សហរដ្ឋអាមេរិកកំពុងពិចារណាលើផែនការផលិតអាវុធរួមគ្នាជាមួយតៃវ៉ាន់ ដែលជាគំនិតផ្ដួចផ្ដើមមួយមានបំណងពន្លឿនការផ្ទេរអាវុធ ដើម្បីជួយពង្រឹងការការពាររបស់ទីក្រុងតៃប៉ិ ពីប្រទេសចិន។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២០ ខែតុលា ឆ្នាំ២០២២នេះ។
ប្រធានាធិបតីអាមេរិក លោក ចូ បៃឌិន បានអនុម័តលើការលក់សព្វាវុធជាង២០ពាន់លានដុល្លារទៅឱ្យតៃវ៉ាន់ចាប់តាំងពីឆ្នាំ២០១៧ ខណៈប្រទេសចិន បានបង្កើនសម្ពាធយោធាលើដែនកោះមួយនេះ ដែលទីក្រុងប៉េកាំងអះអាងថាជាទឹកដីរបស់ខ្លួន។
ទោះយ៉ាងណា តៃវ៉ាន់ និងសភាអាមេរិក បានលើកឡើងអំពីភាពយឺតយ៉ាវក្នុងការដឹកជញ្ជូនអាវុធ ដោយសារតែការលំបាកនៃខ្សែចង្វាក់ផ្គត់ផ្គង់ និងតម្រូវការកើនឡើង ដោយសារសង្គ្រាមនៅអ៊ុយក្រែន។
លោក រូពឺត ហ៊ែម៉ុន ឆាមប៊ឺស៍ (Rupert Hammond-Chambers) ប្រធានក្រុមប្រឹក្សាធុរកិច្ចអាមេរិក-តៃវ៉ាន់ បាននិយាយអំពីផែនការនេះថា៖ «មានដំណើរការល្អ នៅពេលចាប់ផ្ដើដំបូង»។
លោក Hammond-Chambers បាននិយាយថា មិនទាន់មានការកំណត់ថាតើអាវុធប្រភេទណាខ្លះនឹងត្រូវយកមកពិចារណាក្នុងការផលិតឡើយ។ ទោះយ៉ាងណា ផែនការនេះទំនងជានឹងផ្ដោតលើការផ្ដល់ឱ្យតៃវ៉ាន់នូវសព្វាវុធបន្ថែម និងបច្ចេកវិទ្យាមីស៊ីលរយៈចម្ងាយឆ្ងាយ។
ទោះយ៉ាងណា លោកបានលើកឡើងថា ចំណាត់ការនេះនឹងតម្រូវឱ្យអ្នកផលិតសព្វាវុធទទួលបានអាជ្ញាបណ្ណសហការផលិតពីក្រសួងការពារជាតិ។
លោក Hammond-Chambers បានបន្ថែមថា រដ្ឋាភិបាលសហរដ្ឋអាមេរិកអាចមានការលំបាកក្នុងការចេញអាជ្ញាបណ្ណផលិតកម្មរួមគ្នា ដោយសារតែការលំបាកក្នុងការអនុម័តលើបច្ចេកវិទ្យាសំខាន់សម្រាប់កម្មវិធីបរទេស។
ទីភ្នាក់ងារសារព័ត៌មាន Nikkei របស់ជប៉ុន បានរាយការណ៍ថា សហរដ្ឋអាមេរិកអាចនឹងផ្តល់បច្ចេកវិទ្យាដើម្បីផលិតអាវុធឱ្យតៃវ៉ាន់ ឬផលិតអាវុធនៅសហរដ្ឋអាមេរិក ដោយប្រើគ្រឿងបន្លាស់របស់តៃវ៉ាន់។
នៅពេលសួរអំពីផែនការនេះ អ្នកនាំពាក្យក្រសួងការបរទេសអាមេរិកបាននិយាយថា៖ «សហរដ្ឋអាមេរិកកំពុងសម្លឹងមើលគ្រប់ជម្រើស ដើម្បីធានាបាននូវការផ្ទេរសមត្ថភាពការពារយ៉ាងឆាប់រហ័សទៅកាន់កោះតៃវ៉ាន់»។
អ្នកនាំពាក្យរូបនេះបន្តថា៖ «ការផ្តល់យ៉ាងឆាប់រហ័សរបស់សហរដ្ឋអាមេរិក នូវសព្វាវុធការពារតៃវ៉ាន់ និងការទ្រទ្រង់ គឺចាំបាច់សម្រាប់សន្តិសុខរបស់តៃវ៉ាន់។ ហើយយើងនឹងបន្តធ្វើការជាមួយឧស្សាហកម្ម ដើម្បីគាំទ្រដល់គោលបំណងនោះ»។
ប្រធានាធិបតីចិន លោក ស៊ី ជីនពីង (Xi Jinping) បាននិយាយថា ប្រទេសចិននឹងមិនបោះបង់សិទ្ធិក្នុងការប្រើប្រាស់កម្លាំងលើកោះតៃវ៉ាន់នោះទេ ប៉ុន្តែលោកថា ប្រទេសចិននឹងខិតខំស្វែងរកដំណោះស្រាយដោយសន្តិវិធី។
ការិយាល័យប្រធានាធិបតីតៃវ៉ាន់ បានលើកឡើងនៅសប្តាហ៍នេះថា តៃវ៉ាន់នឹងមិនបោះបង់ការទាមទារអធិបតេយ្យភាពរបស់ខ្លួនឡើយ។
មន្ត្រីអាមេរិកបាននិងកំពុងជំរុញតៃវ៉ាន់ឱ្យធ្វើទំនើបកម្មយោធារបស់ខ្លួន ដើម្បីអាចការពារខ្លួនពីការវាយប្រហាររបស់ចិន។
មន្ត្រីអាមេរិកបានរិះគន់ទីក្រុងប៉េកាំង ចំពោះការប្រើប្រាស់ដំណើរទស្សនកិច្ចរបស់ប្រធានសភាអាមេរិក លោកស្រី ណានស៊ី ផេឡូស៊ី (Nancy Pelosi) ទៅកាន់កោះតៃវ៉ាន់ កាលពីខែសីហា ជាលេសដើម្បីផ្លាស់ប្តូរស្ថានភាពនៅច្រកសមុទ្រតៃវ៉ាន់ ដោយបង្កើនសមយុទ្ធយោធានៅក្បែរច្រកសមុទ្រតៃវ៉ាន់៕
