កម្ពុជាក្នុងនាមប្រធានអាស៊ាន ជំរុញឱ្យបញ្ឈប់អំពើហិង្សានៅមីយ៉ាន់ម៉ាជាបន្ទាន់ ខណៈខ្លួនមានការព្រួយបារម្ភជាខ្លាំងចំពោះការកើនឡើងនូវអំពើហិង្សាក្នុងប្រទេសនេះ ជាពិសេសការវាយប្រហារតាមអាកាសនាពេលថ្មីៗនេះ ដែលបណ្ដាលឱ្យមនុស្សស្លាប់ និងរងរបួសជាច្រើននាក់។
ការជំរុញនេះធ្វើឡើងតាមរយៈសេចក្ដីថ្លែងការណ៍របស់ប្រធានអាស៊ានដែលបង្ហោះនៅលើទំព័រហ្វេសប៊ុកផ្លូវការរបស់ក្រសួងការបរទេស និងសហប្រតិបត្តិការអន្តរជាតិកម្ពុជា នៅថ្ងៃទី២៥ ខែតុលា ម្សិលមិញ។
សេចក្ដីថ្លែងការណ៍របស់កម្ពុជា ក្នុងនាមប្រធានអាស៊ាន បានលើកឡើងថា អាស៊ានមានការព្រួយបារម្ភយ៉ាងខ្លាំងចំពោះការកើនឡើងនៃអំពើហិង្សាក្នុងប្រទេសមីយ៉ាន់ម៉ានាពេលថ្មីៗនេះ ក្នុងនោះមានការបំផ្ទុះគ្រាប់បែកនៅពន្ធនាគារអ៊ិនសេន ការវាយប្រហារគ្នាក្នុងរដ្ឋការ៉ន និងសេចក្តីរាយការណ៍ថ្មីៗបំផុត ស្ដីពីការវាយប្រហារតាមអាកាសនៅរដ្ឋកាជីន ចំលើទីប្រជុំជនស៊ីវិល ដែលបណ្ដាលឱ្យមានអ្នករងរបួសនិងស្លាប់ជាច្រើននាក់។
ប្រធានអាស៊ានបន្តថា ខ្លួនមានក្ដីសង្វេគជាពន់ពេកចំពោះកំណើនអ្នកស្លាប់និងរបួសកាន់តែច្រើនឡើង និងការរងទុក្ខវេទនាដ៏ធំធេងរបស់ប្រជាជនសាមញ្ញនៅក្នុងប្រទេសមីយ៉ាន់ម៉ា។
ប្រធានអាស៊ានបញ្ជាក់ថា៖ «យើងកត់សម្គាល់ឃើញដោយភ័យព្រួយនូវការប្រយុទ្ធដ៏ខ្លាំងក្លាក្នុងរយៈពេលថ្មីៗនេះ ដែលមិនត្រឹមតែធ្វើឱ្យស្ថានភាពមនុស្សធម៌នៅទូទាំងប្រទេសមីយ៉ាន់ម៉ាកាន់តែយ៉ាប់យ៉ឺនប៉ុណ្ណោះទេ ប៉ុន្តែវាថែមទាំងផ្ទុយនឹងស្មារតីនៃកិច្ចព្រមព្រៀងជាឯកច្ឆន្ទ៥ចំណុចរបស់អាស៊ាន និងធ្វើឱ្យប៉ះពាល់ផងដែរដល់កិច្ចប្រឹងប្រែងរបស់បេសកជនពិសេសនៃប្រធានអាស៊ានស្ដីពីមីយ៉ាន់ម៉ា ក្នុងការនាំមកនូវវឌ្ឍនភាពសម្រាប់ការអនុវត្តកិច្ចព្រមព្រៀងជាឯកច្ឆន្ទ៥ចំណុចនេះ»។
ជាមួយគ្នានេះដែរ ប្រធានអាស៊ានបានជំរុញឱ្យមានការអត់ធ្មត់ជាអតិបរមា និងបញ្ឈប់ជាបន្ទាន់នូវអំពើហិង្សានៅមីយ៉ាន់ម៉ា និងអំពាវនាវដល់គ្រប់ភាគីពាក់ព័ន្ធ ជាពិសេសភាគីដែលមានកម្លាំងខ្លាំងក្លាលើមូលដ្ឋានជាក់ស្ដែង ឱ្យចាត់វិធានការជាក់លាក់ ដើម្បីបង្កលទ្ធភាពឱ្យមានកិច្ចសន្ទនាប្រកបដោយបរិយាបន្ន និងស្ថាបនា ក្នុងការស្វែងរកដំណោះស្រាយដោយសន្តិវិធី និងការបង្រួបបង្រួមជាតិនៅមីយ៉ាន់ម៉ា និងដើម្បីសន្តិភាព សន្តិសុខ និងស្ថិរភាពក្នុងតំបន់។
កាលពីល្ងាចថ្ងៃអាទិត្យ [ទី២៣ ខែតុលា ឆ្នាំ២០២២] មានករណីវាយប្រហារតាមអាកាសដោយយន្តហោះចំនួន៣គ្រឿង បានកើតឡើងនៅរដ្ឋភាគខាងជើងនៃកាជីន (Kachin) នៃប្រទេសមីយ៉ាន់ម៉ា ដោយបានសម្លាប់ជនស៊ីវិល អ្នកចម្រៀងក្នុងស្រុក និងមន្ត្រីនៃកងទ័ពឯករាជ្យកាជីន (KIA) យ៉ាងហោចណាស់៥០នាក់ និងរងរបួសប្រមាណ៧០នាក់។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី២៤ ខែតុលា ឆ្នាំ២០២២។
ក្រុមប្រឆាំង និងប្រព័ន្ធផ្សព្វផ្សាយ បានឱ្យដឹងកាលពីថ្ងៃចន្ទថា ការវាយប្រហារតាមអាកាសនេះកើតឡើងនៅកន្លែងប្រគុំតន្ត្រីមួយក្នុងប្រទេសមីយ៉ាន់ម៉ា ដែលរៀបចំឡើងដោយក្រុមជនជាតិភាគតិចដែលមានជម្លោះជាមួយយោធាដែលកំពុងកាន់អំណាច។ អង្គការសហប្រជាជាតិ និងស្ថានទូតលោកខាងលិច បានថ្កោលទោសការវាយប្រហារនោះ៕
