កូដករណាហ្គាជាស្ត្រីម្នាក់ទៀតនឹងចូលទៅបំភ្លឺតាមការកោះហៅជាលើកទី២របស់តុលាការ នៅរសៀលថ្ងៃទី១៥ ខែវិច្ឆិកានេះ ពាក់ព័ន្ធនឹងបទចោទប្រកាន់ចំនួន៣ ដែលក្រុមហ៊ុនល្បែងមួយនេះបានប្ដឹងរូបគាត់។
ក្នុងសេចក្ដីជូនដំណឹងស្ដីពីការចូលខ្លួនទៅឆ្លើយបំភ្លឺតាមដីកាកោះហៅលើកទី២ របស់ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ចុះថ្ងៃទី១៤ ខែវិច្ឆិកានេះ បានឱ្យដឹងថា កូដករណាហ្គាវើលដ៍ កញ្ញា ជួប សោភ័ណ្ឌ ត្រូវបានកោះហៅឱ្យចូលខ្លួនលើកទី២ ទៅកាន់អយ្យការអមសាលាដំបូងរាជធានីភ្នំពេញ នៅម៉ោង២កន្លះរសៀលថ្ងៃនេះ អំពីបទចោទចំនួន៣ រួមមាន រំលោភលើលំនៅឋាន, ធ្វើឱ្យខូចខាតដោយចេតនាស្ថានទម្ងន់ទោស និងចាប់ឃុំឃាំងនិងបង្ខាំងដោយខុសច្បាប់ ដែលក្រុមហ៊ុនបានប្តឹងពួកគេ។
ក្រោយពីធ្វើកូដកម្មជាង១០ខែមកនេះ កូដករណាហ្គាវើលដ៍ជិត១០រូបហើយ ត្រូវបានសាលាដំបូងរាជធានីភ្នំពេញកោះហៅឱ្យចូលបំភ្លឺ ក្រោមបណ្តឹងរបស់ក្រុមហ៊ុន។
វិវាទការងារក្រុមហ៊ុនណាហ្គាវើលដ៍បានកើតឡើងជាង១ឆ្នាំមកហើយ ក្រោយពេលក្រុមហ៊ុនល្បែងស៊ីសងនិងកាស៊ីណូមួយនេះបានបញ្ឈប់បុគ្គលិកចំនួន១ ៣២៩នាក់ ក្នុងចំណោមបុគ្គលិកសរុបជាង៨ ០០០នាក់ពីការងារ ក្រោមហេតុផលថា «ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩»។
យ៉ាងណា បុគ្គលិកដែលចេញធ្វើកូដកម្មរយៈពេលជិត១១ខែមកនេះ អះអាងថា ការបញ្ឈប់នោះគឺដោយសារថៅកែមានចេតនារំលាយសហជីពការពារសិទ្ធិកម្មករឱ្យអស់ពីក្រុមហ៊ុនមួយនេះ៕