លោកនាយករដ្ឋមន្ត្រី ហ៊ុន សែន បារម្ភពីសុខភាពមេដឹកនាំបណ្ដាប្រទេសមួយចំនួន រួមទាំងប្រធានាធិបតីអាមេរិកផងដែរ ក្រោយលោកឆ្លងជំងឺកូវីដ-១៩ ដោយលោកថា ក្នុងអំឡុងកិច្ចប្រជុំកំពូលអាស៊ានដែលកម្ពុជាធ្វើជាម្ចាស់ផ្ទះ លោកបានចាប់ដៃ ធ្វើដំណើរ និងបរិភោគអាហារ ប្រកបដោយភាពស្និទ្ធស្នាលជាមួយមេដឹកនាំបណ្ដាប្រទេសទាំងនោះ។
កាលពីថ្ងៃទី១០-១៣ ខែវិច្ឆិកា ឆ្នាំ២០២២ កម្ពុជាបានធ្វើជាម្ចាស់ផ្ទះរៀបចំកិច្ចប្រជុំកំពូលអាស៊ានលើកទី៤០ ទី៤១ និងកិច្ចប្រជុំកំពូលពាក់ព័ន្ធផ្សេងទៀត ដោយមានការចូលរួមពីថ្នាក់ដឹកនាំនៃបណ្តាប្រទេសតូចធំ រួមទាំងប្រទេសមហាអំណាចនានាផងដែរ។ ក្រោយកិច្ចប្រជុំកំពូលអាស៊ានមួយថ្ងៃ លោកនាយករដ្ឋមន្ត្រី ហ៊ុន សែន បានធ្វើដំណើរទៅកាន់ប្រទេសឥណ្ឌូនេស៊ី ដើម្បីចូលរួមកិច្ចប្រជុំ G20 ប៉ុន្តែនៅពេលទៅដល់ប្រទេសនោះ ក្រុមគ្រូពេទ្យឥណ្ឌូនេស៊ីបានរកឃើញថាលោកមានវិជ្ជមានកូវីដ-១៩ ដែលធ្វើឱ្យរូបលោក និងប្រតិភូកម្ពុជា ខកខានចូលរួមកិច្ចប្រជុំនោះ។
លោកនាយករដ្ឋមន្ត្រី ហ៊ុន សែន បានបង្ហោះសារជាសំឡេងនៅលើបណ្តាញទំនាក់ទំនងសង្គម នៅយប់ថ្ងៃអង្គារម្សិលមិញ ដោយបង្ហាញពីក្តីបារម្ភរបស់លោក ចំពោះសុខភាពថ្នាក់ដឹកនាំប្រទេសមួយចំនួន និងអង្គការអន្តរជាតិនានា ដែលទើបនឹងចាកចេញពីកម្ពុជា ដើម្បីទៅចូលរួមកិច្ចប្រជុំ G20 នៅឥណ្ឌូនេស៊ី និងថ្នាក់ដឹកនាំនៃបណ្តាប្រទេសមួយចំនួនទៀតបានធ្វើដំណើរទៅប្រទេសរៀងខ្លួន ខណៈលោកទើបនឹងដឹងថាឆ្លងជំងឺកូវីដ-១៩ នាពេលថ្មីៗនេះ។
លោកថ្លែងថា៖ «បញ្ហាកូវីដដែលទាក់ទងនឹងខ្ញុំព្រះករុណា ជាបញ្ហាតូចតាចទេ។ តែអ្វីដែលខ្ញុំកង្វល់ធំជាងគេ គឺតើមេដឹកនាំដែលចេញពីកម្ពុជាទៅចូលរួមប្រជុំនៅឥណ្ឌូនេស៊ី និងការវិលត្រលប់ទៅកាន់ប្រទេសរៀងៗខ្លួនវិញ តើមានកើតកូវីដ ឬអត់? នោះទើបជាបញ្ហាកង្វល់ធំរបស់ខ្ញុំ»។
លោកនាយករដ្ឋមន្ត្រី ហ៊ុន សែន បន្តថា៖ «ព្រោះថាមេដឹកនាំដែលមានការប្រជុំនៅឯកោះបាលី ប្រទេសឥណ្ឌូនេស៊ី ដែលហៅថា G20 នេះ គឺត្រូវចេញពីកម្ពុជាទៅស្ទើរតែជាងពាក់កណ្ដាល ក្នុងហ្នឹងប្រធានាធិបតីឥណ្ឌូនេស៊ី គឺជាប្រធានតវេន ភ្ជាប់វេន ដែលនៅជាប់ជាមួយខ្ញុំជានិច្ច។ ក្រៅពីនោះ មានមេដឹកនាំមួយចំនួនទៀត គឺនៅជាប់កៀកកិតគ្នា ចាប់ដៃគ្នា ហើយធ្វើដំណើរជាមួយគ្នា រាប់ទាំងប្រធានាធិបតីសហរដ្ឋអាមេរិកផងដែរ ដែលអង្គុយបាយជាមួយគ្នា ធ្វើដំណើរជាមួយគ្នា និងអង្គុយប្រជុំជាមួយគ្នា»។
យ៉ាងណា លោកនាយករដ្ឋមន្ត្រីថា មកទល់ពេលនេះ លោកនៅមិនទាន់ទទួលបានព័ត៌មានថាមានមេដឹកនាំប្រទេសណាមួយឆ្លងកូវីដ-១៩ ពីកម្ពុជានៅឡើយទេ។
បើទោះជាយ៉ាងនេះក្តី លោកក៏បានស្នើឱ្យអ្នកវិភាគមួយចំនួនកុំវិភាគករណីលោកខកខានប្រជុំនេះទៅណាឆ្ងាយពីបញ្ហាកូវីដ-១៩ ខណៈលោកអះអាងថា គ្មានមេដឹកនាំប្រទេសណាមួយមានបំណងយករឿងកូវីដ-១៩ ជាលេសដើម្បីឱ្យលោកខកខានចូលរួមប្រជុំឡើយ៕