រដ្ឋាភិបាល​កាត់ផ្ទៃដី​បឹងតាមោក​ទំហំ​៦៧ហិកតា​ឱ្យ​ទៅ​នាយក​ក្រុមហ៊ុន​អចលនវត្ថុ​មួយ

បុរសម្នាក់ឈរសម្លឹងមើលទៅផ្ទៃទឹកដ៏ធំល្វឹងល្វើយនៃបឹងតាមោក ថ្ងៃទី២២ ខែកញ្ញា ឆ្នាំ២០២២។ (ត្រាន់ តិចសេង)

រដ្ឋាភិបាល​ តាមរយៈអនុក្រឹត្យមួយ​បានកាត់ផ្ទៃដីបឹងតាមោក ​​​ក្នុង​រាជធានី​ភ្នំពេញ ទំហំ៦៧ហិកតា ឱ្យ​ទៅ​​អ្នក​ជំនួញ​មួយ​រូប​ដែលត្រូវបានស្គាល់ថាមានទំនាក់ទំនងជាមួយនឹងកូនស្រីលោកនាយករដ្ឋមន្ត្រី ហ៊ុន សែន។

ផ្ទៃ​បឹងតាមោក ក្នុងរយៈពេលប៉ុន្មានឆ្នាំចុងក្រោយនេះ ត្រូវបានរដ្ឋាភិបាលកាត់ឱ្យ​ទៅ​អ្នក​ជំនួញធំៗ និងសែស្រឡាយមន្រ្តីជាន់ខ្ពស់​ជាបន្តបន្ទាប់ ដែលក្នុងនោះ​មានសមាជិកព្រឹទ្ធសភា លោក កុក អាន, លោក​ស្រី ជា សុផាម៉ាដែន​ កូនស្រី​បង្កើត​លោក ជា សុផារ៉ា រដ្ឋមន្ត្រី​ក្រសួង​រៀបចំ​ដែនដី, អគ្គមេបញ្ជា​ការ​​នៃ​កងយោធពល​ខេមរភូមិន្ទ លោក វង្ស ពិសេន និង​អគ្គមេបញ្ជាការ​រង​នៃ​កងយោធពល​ខេមរភូមិន្ទ លោក សៅ សុខា ផងដែរ។

ទាក់ទិននឹងករណីនេះ សកម្មភាពចាក់ដីលុបបឹង​ដើម្បីធ្វើការអភិវឌ្ឍក៏កំពុងតែបន្តធ្វើឡើង ខណៈប្រជា​ពលរដ្ឋ​រស់នៅ​តាម​មាត់​បឹង​ ដែល​ប្រឈម​នឹង​ការ​បណ្តេញ​ចេញ ក៏បាន​នាំគ្នាតវ៉ាផងដែរ។

យោងតាមអនុក្រឹត្យមួយរបស់រដ្ឋាភិបាល ចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពី​ខែ​ឧសភា និងត្រូវបានចេញផ្សាយជាសាធារណៈកាលពី​សប្តាហ៍​មុន បានសម្រេច​កាត់ដីបឹងតាមោក​ទំហំ៦៧ហិកតា ក្នុងសង្កាត់ពន្សាំង​ ខណ្ឌព្រែកព្នៅ រាជធានីភ្នំពេញ ទៅឱ្យ​​លោក នុត តុន ដែលត្រូវ​បាន​ស្គាល់​ថាជា​នាយកក្រុមហ៊ុន អ័រគីដេ វីឡា (Orkide Villa)

គួរ​បញ្ជាក់ថា ក្រុមហ៊ុន អ័រគីដេ វីឡា ដែល​ដឹកនាំដោយកូនស្រីលោកនាយករដ្ឋមន្ត្រី ហ៊ុន សែន គឺ​អ្នកស្រី ហ៊ុន ម៉ាណា ផងដែរនោះ ក៏មាន​នាយកក្រុមហ៊ុនផ្សេង គឺអ្នកស្រី ខៀវ សស៊ីលៀប ដែលជាម្ចាស់ភាគហ៊ុនរបស់ក្រុមហ៊ុនកាប់ឈើដ៏ល្បីឈ្មោះ Timbergreen ផងដែរ។

ជាមួយគ្នានេះ កូនស្រីលោកនាយករដ្ឋមន្ត្រី​ម្នាក់​ទៀត​ គឺអ្នកស្រី ហ៊ុន ម៉ាលី និង​កូន​ប្រសា ​អ្នកស្រី ពេជ្រ ច័ន្ទមុនី ក៏ត្រូវបានរកឃើញថា ​ជា​នាយក​ក្រុមហ៊ុន​ផ្សេង​ទៀត​ ដែល​មាន​ទំនាក់​ទំនង​ជាមួយក្រុមហ៊ុន អ័រគីដេ នេះផងដែរ។

លោក នុត តុន កាលពីពេលកន្លងទៅ ក៏ធ្លាប់ទទួលបាន​ដីទំហំ៩៣​ហិកតា​ នៅ​ក្នុងស្រុក​ស្ទឹងហាវ ខេត្ត​ព្រះសីហនុ ខណៈអាពាហ៍ពិពាហ៍​របស់​លោក​កាល​ពី​ខែ​កុម្ភៈ ក៏មាន​ការ​ចូល​រួម​ដោយ​ក្រុម​គ្រួសារ​លោកនាយករដ្ឋមន្ត្រី ហ៊ុន សែន និង​អ្នក​មាន​អំណាច​ជា​ច្រើន​នៅ​​ក្នុង​ប្រទេសផងដែរ។

ទាក់ទិននឹងករណីនេះ ចៅសង្កាត់ពន្សាំង ខណ្ឌព្រែកព្នៅ លោក ឈួន ឆាំ បានឱ្យដឹងថា រូបលោក​មិន​បាន​ដឹង​ពី​ការធ្វើឯកជនភាវូបនីយកម្ម [ផ្ទៃដីបឹងតាមោក] ឬ​អ្នកណាដែលត្រូវ​ទទួលបានឡើយ។

លោក​បន្ត​ថា ឃុំ​នេះ​មាន​ផ្ទៃ​ដី​ប្រមាណជា៥ ០០០​​ហិកតា និង​មាន​ប្រជាជន​ជាង២ ០០០​​គ្រួសារ​រស់នៅ។

លោកថា៖ «ខ្ញុំ​មិន​ដែល​ឮ​ពីគាត់ ​និង​អ្នកដទៃទៀត [ដែលទទួលបានដីបឹងតាមោក] ឡើយ។ ដី​របស់​យើង​ត្រូវ​បាន​កាត់​យកក្នុងចំនួន​ជា​ច្រើន និងនៅសេស​សល់​​ក្នុង​ចំនួនតិច​តួចតែប៉ុណ្ណោះ។ ដី​នៅ​ជុំវិញ​បឹង​តាមោក ​ត្រូវ​បាន​គេ​ចាក់​ពេញ​អស់ហើយ ខណៈគ្មាន​ដី​​ទំនេរទៀតនោះទេ»។

ពលរដ្ឋរស់​នៅ​បឹងតាមោកមួយរូបដែលតវ៉ានឹងការបណ្ដេញចេញ អ្នកស្រី ប្រាក់ សុភា បាន​​លើក​ឡើងកាល​​ពី​ថ្ងៃ​ចន្ទម្សិលមិញ​​ថា ដំណើរ​ការ​នៃ​ការ​អភិវឌ្ឍ ​គឺ​ធ្វើឡើងដោយអយុត្តិធម៌។

ពលរដ្ឋរូបនេះបន្ថែមថា៖ «ផ្ទៃបឹងទាំងមូលដែលជាកេរមរតករបស់ដូនតាយើង ត្រូវបានកាត់យកឱ្យទៅ ស្ថាប័ន និងមន្ត្រីនានា ខណៈ១០៤គ្រួសារដែលរស់នៅលើដីនោះ បែរជាគ្មានដំណោះស្រាយសមស្របអ្វីទៅវិញ»។

យោងតា​មអ​នុក្រឹត្យ​ផ្សេង​ទៀត​ដែលចុះ​ហត្ថលេខា​​ដោយលោកនាយករដ្ឋមន្ត្រី​ ហ៊ុន សែន កាល​​ពី​​ថ្ងៃ​ទី​២០ ខែ​ឧសភា ក្នុងនោះក៏​មានការកាត់​ដី​បឹងតាមោក​ទំហំ៣​ហិកតាឱ្យទៅបុគ្គលឈ្មោះ តាន់​ វណ្ណា និង៨​ហិកតាផ្សេងទៀតឱ្យទៅឈ្មោះ តាំង ច័ន្ទពុទ្ធាវី ផងដែរ។

ទោះជាយ៉ាងណា បុគ្គលទាំង២រូប​នេះមិនអាចកំណត់អត្តសញ្ញាណបានភ្លាមៗនោះទេ៕

បកប្រែនិងសម្រួលចេញពីអត្ថបទដើមភាសាអង់គ្លេស៖ Orkide Director Gets 67 Hectares on Boeng Tamok

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ

VODEnglish.news

VODEnglish.news

Everybody Well-Informed, Everybody Empowered