ប្រធានគណបក្សកាន់អំណាច និងជានាយករដ្ឋមន្រ្តី បានបញ្ជាក់ជំហរជាសាធារណៈថា លោកនឹងដាក់ចេញនូវផែនការយុទ្ធសាស្រ្ត ដើម្បីតាមកម្ទេចអ្នកដែលលោកហៅថាជាក្រុមប្រឆាំងនៅតាមមូលដ្ឋាន ហើយគាំទ្រអង្គការចាត់តាំងដឹកនាំដោយលោក សម រង្ស៊ី។
ការព្រមានជាថ្មីទៀតនៅពេលនេះរបស់លោកនាយករដ្ឋមន្ត្រី ហ៊ុន សែន នៅបន្ទាប់ពីតុលាការរាជធានីភ្នំពេញ កាលពីថ្ងៃពុធម្សិលមិញ បានកាត់ទោសឱ្យលោក សម រង្ស៊ី ជាប់ពន្ធនាគារអស់មួយជីវិត ហើយផាត់អ្នកនយោបាយចាស់វស្សារូបនេះចេញពីសង្វៀននយោបាយជារៀងរហូត។
ថ្លែងប្រាប់ក្រុមអ្នកសារព័ត៌មាន ក្រោយពីលោកបានបញ្ចប់ការប្តូរព័ត៌មានថ្ងៃខែឆ្នាំកំណើតក្នុងបញ្ជីបោះឆ្នោត នាព្រឹកថ្ងៃទី២០ ខែតុលា នៅក្រុងតាខ្មៅ ខេត្តកណ្តាល លោកនាយករដ្ឋមន្រ្តី ហ៊ុន សែន បានប្រតិកម្មខ្លាំងៗ ដោយហៅលោក សម រង្ស៊ី ថាជាអ្នកនយោបាយដែលក្បត់ជាតិ៣ជំនាន់។ ជាងនេះទៀត លោកថែមទាំងអះអាងថា ចំពោះអ្នកនៅតាមមូលដ្ឋានដែលនៅបន្តគាំទ្រអង្គការចាត់តាំងរបស់លោក សម រង្ស៊ី ទៀត នឹងត្រូវកម្ទេចចោលដោយគ្មានការលើកលែងទេ។
បើតាមលោក ហ៊ុន សែន នៅពេលនេះ គម្រោងនៃការបំផ្លាញសំបុកអ្នកគាំទ្រចលនាលោក សម រង្ស៊ី គឺមានការឯកភាពរួចអស់ហើយ ហើយអ្វីដែលលោកចុះទៅមូលដ្ឋានលើកនេះ គឺទិសដៅដើម្បីរៀបចំយុទ្ធសាស្រ្តកម្ទេចក្រុមប្រឆាំង ដែលលោកចាត់ទុកថា ជ្រកក្រោមផ្លាកអង្គការចាត់តាំងរបស់លោក សម រង្ស៊ី ដែរ។
លោកបន្តថា៖ «ខ្ញុំចុះទៅតាមខេត្តនេះ ក៏សំដៅដើម្បីនឹងរៀបចំបណ្ដាញ ដើម្បីនឹងកម្ចាត់ចោលអង្គការចាត់តំាងមនោគមវិជ្ជាជ្រុលនិយមដែលបង្កើតឡើងដោយជនក្បត់ជាតិ៣ជំនាន់នេះផងដែរ។ ឥលូវនេះ មានការគាំទ្រគ្រប់គ្រាន់ហើយ យើងនឹងធ្វើ ហើយខ្ញុំសូមឱ្យមិត្តបរទេសទាំងឡាយ យល់ឱ្យច្បាស់ពីចំណងទាក់ទងហេតុអ្វីបាននាំដល់រឿងនេះ»។
លោកនាយករដ្ឋមន្ត្រី ហ៊ុន សែន បានហៅលោក សម រង្ស៊ី ថាជាជនក្បត់ជាតិ ដោយសារអ្នកនយោបាយរូបនេះបានចុះកិច្ចសន្យាព្រមព្រៀងជាមួយលោក កុក ស កាលពីខែមេសា ឆ្នាំ២០១៣ កាត់ទឹកដីនៃខេត្តចំនួន៤ រួមមាន ខេត្តស្ទឹងត្រែង មណ្ឌលគិរី រតនគិរី និងក្រចេះ ឱ្យទៅជនជាតិដើមភាគតិច ម៉ុងតាញ៉ា ដើម្បីរស់នៅ។ បើគិតមកដល់ពេលនេះ ទោសសរុបរបស់លោក សម រង្ស៊ី តាមផ្លូវតុលាការ គឺលើសពីអាយុពិតរបស់លោកដែលមានសព្វថ្ងៃនេះទៅទៀត។ មូលទោស[ទោសសរុប]ទាំងអស់នេះ ដោយមិនទាន់គិតដល់ទោសដែលតុលាការដាក់ពន្ធនាគារមួយជីវិត កាលពីថ្ងៃទី១៩ ខែតុលា និងបញ្ចប់ការធ្វើនយោបាយជាស្ថាពរទៀតនៅឡើយផង។
បើទោះបែបណា អ្នកនយោបាយដែលហ៊ុមព័ទ្ធទៅដោយបណ្តឹងរាប់មិនអស់រូបនេះ នៅតែអះអាងថា លោកនឹងវិលចូលប្រទេសកម្ពុជាវិញនៅមុនការបោះឆ្នោតជ្រើសតាំងតំណារាស្រ្ត ឆ្នាំ២០២៣ខាងមុខ។
ស្របពេលការប្រកាសជំហរបែបនេះម្តងជាពីរដង លោកនាយករដ្ឋមន្ត្រី ហ៊ុន សែន ឯណេះវិញ ក៏ប្រកាសពីការបើកទ្វារចំហរង់ចាំវត្តមានលោក សម រង្ស៊ី ដែរ។ ប៉ុន្តែលោកនាយករដ្ឋមន្រ្តី លើកឡើងថា ការវិលចូលប្រទេសវិញលើកនេះ គឺវត្តមានរបស់លោក សម រង្ស៊ី ត្រូវស្វាគមន៍ដោយខ្នោះដៃ ហើយលោក ហ៊ុន សែន ខ្លួនឯងក៏រំឭកស្ទើរគ្រប់វេទិកាដែរថា លោកនឹងមិនចុះហត្ថលេខាដើម្បីផ្សះផ្សាបញ្ចប់ជម្លោះនយោបាយស្ទើរតជំនាន់នេះទៀតដែរ។
វីអូឌី មិនអាចទាក់ទងសុំការឆ្លើយតបជុំវិញករណីនេះពីលោក សម រង្ស៊ី សហស្ថាបនិកគណបក្សសង្គ្រោះជាតិដែលតុលាការបានរំលាយ នៅឡើយទេ នៅថ្ងៃព្រហស្បតិ៍នេះ។
ចំណែកលោក ម៉ែន សុថាវរិន្រ្ទ មនុស្សដែលស្និទ្ធនឹងលោក សម រង្ស៊ី បានប្រាប់ វីអូឌី ពីប្រទេសបារាំងតាមបណ្តាញសង្គមថា អ្វីដែលលោកនាយករដ្ឋមន្រ្តីខឹងសម្បា ហើយត្រៀមផែនការកម្ចាត់អ្នកគាំទ្រចលនាលោក សម រង្ស៊ី នេះ ព្រោះតែលោក ហ៊ុន សែន មានភាពអាម៉ាស់នឹងការចាញ់ក្តីនៅប្រទេសបារាំង។ លើសពីនេះ លោកអះអាងថា ផែនការវិលត្រលប់ទៅប្រទេសកម្ពុជាវិញ នៅមុនការបោះឆ្នោត គឺមិនប្រែប្រួលទេ។
មួយវិញទៀត លោក ម៉ែន សុថាវរិន្រ្ទ ថ្លែងថា ទាំងលោក សម រង្ស៊ី និងអ្នកនយោបាយផ្សេងទៀត ដែលនៅជាប់បម្រាមតុលាការ គឺពួកគេនៅតែតស៊ូមតិដើម្បីសង្រ្គោះជាតិ ហើយក៏មិនពាក់ព័ន្ធនឹងបក្សនយោបាយណាមួយនៅក្នុងប្រទេសកម្ពុជាដែរ។ ប៉ុន្តែលោកថា ប្រសិនបើលោក ហ៊ុន សែន រៀបចំយុទ្ធសាស្រ្តកម្ទេចអ្នកគាំទ្រក្រុមប្រឆាំងនៅតាមមូលដ្ឋានដូចអ្វីដែលលោកលើកឡើងនេះ នោះជាការសាងកំហុសមួយដ៏ធំសម្រាប់ជីវិតនយោបាយរបស់លោក ហ៊ុន សែន ហើយ។
លោកបន្តថា៖ «នៅពេលនេះ គាត់កំពុងតែឆ្លេឆ្លា និងកំពុងតែបារម្ភមែនទែនហើយ។ រឿងនេះមានន័យថា ដាក់ចំកន្លែងត្រូវ។ លោក សម រង្ស៊ី ដាក់ចំកន្លែងត្រូវហើយ បានគាត់[លោក ហ៊ុន សែន] ខឹងមែនទែនហ្នឹង។ សំខាន់គាត់ចាញ់តុលាការ គាត់[លោក ហ៊ុន សែន] មិនដែលចាញ់សោះ។ គាត់ចាញ់តុលាការនៅប៉ារីស។ រឿងនេះ ពួកខ្ញុំអត់មានបារម្ភទេ ហើយម៉េចទៅរករឿងអ៊ីចឹង? លោកប្រធាន សម រង្ស៊ី គឺពួកយើងនៅតែសង្រ្គោះជាតិ យើងនៅតែទាមទារសង្រ្គោះជាតិ។ ចំណែកអ្នកខាងក្នុងជាសិទ្ធិរបស់គេតើ!»
ការផ្តល់បទសម្ភាសនៅមុខសាលាសង្កាត់ក្រុងតាខ្មៅ នាព្រឹកថ្ងៃព្រហស្បតិ៍នេះ លោកនាយករដ្ឋមន្រ្តី ហ៊ុន សែន បានគំរាមដែរថា បើមានអ្នកគាំទ្រចលនាបក្សប្រឆាំងដែលដឹកនាំដោយលោក សម រង្ស៊ី ងើបមួយ កម្ទេចមួយ។ មិនតែប៉ុណ្ណោះ លោកថា បើបណ្តាបក្សនយោបាយណាមួយ មានសម្ពន្ធមេត្រីភាព ត្រូវប្តឹងទៅតុលាការរំលាយចោលទៀត។
ជុំវិញរឿងនេះ អនុប្រធានគណបក្សភ្លើងទៀន លោក ថាច់ សេដ្ឋា យល់ឃើញថា សារនយោបាយរបស់លោក ហ៊ុន សែន នេះ ឆ្លុះបញ្ចាំងឱ្យឃើញពីរូបភាពនៃការគំរាមកំហែងផ្នែកស្មារតីនៅមុនការបោះឆ្នោតមកដល់។ ក្នុងនាមជាអ្នកនយោបាយ លោកចង់ឃើញអ្នកនយោបាយកំពូលទាំង២រូប វិលមកតុចរចា និងបញ្ចប់វិវាទខាងនយោបាយ ដើម្បីសាមគ្គីភាព ភាពសុខសាន្តរបស់ពលរដ្ឋ និងការរីកចម្រើនផ្នែកសេដ្ឋកិច្ចសម្រាប់ប្រទេសកម្ពុជា។
លោកបន្តថា៖ «យើងពិតជាមានការព្រួយបារម្ភយ៉ាងខ្លាំងទៅលើបរិយាកាសនយោបាយ នៅមុនការបោះឆ្នោតមកដល់នេះ។ ដូច្នេះ យើងសូមអំពាវនាវយ៉ាងទទូច និងអង្វរកដល់អ្នកនយោបាយដែលមានឥទ្ធិពលទាំង២ គឺសម្តេចនាយករដ្ឋមន្រ្តី និងលោក សម រង្ស៊ី សូមបញ្ចប់ការប្រើប្រាស់វោហារសាស្រ្តវាយប្រហារ ឬក៏ឌឺដងដាក់គ្នា ដើម្បីបង្កើតបរិយាកាសនយោបាយល្អប្រសើរមួយនៅមុនពេលបោះឆ្នោត ហើយក៏ដើម្បីបង្ហាញនូវការផ្សះផ្សាជាតិ និងរួបរួមជាតិផងដែរ »។
សម្រាប់លោក សេក សុជាតិ ស្ថាបនិកអង្គការអភិវឌ្ឍន៍ផ្នត់គំនិត យល់ឃើញថា កម្ពុជាអាចនឹងខាតប្រយោជន៍ធំ នៅក្រោយការបោះឆ្នោតជាតិឆ្នាំ២០២៣ ប្រសិនបើភាគីនីមួយៗនៅតែប្រកាន់គោលជំហរដូចសព្វថ្ងៃនេះ ដែលនាំឱ្យជះឥទ្ធិពលមិនល្អទៅដល់ផលប្រយោជន៍ប្រទេសកម្ពុជា។ អ្នកវិភាគរូបនេះមើលឃើញថា ចង់ឬមិនចង់ ប្រសិនបើបរិយាកាសនយោបាយនៅតែបន្តតានតឹងបែបនេះ ប្រាកដណាស់នឹងនាំឱ្យប៉ះពាល់ខ្លាំងទៅដល់ដំណើរការបោះឆ្នោត ជ្រើសតាំងតំណាងរាស្រ្ត ក្នុងខែកក្កដាខាងមុខនេះ។
លោកបន្តថា៖ «បញ្ហាទាំងអស់នេះ វាគឺជារឿងមួយដែលរសើប ហើយវាអាចធ្វើឱ្យសហគមន៍អន្តរជាតិមើលឃើញកម្ពុជាក្នុងផ្លូវអវិជ្ជមាន ផ្លូវមិនល្អ ហើយអាចនឹងទាត់ចោលលទ្ធផលមុនការបោះឆ្នោត។ លទ្ធផលបោះឆ្នោតនៅឆ្នាំ២០២៣ ក៏ពិបាកក្នុងការទទួលយកដែរ ពីព្រោះពេលដែលអន្តរជាតិអត់មានការគាំទ្រ អ៊ីចឹងរដ្ឋាភិបាលអាណត្តិទី៧ ក្រោយការបោះឆ្នោតហ្នឹង ក៏មានរូបភាពមិនសូវល្អ ហើយក៏អាចនឹងទទួលរងនូវទណ្ឌកម្ម ឬក៏ការដាក់កំហិត ឬក៏ចំណងការទូតមួយចំនួន វាកាន់តែមានភាពយ៉ាប់យ៉ឺនជាងមុន»។
ជុំវិញបរិយាកាសនយោបាយ និងលំហសេរីភាពខាងនយោបាយនៅក្នុងប្រទេសកម្ពុជានេះ សភាអឺរ៉ុប កាលពីដើមខែឧសភា ឆ្នាំ២០២២ កន្លងទៅនេះ បានព្រមានផ្តាច់ប្រព័ន្ធអនុគ្រោះពន្ធ ឬហៅ កាត់ថា EBA ទាំងស្រុង បន្ថែមពីលើការព្យួរ EBA ២០% កាលពីលើកមុនពីប្រទេសកម្ពុជា។
ការព្រមានដ៏កម្របែបនេះធ្វើឡើងតាមរយៈញត្តិរួមមួយដែលគាំទ្រដោយតំណាងរាស្រ្តសមាជិកសភាអឺរ៉ុប ៥២៦រូប លើ ៥៩៤រូប។ សភាអឺរ៉ុប តាមរយៈគណៈកម្មការរបស់ខ្លួនដែលមានសមាជិកទាំង២៧ប្រទេស ត្រូវឃ្លាំមើលដោយម៉ត់ចត់ និងដិតដល់អំពីដំណើរការបោះឆ្នោតទាំងថ្នាក់ឃុំសង្កាត់ និងថ្នាក់ជាតិឆ្នាំ២០២៣ ហើយបើរកឃើញថាការបោះឆ្នោតទាំង២លើកនេះប្រព្រឹត្តទៅមិនសេរី ត្រឹមត្រូវ និងយុត្តិធម៌ទេ ប្រព័ន្ធអនុគ្រោះពន្ធដែលនៅសេសសល់បន្ថែមទៀតនេះ នឹងត្រូវកាត់ផ្តាច់តែម្តង៕
