សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ចាត់ទុកការបញ្ជូនដីកាកោះហៅកូដករឱ្យចូលបំភ្លឺជាបន្តបន្ទាប់ ថាជាលេសរបស់ថៅកែក្រុមហ៊ុនណាហ្គា ក្នុងការប្រើប្រាស់ប្រព័ន្ធតុលាការដាក់បន្ទុកលើកម្មកររងគ្រោះ ជំនួសឱ្យការផ្តល់យុត្តិធម៌ដល់ពួកគេ ហើយថាការប្ដឹងផ្ដល់នោះទៀតសោត បង្ហាញពីការរំលោភសិទ្ធិការងារនៅកម្ពុជាមានគ្រប់ទម្រង់។
ការលើកឡើងនេះធ្វើឡើងតាមរយៈសេចក្ដីថ្លែងការណ៍ចុះថ្ងៃទី២១ ខែតុលា របស់សហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ ស្ដីអំពី «ការប្រើប្រាស់ប្រព័ន្ធតុលាការដើម្បីដាក់សម្ពាធកូដករណាហ្គាវើលដ៍ ក្នុងការទាមទារសេរីភាពសហជីព និងសិទ្ធិការងារ» និងបន្ទាប់ពីកូដករជិត១០នាក់បានទទួលដីកាកោះឱ្យចូលឆើ្លយបំភ្លឺនៅសាលាដំបូងរាជធានីភ្នំពេញ ពាក់ព័ន្ធបណ្តឹងថៅកែក្រុមហ៊ុនណាហ្គា។
សេចក្តីថ្លែងការណ៍របស់សហជីពនេះលើកឡើងថា ពួកគេមានការសោកស្តាយចំពោះការប្រើប្រាស់ប្រព័ន្ធតុលាការពីសំណាក់ក្រុមហ៊ុនណាហ្គាវើលដ៍ ដែលបានប្តឹងកម្មករនិយោជិតចូលរួមកូដកម្មដោយសន្តិវិធី បន្ទាប់ពីពួកគេបានប្រើប្រាស់យន្តការឱ្យអស់លទ្ធភាពក្នុងការទាមទាររកដំណោះស្រាយវិវាទដែលមានចែងក្នុងច្បាប់ ប៉ុន្តែគ្មានយន្ដការណាមួយអាចផ្តល់យុត្តិធម៌ដល់ពួកគេ ទើបឈានដល់ការធ្វើកូដកម្ម។
ពួកគេបន្តថា ចាប់តាំងពីថ្ងៃទី៨ ដល់ថ្ងៃទី២១ ខែតុលា ឆ្នាំ២០២២នេះ មានកម្មករនិយោជិតចំនួន៧នាក់ហើយដែលត្រូវបានតុលាការកោះហៅឱ្យចូលបំភ្លឺ ពាក់ព័ន្ធនឹងបទ «រំលោភលើលំនៅឋាន ធ្វើឱ្យខូចខាតដោយចេតនាមានស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់» ក្រោមបណ្តឹងរបស់ក្រុមហ៊ុន ក្នុងនោះក៏មានកម្មករខ្លះទទួលដីកាកោះហៅក្រោយពេលកំណត់ដែលត្រូវចូលបំភ្លឺផងដែរ។
សេចក្តីថ្លែងការណ៍ដដែលបញ្ជាក់ថា ការប្រើប្រាស់ប្រព័ន្ធតុលាការមិនមែនជាដំណោះស្រាយពិតប្រាកដ ដែលធ្វើឱ្យកម្មករនិយោជិតបោះបង់ការទាមទារសិទ្ធិការងារនិងយុត្តិធម៌នៅកន្លែងការងារឡើយ ប៉ុន្តែវាកាន់តែបង្ហាញថាមានការរំលោភសិទ្ធិការងារនៅកម្ពុជា ដោយប្រើប្រាស់គ្រប់ទម្រង់និង គ្រប់រូបភាព ហើយមានស្ថានភាពកាន់តែធ្ងន់ធ្ងរទៅៗ។
ពួកគេបន្ថែមថា៖ «ម៉្យាងវិញទៀត ការប្រើប្រាស់ប្រព័ន្ធតុលាការគ្រាន់តែជាលេសដើម្បីពន្យារពេលមិនផ្តល់យុត្តិធម៌ដល់កម្មករដែលជាជនរងគ្រោះត្រូវបានថៅកែរំលោភបំពាន ទាំងដែលតុលាការគួរត្រូវបានប្រើប្រាស់ដើម្បីផ្តល់យុត្តិធម៌ និងធានាការអនុវត្តសិទ្ធិរបស់កម្មករនិយោជិត»។
សហជីពមួយនេះបានទទូចឱ្យថៅកែណាហ្គាងាកមកគោរពសេរីភាពសហជីព និងសិទ្ធិការងាររបស់កម្មករ និងទម្លាក់ចោលពាក្យបណ្តឹងដែលប្តឹងសហជីពនិងកូដករ ព្រមទាំងបញ្ឈប់ការរើសអើងគ្រប់រូបភាពមកលើសមាជិកសហជីពដែលធ្លាប់ចូលរួមនិងកំពុងធ្វើកូដកម្មផងដែរ។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ថា ការកោះហៅរបស់តុលាការ គឺជារឿងធម្មតានៃការអនុវត្តច្បាប់ទៅតាមគោលការណ៍ និងនីតិវិធី។ លោកថា នីតិវិធីតុលាការ តែកាលណាមានសកម្មភាពបំពានច្បាប់ ហើយមានការប្តឹងផ្តល់ពីភាគីដែលរងផលប៉ះពាល់ នោះតុលាការត្រូវតែអនុវត្តទៅតាមនីតិវិធី ដើម្បីការពារប្រយោជន៍ និងសិទ្ធិស្របច្បាប់របស់ភាគីម្ខាងទៀត។
លោក ជិន ម៉ាលីន ថ្លែងថា៖ «បើយើងមិនចង់ឱ្យមានដីកាកោះ ឬមួយក៏ពាក់ព័ន្ធនឹងផ្លូវច្បាប់អី ទាល់តែយើងកុំធ្វើសកម្មភាពដែលជាការបំពានច្បាប់។ ការតវ៉ាទាមទារ វាជាការអនុវត្តសិទ្ធិរបស់យើង ក៏ប៉ុន្តែតែកាលណាយើងប្រើប្រាស់វាហួសព្រំដែន ឈានទៅការបំពានច្បាប់ សិទ្ធិសេរីភាពរបស់អ្នកដទៃ អាហ្នឹងនាំឱ្យមានការទទួលខុសត្រូវតាមផ្លូវច្បាប់។ ហើយភាគីដែលរងផលប៉ះពាល់ គេអាចមានសិទ្ធិប្តឹង ដើម្បីការពារផលប្រយោជន៍ស្របច្បាប់របស់គេ។ អាហ្នឹងជារឿងធម្មតានៃការអនុវត្តច្បាប់»។
ទោះជាយ៉ាងណា សមាជិកសហជីព និងជាកូដករក្រុមហ៊ុនណាហ្គាវើលដ៍ កញ្ញា អ៊ុក សុភ័ក្រម៉ូលីកា លើកឡើងថា ក្រុមកូដករមិនមានការរាថយ ឬបោះបង់ចោលការតស៊ូមតិនោះទេ បើទោះមានដីកាកោះឱ្យចូលបំភ្លឺជាបន្តបន្ទាប់ពីតុលាការ។
កញ្ញាថា សកម្មភាពតវ៉ារកដំណោះស្រាយវិវាទការងាររបស់កូដករកន្លងមក ធ្វើឡើងទៅតាមច្បាប់ស្តីពីការងារ និងមិនបានបង្កការខូចខាតណាមួយដល់ក្រុមហ៊ុននោះដែរ។
កញ្ញា អ៊ុក សុភ័ក្រម៉ូលីកា លើកឡើងថា៖ «ក្រុមហ៊ុនដាក់ពាក្យបណ្តឹងហ្នឹង គឺគ្រាន់បង្កើតរូបភាពបិទបាំងអំពើល្មើសដែលខ្លួនបានរំលោភសិទ្ធិការងារមកលើកម្មករខ្លួនឯងហ្នឹងទេ។ កូដករធ្វើរាល់ថ្ងៃនេះ ក៏អត់មានប៉ះពាល់ប្រយោជន៍ក្រុមហ៊ុនអីដែរ ព្រោះថាពួកយើងធ្វើទៅតាមសិទ្ធិកូដកម្ម។ ការធ្វើកូដកម្ម គឺទៅឈរនៅមុខប្របនឹងរបងក្រុមហ៊ុន ឬស្ថាប័ន យើងអត់មានបំពានក្រុមហ៊ុនលើសពីច្បាប់អីទេ។ មួយទៀត ខាងសាលារាជធានីភ្នំពេញ និយាយថា ធ្វើកូដកម្មអាចចូលទៅខាងក្នុងទៀត តែពួកយើងអត់ចូលទៅខាងក្នុងហ្នឹងដែរ យើងធ្វើតែទៅតាមច្បាប់ស្តីពីការងារទេ»។
កូដករណាហ្គារូបនេះចង់ឃើញមន្ត្រីពាក់ព័ន្ធបំពេញតួនាទីរបស់ខ្លួន ក្នុងការការពារសិទ្ធិកម្មកររងគ្រោះតាមច្បាប់ ពោលគឺសិក្សាពីដើមចមនៃបញ្ហាដោយមិនលម្អៀង និងអនុវត្តតាមវិជ្ជាជីវៈ ហើយបើរកឃើញថា ក្រុមហ៊ុនបានបញ្ឈប់បុគ្គលិកដោយខុសច្បាប់ស្តីពីការងារ មន្ត្រីអាចបកស្រាយ ព្រមទាំងអនុវត្តឱ្យបានត្រឹមត្រូវទៅតាមច្បាប់ដែលបានចែង។
កញ្ញាបន្តថា៖ «ច្បាប់យើងមានហើយ ច្បាប់យើងល្អហើយ ក៏ប៉ុន្តែមន្ត្រីរបស់យើងមួយចំនួនទេដែលគាត់មិនបានអនុវត្តច្បាប់ហ្នឹង គាត់បែរទៅជាបកស្រាយទៅជារឿងផ្សេងទៅវិញ។ អ៊ីចឹងសូមឱ្យគាត់បកស្រាយទៅតាមច្បាប់ដែលចែងមក។ ច្បាប់របស់ប្រទេសយើងមានល្អហើយ សម្រាប់ការពារផលប្រយោជន៍របស់កម្មករយើង ព្រោះបុគ្គលិកកម្មករគ្មានលុយ គ្មានអំណាចណាទៅប្តឹងដល់តុលាការទេ។ អ៊ីចឹងមានតែយកច្បាប់ការងារ ដើម្បីមកការពារសិទ្ធិសេរីភាព និងផលប្រយោជន៍របស់បុគ្គលិកកម្មករហ្នឹងឯង។ ហើយចុះបើច្បាប់ហ្នឹងចែងហើយ តែមន្ត្រីបែរជាមិនយកទៅអនុវត្តដដែល អ៊ីចឹងបុគ្គលិកកម្មករហ្នឹងមានអីមកការពារ?»
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុននេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា «ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩»។ យ៉ាងណា បុគ្គលិកដែលចេញធ្វើកូដកម្មរយៈពេលជាង១០ខែមកនេះ អះអាងថា ការបញ្ឈប់នោះដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕