តុលាការនៅក្នុងប្រទេសមីយ៉ាន់ម៉ា ដែលគ្រប់គ្រងដោយយោធា បានផ្តន្ទាទោសអតីតសមាជិកសភាមកពីគណបក្សសម្ព័ន្ធជាតិដើម្បីប្រជាធិបតេយ្យ (NLD) ដាក់ពន្ធនាគាររយៈពេល ១៧៣ឆ្នាំ។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Al Jazeera នៅថ្ងៃទី៣ ខែវិច្ឆិកា ឆ្នាំ២០២២ នេះ។
កាលពីថ្ងៃចន្ទ តុលាការនៃរបបយោធាមីយ៉ាន់ម៉ា បានចោទប្រកាន់ លោក វីន យីន ឡាំង (Win Myint Hlaing) ថាមានបទល្មើសចំនួន៨ករណី ពាក់ព័ន្ធនឹងអំពើភេរវកម្ម ហើយបានផ្ទន្ទាទោសរូបលោកឱ្យជាប់ពន្ធនាគាររយៈពេល ១៧៣ឆ្នាំ ដោយបូកបញ្ចូលទាំងទោសជាប់ពន្ធនាគាររយៈពេល២៥ឆ្នាំដែលត្រូវបានផ្តន្ទាកាលពីខែមីនា ខែមេសា និងខែមិថុនា ពីបទ ញុះញង់ និងអំពើភេរវកម្ម។
ប្រព័ន្ធផ្សព្វផ្សាយរបស់មីយ៉ាន់ម៉ាឈ្មោះថា Global New Light of Myanmar ដែលគ្រប់គ្រងដោយយោធាបានរាយការណ៍កាលពីឆ្នាំមុនថា លោក Win Myint Hlaing បញ្ជាលើអង្គភាពកងកម្លាំងការពារប្រជាជនក្នុងតំបន់ (PDF) និងបានប្រើកាំភ្លើង និងគ្រឿងផ្ទុះក្នុង «អំពើភេរវកម្ម បំផ្លាញសន្តិភាព និងស្ថិរភាពរបស់រដ្ឋ»។
អង្គភាព PDF បានវាយប្រហារការិយាល័យអប់រំ ធនាគារ និងប៉ុស្តិ៍នគរបាល ហើយបានបំផ្ទុះគ្រាប់បែក ការបង្កអគ្គិភ័យ និងឃាតកម្ម។ នេះបើយោងតាមសាព័ត៌មាន Global New Light of Myanmar។
លោក Win Myint Hlain ត្រូវបានបោះឆ្នោតជ្រើសរើសជាតំណាងរាស្រ្តក្នុងតំបន់ម៉ាកវ៉េ (Magway) នៃប្រទេសមីយ៉ាន់ម៉ានៅក្នុងឆ្នាំ២០១៥។ លោកមិនបានចូលរួមក្នុងការបោះឆ្នោតឆ្នាំ២០២០ ប៉ុន្តែលោកបានចូលរួមក្នុងការតវ៉ាប្រឆាំងនឹងយោធា មុនពេលត្រូវបានចាប់ខ្លួននៅទីក្រុងយ៉ាក់ស (Yaksawk) ក្នុងរដ្ឋសាន (Shan) ភាគខាងកើតប្រទេសមីយ៉ាន់ម៉ា ក្នុងខែវិច្ឆិកា ឆ្នាំ២០២១។
ផ្ទះរបស់លោកនៅក្នុងសង្កាត់តុងវីងយី (Taungdwingyi) ក្នុងតំបន់ Magway ត្រូវបានរឹបអូសដោយកងកម្លាំងសន្តិសុខមួយថ្ងៃ បន្ទាប់ពីការចាប់ខ្លួនលោក ដោយធ្វើគ្រួសាររបស់លោកត្រូវភៀសខ្លួន។
ការកាន់កាប់របស់យោធានៅក្នុងប្រទេសមីយ៉ាន់ម៉ា ត្រូវបានតវ៉ាដោយសន្តិវិធីនៅទូទាំងប្រទេស តែត្រូវបានបង្រ្កាបដោយហិង្សាពីយោធាមីយ៉ាន់ម៉ា ដែលបង្កឱ្យមានការតស៊ូប្រដាប់អាវុធ ខណៈអ្នកជំនាញរបស់អង្គការសហប្រជាជាតិមួយចំនួន បាននិយាយថា ឥលូវនេះស្ថានភាពនៅក្នុងប្រទេសមីយ៉ាន់ម៉ា គឺស្រដៀងទៅនឹងសង្រ្គាមស៊ីវិល៕
