ក្រុមស្ត្រីថ្ងៃសុក្រ បាននាំគ្នាយកញត្តិទៅដាក់នៅស្ថានទូតប្រទេសលោកសេរីប្រចាំនៅប្រទេសកម្ពុជា ចំនួន៣ ដើម្បីស្នើសុំឱ្យជួយជំរុញទៅរដ្ឋាភិបាលកម្ពុជាគោរពកិច្ចព្រមព្រៀងសន្តិភាពទីក្រុងប៉ារីស និងអន្តរាគមន៍ឱ្យមានការដោះលែងស្វាមីនិងសាច់ញាតិរបស់ពួកគេដែលកំពុងជាប់ពន្ធនាគារ។
ស្ថានទូតប្រទេសលោកសេរីទាំង៣ ដែលក្រុមស្ត្រីថ្ងៃសុក្របានដាក់ញត្តិនោះ រួមមាន ស្ថានទូតជប៉ុន ស្ថានទូតអាមេរិក និងស្ថានទូតបារាំង។ ប្រទេសលោកសេរីទាំង៣នេះក៏ជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ២៣ តុលា ១៩៩១។
អ្នកស្រី ព្រំ ចាន់ថា ភរិយាលោក កាក់ កុម្ភារ ដែលជាសកម្មជនបក្សសង្គ្រោះជាតិដែលត្រូវតុលាការ ប្រាប់អ្នកសារព័ត៌មាននៅពេលដាក់ញត្តិថា មូលហេតុដែលពួកគាត់ស្នើទៅស្ថានទូតប្រទេសទាំង៣ឱ្យជួយ ដោយសារបច្ចុប្បន្ន រដ្ឋាភិបាលកម្ពុជាមិនបានគោរពទៅតាមកិច្ចព្រមព្រៀងសន្តិភាពទីក្រុងប៉ារីសទេ ទោះបីជាកម្ពុជាក៏ជាម្ចាស់ហត្ថលេខីដែរនោះ។
អ្នកស្រីបន្តថា រដ្ឋាភិបាលមិនបានគោរព និងអនុវត្តតាមកិច្ចព្រមព្រៀងសន្តិភាពទីក្រុងប៉ារីស ដោយបន្តរំលោភសិទ្ធិមនុស្ស និងធ្វើទុក្ខបុកម្នេញសកម្មជនបក្សប្រឆាំង អ្នកការពារសិទ្ធិមនុស្ស ព្រមទាំងសកម្មជនបរិស្ថាន ជាដើម។
អ្នកស្រីថា៖ «ជាពិសេស រដ្ឋាភិបាលស្រុកខ្មែរ គាត់ធ្វើបាបប្រជាពលរដ្ឋបែបម៉េច? អ៊ីចឹងគាត់អាចជំរុញរដ្ឋាភិបាល ដើម្បីឱ្យមានការដោះលែងក្រុមគ្រួសារពួកខ្ញុំ ឬក៏គោរពច្បាប់ គោរពសិទ្ធិ ហើយនឹងមានប្រជាធិបតេយ្យពិតប្រាកដឡើងវិញ។ ខ្ញុំគិតបែបហ្នឹង ទើបខ្ញុំរត់រកជាពិសេស គឺទូត ប្រទេសប្រជាធិបតេយ្យទាំងអស់»។
លោកស្រី អៀប សួគ៌ ភរិយារបស់លោក គង់ សំអាន ដែលជាសកម្មជនគណបក្សសង្គ្រោះជាតិដែលតុលាការរំលាយដែរនោះ លើកឡើងថា ពួកគាត់នឹងបន្តស្វែងរកកិច្ចអន្តរាគមន៍ពីស្ថាប័នអន្តរជាតិផ្សេងៗទៀត ដើម្បីឱ្យជួយជំរុញទៅរដ្ឋាភិបាលកម្ពុជាមានការដោះលែងស្វាមីរបស់ពួកគាត់ ដោយថា គិតមកដល់ថ្ងៃនេះ ស្វាមីរបស់គាត់ជាប់ពន្ធនាគារទាំងអយុត្តិធម៌អស់រយៈពេលជាង២ឆ្នាំមកហើយ។
អ្នកស្រីថា៖ «ចាប់ប្ដី ចាប់ប្រពន្ធ ចាប់ពូ មកដាក់ពន្ធនាគារដោយអយុត្តិធម៌ ដូច្នេះ ខ្ញុំសូមឱ្យអស់លោកគិតសាជាថ្មី លើកលែងគាត់ទៅ ព្រោះ[ស្វាមីខ្ញុំ] គាត់អាយុ៧០ឆ្នាំហើយ ដោះលែងគាត់ទៅ។ នារីថ្ងៃសុក្រ នឹងចុះទៅគ្រប់កន្លែង ដើម្បីឱ្យគេជួយ ដើម្បីឱ្យគ្រួសារយើងខ្ញុំទាំងអស់គ្នាបានរួចផុតពីទុក្ខទោសដែលគេចោទ។ គ្មានកំហុសទេ! លោកគ្រូបង្រៀនសុទ្ធតែជាមនុស្សស្លូតបូត បង្រៀនកូនសិស្ស មិនបង្រៀនអាក្រក់ទេ សុទ្ធតែនាំឱ្យស្រឡាញ់ជាតិ។ ដូច្នេះ អាជ្ញាធរទាំងអស់សូមគិតសាជាថ្មី លើកលែងគាត់ទៅ ២ឆ្នាំជាងហើយ ដែលប្រពន្ធកូនវេទនានៅផ្ទះ»។
វីអូឌី មិនអាចសុំការបញ្ជាក់ជុំវិញការដាក់ញត្តិរបស់ក្រុមស្ត្រីថ្ងៃសុក្រនេះ ពីតំណាងស្ថានទូតទាំង៣បានទេ។
តែយ៉ាងណា អ្នកស្រី ព្រំ ចាន់ថា អះអាងថា ស្ថានទូតជប៉ុន អាមេរិក និងបារាំង បានទទួលយកញត្តិរបស់ពួកគាត់ហើយ និងប្រាប់ពួកគាត់វិញថា រដ្ឋាភិបាលជប៉ុន អាមេរិក និងបារាំង មិនបានព្រងើយកន្តើយចំពោះរឿងរបស់ពួកគាត់ឡើយ។
ប្រធានអង្គភាពអ្នកនាំពាក្យរាជរដ្ឋាភិបាល លោក ផៃ ស៊ីផាន ចាត់ទុកការស្វែងរកកិច្ចអន្តរាគមន៍របស់ក្រុមស្ត្រីថ្ងៃសុក្រ ថាមិនអាចជួយដល់ស្វាមីរបស់ពួកគេបានឡើយ។ លោកបន្តថា ភរិយាសកម្មជនបក្សប្រឆាំងទាំងនោះគួរតែស្វែងរកមេធាវីល្អៗ ដើម្បីមកតតាំងនៅតុលាការ ជាជាងធ្វើការតស៊ូមតិបែបនេះ។
លោកថា៖ «អ្វីដែលគាត់តតាំង សរសេរញត្តិដាក់ទៅតាមស្ថានទូត បើយើងនិយាយទៅ ស្ថានទូតដែលមានកាតព្វកិច្ច គេធ្វើកិច្ចការសហប្រតិបត្តិការជាមួយរាជរដ្ឋាភិបាលតាមផ្លូវការងារទូត គឺមិនមានអ្វីដែលមកលូកលាន់នៅក្នុងសាច់រឿងផ្ទៃក្នុងរបស់យើងទេ។ ចំណែកអ្វីដែលសកម្មជនទាំងអស់នោះយល់ថាជាការរំលោភដល់សិទ្ធិសេរីភាពរបស់ប្ដី គឺគួរតែដោះស្រាយតាមអ្វីដែលជាយន្តការយើងមានចែងក្នុងរដ្ឋធម្មនុញ្ញ គឺតុលាការ»។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត មើលឃើញថា ការរកកិច្ចអន្តរាគមន៍ពីប្រទេសលោកសេរីរបស់ក្រុមស្ត្រីថ្ងៃសុក្រនេះ អាចដោយសារតែពួកគាត់អស់សង្ឃឹមទៅលើស្ថាប័នរបស់រដ្ឋ ក្នុងការដោះលែងស្វាមី និងសាច់ញាតិរបស់ពួកគេដែលកំពុងជាប់ឃុំ ទើបពួកគេងាកទៅរកស្ថានទូតប្រទេសលោកសេរីឱ្យជួយ។
លោកចាត់ទុកការលើកឡើងរបស់មន្ត្រីរដ្ឋាភិបាលថាជារឿងត្រឹមត្រូវ ប៉ុន្តែលោកថា ស្ថានទូតបណ្ដាប្រទេសមួយចំនួនក៏ធ្លាប់ធ្វើកិច្ចអន្តរាគមន៍ឱ្យមានការដោះស្រាយ ឬក៏បានលើកឡើងបញ្ហាទាំងនេះជាមួយមន្ត្រីរដ្ឋាភិបាលដែរ។
លោកថា៖ «បើយើងមើលទៅកិច្ចព្រមព្រៀងទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១ វានៅមានការខ្វែងគំនិតគ្នានៅឡើយ ដែលរដ្ឋាភិបាលលោកថាកិច្ចព្រមព្រៀងនឹងអស់សុពលភាពហើយ ប៉ុន្តែអង្គការសង្គមស៊ីវិល និងបណ្ដាប្រទេសមួយចំនួន យល់ថា កិច្ចព្រមព្រៀងទីក្រុងប៉ារីស វាអស់សុពលភាពតែមួយផ្នែក មួយចំនួនដែលត្រូវបានបញ្ចប់។ ប៉ុន្ទែវាទាក់ទងបញ្ហាលើកកម្ពស់លទ្ធិប្រជាធិបតេយ្យ និងការគោរពសិទ្ធិមនុស្ស ជាដើមហ្នឹង នៅតែបន្តមានសុពលភាព»។
ការរកកិច្ចអន្តរាគមន៍របស់ភរិយាសកម្មជនគណបក្សសង្គ្រោះជាតិដែលតុលាការរំលាយ ធ្វើឡើងបន្ទាប់ពីតុលាការកម្ពុជាបានកាត់ទោសនិងឃុំខ្លួនស្វាមីរបស់ពួកគេឱ្យជាប់ពន្ធនាគារចន្លោះពី៣ទៅ៧ឆ្នាំ ក្រោមបទចោទប្រកាន់ «ញុះញង់ និងរួមគំនិតក្បត់» ពាក់ព័ន្ធនឹងព្រឹត្តិការណ៍វិលចូលប្រទេសកម្ពុជារបស់លោក សម រង្ស៊ី កាលពីថ្ងៃទី៩ ខែវិច្ឆិកា ឆ្នាំ២០១៩៕
