សមត្ថកិច្ចនៃក្រសួងមហាផ្ទៃ ចាប់ខ្លួនអតីតមេឃុំត្រែងត្រយឹង កូតាមកពីគណបក្សសង្គ្រោះជាតិ អ្នកស្រី កឹម តុលា បន្ទាប់ពីតុលាការរាជធានីភ្នំពេញ ចេញសាលក្រមកំបាំងមុខ ដាក់ពន្ធនាគារ១៨ខែ និងចេញដីកាចាប់ខ្លួន ទាំងសាម៉ីខ្លួនមិនបានដឹងរឿងនោះឡើយ។
ការចាប់ខ្លួនជាថ្មីទៀតនេះកើតឡើងនៅព្រលានយន្តហោះអន្តរជាតិភ្នំពេញ នៅថ្ងៃទី៣០ ខែតុលា ខណៈអតីតសកម្មជនបក្សប្រឆាំងរូបនេះត្រៀមខ្លួនធ្វើដំណើរចេញទៅប្រទេសអាល្លឺម៉ង់។
លោក កែត ឃី មេធាវីការពារក្តីឱ្យអ្នកស្រី កឹម តុលា ថ្លែងថា កូនក្តីរបស់លោកត្រូវបានមន្ត្រីអគ្គស្នងការនគរបាលជាតិ ចាប់ខ្លួននៅព្រលានយន្តហោះ កាលពីម្សិលមិញ ខណៈអ្នកស្រីត្រូវធ្វើដំណើរទៅជួបស្វាមីនៅប្រទេសអាល្លឺម៉ង់។
មេធាវីរូបនេះបន្ថែមថា កូនក្តីលោកមិនបានដឹងថានឹងត្រូវសមត្ថកិច្ចចាប់ខ្លួនឡើយ ប៉ុន្តែពេលចូលដល់អាកាសយាន្តដ្ឋានអន្តរជាតិភ្នំពេញ មន្ត្រីបានពិនិត្យលិខិតឆ្លងដែន រកឃើញថា ស្ថិតក្នុងបញ្ជីខ្មៅ «Blacklist» ក្រោយមកមន្ត្រីអន្តោប្រវេសន៍បានរាយការណ៍ទៅអគ្គស្នងការនគរបាលជាតិ និងចាប់ខ្លួនអ្នកស្រីនៅព្រលានយន្តហោះតែម្តង។
លោកបញ្ជាក់ថា អាជ្ញាធរបានសម្អាងថា ការចាប់ខ្លួននេះគឺដោយសារមានសាលក្រមរបស់តុលាការរាជធានីភ្នំពេញ បានផ្តន្ទាទោសអ្នកស្រីដាក់ពន្ធនាគាររយៈពេល១៨ខែ និងចេញដីកាចាប់ខ្លួនអ្នកស្រី កឹម តុលា តែម្តង។
លោកបន្តថា៖ «គាត់ [អ្នកស្រី កឹម តុលា] ចូលមកនេះ គាត់នឹងតវ៉ានៅចំពោះមុខព្រះរាជអាជ្ញាថា ទី១ រឿងដែលគេចោទគាត់ហ្នឹង គឺជារឿងដដែល ដែលគាត់ធ្លាប់ជាប់គុកម្តងហើយនៅខេត្តកំពង់ស្ពឺ ហើយគេចោទក្នុងអំឡុងពេលដែលគាត់កំពុងតែជាប់គុក។ អ៊ីចឹងគាត់អត់បានធ្វើសកម្មភាពអី អត់បានប្រព្រឹត្តអីខុសដូចការចោទប្រកាន់ទេ ដូច្នេះគាត់សុំឱ្យមានការដោះលែងគាត់។ អ៊ីចឹងចាំមើលការសម្រេចយ៉ាងណាៗ ទាល់តែជួបព្រះរាជអាជ្ញាសិន»។
បើតាមមេធាវីរូបនេះ ការផ្តន្ទាទោសកូនក្តីដោយកំបាំងមុខ ឬមិនមានវត្តមានកូនក្តីលោកក្នុងសវនាការ បានធ្វើឱ្យអ្នកពាក់ព័ន្ធមានការភ្ញាក់ផ្អើល។
ក្នុងនោះ លោកក៏មិនបានដឹងថានីតិវិធីនៃការកោះហៅរបស់តុលាការប្រព្រឹត្តទៅយ៉ាងណាដែរ ដោយសារតែលោកទើបនឹងទទួលបានការពឹងពាក់ពីកូនក្តី និងធ្វើកិច្ចការនេះបន្តពីមេធាវីផ្សេងទៀត។
មកទល់ពេលនេះ តុលាការបានបញ្ជូនកូនក្តីរបស់លោកមកសាលាដំបូងរាជធានីភ្នំពេញហើយកាលពីម្សិលមិញ និងបញ្ជូនទៅឃុំខ្លួននៅពន្ធនាគារព្រៃស នៅទី៣១ ខែតុលា។
មេធាវីការពារក្តីឱ្យអតីតមេឃុំកូតាមកពីបក្សសង្គ្រោះជាតិរូបនេះ លើកឡើងថា តាមនីតិវិធី បើកូនក្តីលោកបានដឹងថាតុលាការសម្រេចយ៉ាងណា នោះអ្នកស្រីអាចនឹងប្តឹងជំទាស់ តែករណីនេះ កូនក្តីគាត់មិនបានដឹងខ្លួន ទើបឈានដល់ការចាប់ខ្លួនបែបនេះ។
វីអូឌី មិនអាចទាក់ទងសុំការបញ្ជាក់ពីអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានទេ នៅថ្ងៃចន្ទ។
អ្នកនាំពាក្យតំណាងអយ្យការអមសាលាដំបូងរាជធានីភ្នំពេញ លោក ប្លង់ សុផល បដិសេធធ្វើអត្ថាធិប្បាយ ដោយប្រាប់ឱ្យអ្នកសារព័ត៌មានសួរទៅកាន់អ្នកនាំពាក្យសាលាដំបូង លោក អ៊ី រិន្ទ វិញ។
ចំណែកអ្នកនាំពាក្យសាលាដំបូងរាជធានីភ្នំពេញ លោក អ៊ី រិន្ទ សុំមិនឆ្លើយឡើយ ដោយរុញឱ្យ សាកសួរលោក ប្លង់ សុផល វិញ។
លោក អ៊ី រិន្ទ លើកឡើងថា៖ «ទំនាក់ទំនងជាមួយនឹងអ្នកនាំពាក្យខាងអយ្យការ ដោយសារការចាប់ខ្លួនហ្នឹងប៉ះអំណាចសាលក្រម អ៊ីចឹងបានន័យថាគេបញ្ជូនទៅអយ្យការហើយ»។
ក្នុងលិខិតជូនដំណឹងស្តីពីការប្រកាសសាលក្រមកំបាំងមុខ ដែលចេញដោយក្រឡាបញ្ជីសាលាដំបូងរាជធានីភ្នំពេញ ឈ្មោះ សឺន សឿ ដែលបានជម្រាបជូនទៅអ្នកស្រី កឹម តុលា ថា អ្នកស្រីត្រូវបានកាត់ទោសឱ្យជាប់ពន្ធនាគារ១ឆ្នាំកន្លះ ពីបទ ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម។
សំណុំរឿងនេះក៏បានផ្តន្ទាទោសកំបាំងមុខទៅលើជនជាប់ចោទចំនួន៥រូបទៀត រួមមាន ឈ្មោះ ឡាញ់ ថាវរី, ម៉ន ផល្លា, ម៉ែន សុថាវរិន្ទ្រ, ឡុង រី និងលោក ម៉ោញ សារ៉ាត់ ហើយពួកគេទាំង៥នាក់ត្រូវបានតុលាការចេញដីកាបង្គាប់ឱ្យចាប់ខ្លួន លើកលែងឈ្មោះ ឡាញ់ ថាវរី។ ដោយឡែក ក្នុងលិខិតដដែលនេះ ឈ្មោះ ម៉ិច ហ៊ាង ត្រូវបានតុលាការផ្តន្ទាទោសដាក់ពន្ធនាគារ៣ឆ្នាំ ពីបទប្រមាថព្រះមហាក្សត្រ និងញុះញង់ផងដែរ។
អ្នកស្រី កឹម សេដ្ឋា ដែលអះអាងថាជាបងបង្កើតរបស់អ្នកស្រី កឹម តុលា ប្រាប់ VOD ថា ប្អូនស្រីរបស់គាត់ពិតជាត្រូវបានគេចាប់ខ្លួនប្រាកដមែន ហើយគាត់បានទទួលដំណឹងនេះកាលពីល្ងាចថ្ងៃទី៣០ ខែតុលា ប៉ុន្តែគាត់មិនដឹងមូលហេតុដែលឈានដល់ការចាប់ខ្លួនប្អូនរបស់គាត់ឡើយ។
យ៉ាងណា អ្នកស្រីចាត់ទុកការចាប់ប្អូនស្រីរបស់គាត់ជាលើកទី៣នេះ ថានៅតែស្ថិតក្រោមហេតុផលនយោបាយដដែល បើទោះប្អូនស្រីគាត់បានឈប់ធ្វើសកម្មភាពនយោបាយទៅហើយក្តី។
អ្នកស្រីថា៖ «បញ្ហារឿងនយោបាយហ្នឹងហើយ! វាអត់មានអីផង បើគាត់អត់មានធ្វើអី។ អ៊ីចឹងគ្រាន់តែថាកន្លងមកហ្នឹង ក្រោយគេចាប់គាត់មុនហ្នឹង គឺគាត់លាលែងអស់ហើយ គាត់ឈប់ធ្វើអីទាំងអស់។ ហើយដល់ក្រោយនេះ ខ្ញុំមិនដឹងរឿងអីទេ វាមានតែរឿងហ្នឹងទេ ព្រោះប្អូនខ្ញុំអត់មានបានធ្វើអីទេ ហើយរឿងនយោបាយពេលក្រោយនេះ គឺអត់ដែរ។ បើចាប់សាមុន ក្រែងគាត់មានពាក់ព័ន្ធពីមុនមក តែពេលក្រោយនេះ គឺអត់ទេ»។
អ្នកស្រីស្នើដោះលែងប្អូនស្រីគាត់ឱ្យមានសេរីភាពវិញ ដោយថា ប្អូនគាត់មិនបានប្រព្រឹត្តកំហុសអ្វីឡើយ ខណៈការចោទប្រកាន់ថាញុះញង់នោះ គឺប្អូនគាត់កំពុងស្ថិតនៅក្នុងពន្ធនាគារនៅឡើយ និងមិនបានធ្វើសកម្មភាពនយោបាយណាមួយនោះដែរ។
អ្នកនាំពាក្យសមាគមអាដហុក លោក ស៊ឹង សែនករុណា ចាត់ទុកករណីចាប់ខ្លួនអ្នកស្រី កឹម តុលា ជាថ្មីទៀតនេះ ថាមិនមែនជាការអនុវត្តច្បាប់ឱ្យមុតមាំទេ តែគ្រាន់តែជាការធ្វើទុក្ខបុកម្នេញផ្នែកនយោបាយលើក្រុមបក្សប្រឆាំង ដើម្បីមិនឱ្យអ្នកស្រីមានឱកាសចេញទៅក្រៅប្រទេសប៉ុណ្ណោះ។
លោកថា អ្នកស្រី កឹម តុលា ជាសកម្មជននយោបាយដែលរងការគំរាមកំហែង និងរងទុក្ខក្នុងពន្ធនាគារផងដែរ ហើយការផ្តល់សេរីភាពដើរហើរដល់អ្នកស្រី ទើបជារឿងត្រឹមត្រូវ។
លោក ករុណា ថា៖ «គាត់ដែលជាសកម្មជននយោបាយ ដែលធ្លាប់រងទុក្ខទោសអីនេះ អាចឱ្យសេរីភាពពេញលេញក្នុងការដើរហើរ អាហ្នឹងគឺជាការសម្រួលមួយដ៏ល្អ តែអ្វីដែលខ្ញុំលើកឡើងនេះ មិនមានទេនៅក្នុងសង្គមខ្មែរ! ឱ្យតែមានការប្រកាន់និន្នាការនយោបាយផ្ទុយ ហើយមានការមិនធ្វើសកម្មភាព មិនគាំទ្រគណបក្សកាន់អំណាចអីជាដើមហ្នឹង តែងតែរងការរឹតត្បិតអ៊ិចឹងហើយ។ ប៉ុន្តែអ្វីដែលខ្ញុំចង់ឃើញ គឺរូបភាពនៃការសម្របសម្រួលទៅដល់សកម្មជននយោបាយទាំងអស់ និងផ្តល់ឱកាសដល់ពួកគេក្នុងការចូលរួមសកម្មភាពនយោបាយដោយសេរី ដោយពុំមានការភ័យខ្លាច សមស្របជាប្រទេសមួយដែលប្រកាន់នូវរបបលទ្ធិប្រជាធិបតេយ្យ»។
មន្ត្រីសង្គមស៊ីវិលរូបនេះថា បើរដ្ឋាភិបាលនៅតែបន្តដាក់សម្ពាធ រឹតត្បិតផ្នែកនយោបាយ និងសិទ្ធិមនុស្ស នោះកម្ពុជាទាំងមូលនឹងខាតប្រយោជន៍ ដូចជា ប្រព័ន្ធអនុគ្រោះពន្ធរបស់អឺរ៉ុប បាត់បង់ឱកាសជួយជ្រោមជ្រែងពីសំណាក់ប្រទេសប្រជាធិបតេយ្យ និងប៉ះពាល់មុខមាត់កម្ពុជាលើឆាកអន្តរជាតិពាក់ព័ន្ធការរំលោភសិទ្ធិមនុស្ស។
អ្នកស្រី កឹម តុលា ជាអតីតមេឃុំត្រែងត្រយឹង ជាប់ឆ្នោតមកពីណបក្សសង្គ្រោះជាតិដែលត្រូវតុលាការរំលាយ។ អតីតមន្ត្រីមូលដ្ឋានបក្សប្រឆាំងរូបនេះ ធ្លាប់បានរត់ភៀសខ្លួនទៅប្រទេសថៃមួយរយៈ ក្រោយពីតុលាការខេត្តកំពង់ស្ពឺចេញដីកាកោះហៅទៅបំភ្លឺរឿងបង្ហោះសារគាំទ្រលោក កឹម សុខា និងលោក សម រង្ស៊ី ជាមនុស្សតែមួយ និងបង្ហោះសារគាំទ្រដំណើរមាតុភូមិនិវត្តន៍របស់លោក សម រង្ស៊ី កាលពីចុងឆ្នាំ២០១៩។
ក្រោយមក តុលាការខេត្តកំពង់ស្ពឺ ក៏បានចេញដីកាចាប់ខ្លួនស្ត្រីរូបនេះ ដោយចោទពីបទ «រួមគំនិតក្បត់ និងញុះញង់ឱ្យប្រព្រឹត្តបទឧក្រិដ្ឋជាអាទិ៍» ពាក់ព័ន្ធនឹងផែនការវិលចូលស្រុករបស់លោក សម រង្ស៊ី។ អ្នកស្រី កឹម តុលា បានវិលត្រលប់មកកម្ពុជាវិញ ក្រោយពេលលោក ហ៊ុន សែន អំពាវនាវឱ្យសកម្មជនបក្សប្រឆាំងដែលកំពុងរត់គេចខ្លួនទាំងអស់ត្រលប់មកផ្ទះវិញ ដោយសន្យាបញ្ឈប់ការចាប់ខ្លួន និងមិនយកទោសពៃរ៍លើពួកគេទៀតឡើយ ដោយសារពួកគេបានចាញ់បោកលោក សម រង្ស៊ី ប៉ុណ្ណោះ។ ប៉ុន្តែនៅថ្ងៃទី២០ ខែកក្កដា ឆ្នាំ២០២១ អ្នកស្រី ត្រូវបានសមត្ថកិច្ចចាប់ខ្លួន ពាក់ព័ន្ធសំណុំរឿង៩ វិច្ឆិកានេះ៕