មេដឹកនាំនៃប្រទេសសមាជិកអាស៊ាន និងថ្នាក់ដឹកនាំនៃប្រទេសមួយចំនួនបានមកដល់ប្រទេសកម្ពុជាជាបណ្តើរៗហើយ គិតត្រឹមរសៀលថ្ងៃព្រហស្បតិ៍នេះ ដើម្បីចូលរួមក្នុងកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំពាក់ព័ន្ធ នៅរាជធានីភ្នំពេញ ខណៈឆ្នាំ២០២២នេះ កម្ពុជាធ្វើជាម្ចាស់ផ្ទះ។
ភ្ញៀវសំខាន់ៗដែលបានមកដល់កម្ពុជា គិតត្រឹមរសៀលថ្ងៃទី១០ ខែវិច្ឆិកានេះ រួមមាន លោក Klaus Schwab ស្ថាបនិក និងជាប្រធានប្រតិបត្តិនៃវេទិកាសេដ្ឋកិច្ចពិភពលោក និងភរិយា, នាយករដ្ឋមន្ត្រីឡាវ លោក Phankham Viphavanh និងភរិយា, ព្រះមហាក្សត្រ ស៊ុលតង់ និងថ្នាក់ដឹកនាំនៃប្រទេសព្រុយណេ, នាយករដ្ឋមន្រ្តីថៃ លោក ប្រាយុទ្ធ ចាន់អូចា និងភរិយា, ប្រធានាធិបតីឥណ្ឌូនេស៊ី លោក ចូកូ វីដូដូ (Joko Widodo) និងភរិយា, ប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជេអរ និងភរិយា, រដ្ឋមន្រ្តីក្រសួងពាណិជ្ជកម្ម និងគោលនយោបាយ ចក្រភពអង់គ្លេស លោក ហ្រ្គេគ ហែន។
ចំណែកលោក លី ខឺឈាង (Li Keqiang) នាយករដ្ឋមន្ត្រីចិន បានមកដល់កម្ពុជា និងជួបជាមួយលោកនាយករដ្ឋមន្ត្រី ហ៊ុន សែន នៅថ្ងៃ៩ ខែវិច្ឆិកា ម្សិលមិញ ក្នុងនោះ ភាគីទាំង២ បានចូលរួមពិធីចុះហត្ថលេខាលើឯកសារផ្តល់ជំនួយលើគម្រោងអភិវឌ្ឍន៍មួយចំនួននៅកម្ពុជា នៅមុនកាលបរិច្ឆេទសំខាន់នៃកិច្ចប្រជុំអាស៊ាននេះ។
ចំណែកនាយករដ្ឋមន្ត្រីវៀតណាម លោក ផាម មិញជិញ ក៏បានធ្វើដំណើរទស្សនកិច្ចផ្លូវការមកកម្ពុជាដែរ នៅថ្ងៃទី៨-៩ ខែវិច្ឆិកា តបតាមការអញ្ជើញរបស់លោកនាយករដ្ឋមន្ត្រី ហ៊ុន សែន។
ដំណើរការរៀបចំកិច្ចប្រជុំកំពូលអាស៊ានលើកទី៤០ និង៤១ និងកិច្ចប្រជុំពាក់ព័ន្ធដែលកម្ពុជាធ្វើជាម្ចាស់ផ្ទះ ចាប់ផ្តើមដំណើរការចាប់ពីថ្ងៃអង្គារ ទី៨ ខែវិច្ឆិកានេះ ក្រោមការរឹតបន្តឹងសន្តិសុខសុវត្ថិភាព ខណៈអាជ្ញាធររាជធានីភ្នំពេញអះអាងថាបានត្រៀមរួចរាល់អស់ហើយ ក្នុងនោះមានការប្រើកម្លាំងជាង ២ ៣០០នាក់ ដើម្បីការពារសន្តិសុខ និងសណ្តាប់ធ្នាប់ក្នុងអំឡុងកិច្ចប្រជុំនេះ។
កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធលើកនេះ ត្រូវបានរៀបចំឡើងនៅរាជធានីភ្នំពេញ មានរយៈពេល៦ថ្ងៃ ពោលគិតចាប់ពីថ្ងៃទី៨ ខែវិច្ឆិកា ដល់ថ្ងៃទី១៣ ខែវិច្ឆិកា ឆ្នាំ២០២២។ យ៉ាងណា របៀបវារៈសំខាន់ៗមួយចំនួននៅមិនទាន់ចាប់ផ្តើមនៅឡើយ គិតត្រឹមរសៀលថ្ងៃទី១០ ខែវិច្ឆិកា៕