អាជ្ញាធរខេត្តសៀមរាប បានពន្យារពេលជួបជាមួយប្រជាពលរដ្ឋក្នុងការស្វែងរកដំណោះស្រាយដីធ្លីជូនពលរដ្ឋជាង២០០គ្រួសារ នៅភូមិស្នាសង្គ្រាម ឃុំបល្ល័ង្ក ស្រុកប្រាសាទបាគង។
ប្រជាពលរដ្ឋ២១០គ្រួសារ រស់នៅភូមិស្នាសង្គ្រាម ឃុំបល្ល័ង្ក ស្រុកប្រាសាទបាគង ដែលមានដីអាស្រ័យផលនៅភូមិធម្មជាតិរុនតាឯក ឃុំរុនតាឯក ស្រុកបន្ទាយស្រី ចោទអាជ្ញាធរជាតិអប្សរាថាបានហ៊ុមព័ទ្ធយកដីរបស់ពួកគេអស់១៦០ហិកតា តាំងពីឆ្នាំ២០០៥ ដោយសន្យាផ្តល់សំណងជូនពួកគាត់ពី៥០០ដុល្លារ ទៅ៧០០ដុល្លារ ក្នុង១ហិកតា ប៉ុន្តែរហូតមកដល់ឆ្នាំ២០២២ ស្ថាប័នមួយនេះពុំបានផ្តល់សំណងជូនពលរដ្ឋឡើយ។
ចាប់តាំងពីពាក់កណ្តាលឆ្នាំ២០២២មក អ្នកភូមិស្នាសង្គ្រាមរាប់សិបនាក់បាននាំគ្នាដាក់ញត្តិ និងតវ៉ាជាបន្តបន្ទាប់នៅតាមស្ថាប័នរដ្ឋមួយចំនួនក្នុងខេត្តសៀមរាប ដើម្បីទាមទាររកដំណោះស្រាយ ដោយកាលពីថ្ងៃទី៣ ខែវិច្ឆិកា រដ្ឋបាលស្រុក ខេត្ត និងអាជ្ញាធរជាតិអប្សរា បានសន្យាជួបជាមួយអ្នកភូមិនៅថ្ងៃទី១០ ខែវិច្ឆិកានេះ ដើម្បីស្វែងរកដំណោះស្រាយជូនពលរដ្ឋ ប៉ុន្តែត្រូវបានលើកពេលវិញ។
លោក សំ មុំ ជាពលរដ្ឋរស់នៅភូមិស្នាសង្គ្រាម ប្រាប់វីអូឌីនៅថ្ងៃព្រហស្បតិ៍នេះថា អាជ្ញាធរពាក់ព័ន្ធទាំងនោះមិនបានមកជួបប្រជាពលរដ្ឋតាមការសន្យានោះទេ ក្រោយហេតុផលថាមានធុរៈរវល់ ហើយសន្យាជួបជាមួយពលរដ្ឋនៅថ្ងៃចន្ទដើមសប្តាហ៍ក្រោយវិញ។
កន្លងមក អ្នកភូមិបានដាក់ញត្តិ និងតវ៉ានៅសាលាឃុំបល្ល័ង្ក សាលាឃុំរុនតាឯក សាលាស្រុកប្រាសាទបាគង សាលាខេត្តសៀមរាប និងអាជ្ញាធរជាតិអប្សរា ប៉ុន្តែរហូតមកដល់ពេលនេះពុំមានដំណោះស្រាយនៅឡើយទេ និងបានរុញដាក់គ្នាក្នុងការទទួលខុសត្រូវលើការដោះស្រាយរឿងនេះផងដែរ។
ជុំវិញរឿងនេះ មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៅមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា ករណីអាជ្ញាធរមិនទទួលសំណើរបស់ប្រជាពលរដ្ឋ ហើយរុញដាក់គ្នានោះ បានបង្ហាញពីកម្សោយ និងការមិនទទួលខុសត្រូវរបស់អាជ្ញាធរទាំងនោះចំពោះប្រជាពលរដ្ឋដែលជាម្ចាស់ឆ្នោត។ លោកថា ទង្វើនេះគឺផ្ទុយពីរដ្ឋធម្មនុញ្ញរបស់កម្ពុជា ដែលចែងថា អាជ្ញាធររដ្ឋត្រូវទទួលយកសំណើរបស់ប្រជាពលរដ្ឋទៅពិនិត្យ និងដោះស្រាយយ៉ាងហ្មត់ចត់ផងនោះ៕
