះ លោកថា ដើម្បីផ្តល់យុត្តិធម៌ដល់ប្រជាពលរដ្ឋដែលកំពុងរងគ្រោះ រដ្ឋាភិបាលត្រូវជំរុញទៅអាជ្ញាធរពាក់ព័ន្ធពន្លឿនដោះស្រាយដីធ្លីនោះជូនប្រជាពលរដ្ឋឱ្យបានឆាប់។
លោកលើកឡើងថា៖ «អាជ្ញាធរត្រូវធ្វើការសិក្សាស្រាវជ្រាវឱ្យបានច្បាស់អំពីស្ថានភាពរស់នៅរបស់ប្រជាពលរដ្ឋដែលពួកគាត់រស់នៅជាក់ស្តែង ថាតើប្រជាពលរដ្ឋរស់នៅកន្លែងហ្នឹងពិតឬអត់ទេ? គាត់ពិតជាខ្វះដីមែនក៏អត់ទេ? ដើម្បីធ្វើការដោះស្រាយដល់ពួកគាត់ មិនអាចរុះរើដោយបង្ខំ មិនមែនជាដំណោះស្រាយល្អទេ»៕
