ចៅក្រមប្រឹក្សាជំនុំជម្រះ បានកំណត់យកថ្ងៃទី១៨ ខែមករា ដើម្បីប្រកាសសាលក្រម ក្នុងសំណុំរឿងព្រហ្មទណ្ឌប្រឆាំងអតីតអ្នកគាំទ្រនយោបាយរបស់គណបក្សសង្រ្គោះជាតិដែលត្រូវបានតុលាការរំលាយ និងអ្នកវិភាគនយោបាយ ដោយចាត់ទុកថា ការចោទប្រកាន់នេះមានធាតុផ្សំនៃបទល្មើសគ្រប់គ្រាន់ ដែលអាចឈានទៅកំណត់ជនជាប់ចោទពិតជាបានប្រព្រឹត្តបទល្មើសដូចការចោទប្រកាន់មែន។
ការគ្រោងប្រកាសសាលក្រមនេះបានធ្វើឡើងក្រោយពីសាលាដំបូងរាជធានីភ្នំពេញ នៅថ្ងៃព្រហស្បតិ៍នេះ បានលើកយកសំណុំរឿងជនជាប់ចោទ ៣នាក់ មកជំនុំជម្រះ តបតាមបណ្ដឹងពីនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ។
លោក សេង សុជាតិ ចៅក្រមប្រឹក្សាជំនុំជម្រះ នៃសាលាដំបូងរាជធានីភ្នំពេញ បានបញ្ជាក់នៅក្នុងអង្គសវនាការថា តុលាការនឹងសម្រេចទម្លាក់ចោលបទចោទ ឬបន្តចោទប្រកាន់ និងផ្តន្ទាទោស ជនជាប់ចោទទាំង៣នាក់នេះ នៅដើមឆ្នាំ២០២៣ ខាងមុខនេះ។
ចំណែកតំណាងអយ្យការ លោក លឹម ប៊ុនហេង បានជម្រាបអង្គជំនុំជម្រះថា ដោយពិនិត្យឃើញមានភស្តុតាង និងវីដេអូ ភ្ជាប់មកជាមួយផង ក្នុងនាមស្ថាប័នអយ្យការ លោកស្នើឱ្យតុលាការផ្តន្ទាទោសដាក់ពន្ធនាគារឱ្យបានធ្ងន់ធ្ងរ ប្រឆាំងមនុស្សទាំង៣នាក់នេះ និងចេញដីកាបង្គាប់ឱ្យចាប់ខ្លួនផង។
លោកបន្តថា៖ «ផ្អែកលើភស្តុងតាងឃើញថា ជនជាប់ចោទបានប្រព្រឹត្តបទល្មើសជាបន្តបន្ទាប់ ហើយសំណេរនៅលើបណ្ដាញសង្គមទាំងអស់នេះ ប្រាសចាកការពិត ដែលនាំឱ្យសាធារណជនមានការយល់ច្រឡំមករាជរដ្ឋាភិបាល។ ពួកគេមានសកម្មភាពព្រមគ្នា ហាក់ដូចមានគម្រោងជាក់លាក់។ ជនជាប់ចោទពិតបានជាប្រព្រឹត្តបទល្មើសនេះពិតប្រាកដមែន»។
នៅក្នុងសំណុំរឿងព្រហ្មទណ្ឌដែលមានជនជាប់ចោទ លោក គឹម សុខ អ្នកវិភាគសង្គម និងនយោបាយ, កញ្ញា មាស លក្ខិណា អតីតអ្នកគាំទ្រនយោបាយរបស់គណបក្សប្រឆាំង និងលោក ហ៊ុយ សុខគ្រៀល ដែលកំពុងរស់នៅសហរដ្ឋអាមេរិក ត្រូវបាននាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែននៃក្រសួងមហាផ្ទៃ ប្តឹងដោយចោទប្រកាន់ពីបទ «អំពើញុះញង់ឱ្យប្រព្រឹត្តអំពើបង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» កាលពីដើមខែកញ្ញា ឆ្នាំ២០២០។ បច្ចុប្បន្ន ជនជាប់ចោទទាំង៣នាក់នេះកំពុងរស់នៅដោយនិរទេសខ្លួននៅក្រៅប្រទេស។
តាមរយៈការអានរបាយការណ៍ដោយក្រឡាបញ្ជី បង្ហាញថា ពួកគេមិនត្រូវបានយកចម្លើយទាំងក្នុងដំណាក់កាលនីតិវិធីនគរបាលយុត្តិធម៌ ចៅក្រមស៊ើបសួរ រហូតដល់ក្នុងដំណាក់កាលជំនុំជម្រះនេះទៀត។ ដោយឡែក តំណាងអយ្យការ លោក លឹម ប៊ុនហេង ក៏ឯកភាពដែរថា ជនជាប់ចោទទាំង៣រូបនេះក៏មិនមានមេធាវីការពារក្តីឱ្យថែមទៀតផង។
លោក គឹម សុខ ជាអ្នកវិភាគនយោបាយ និងសង្គម ហើយក៏ជាជនជាប់ចោទម្នាក់ក្នុងចំណោមជនជាប់ចោទ២នាក់ផ្សេងទៀត បានផ្តល់បទសម្ភាសនៅថ្ងៃនេះ ដោយអះអាងថា ការប្តឹងប្រឆាំងរូបលោកនេះ ពិតជារឿងដែលគួរឱ្យអស់សំណើច។ អ្នកវិភាគដែលមិនសំចៃមាត់រូបនេះ ចាត់ទុកសវនាការនេះថាជាការរៀបចំឡើងដោយសម្ងាត់ និងគ្មានហេតុផលត្រឹមត្រូវ។
លោកបន្តថា៖ «សំណុំរឿងដែលក្រុមលោក ហ៊ុន សែន ប្តឹងខ្ញុំកាលពី២ឆ្នាំមុននោះ គ្មាននរណាដឹងសោះ។ ខ្ញុំខ្លួនឯងក៏មិនដឹង ឪពុកម្តាយសាច់ញាតិខ្ញុំក៏គ្មានអ្នកណាដឹង។ អ្នកសារព័ត៌មាន កុំថាឡើយនៅក្រៅស្រុក សូម្បីអ្នកកាសែតក្នុងស្រុកក៏អត់មានអ្នកដឹង ទើបតែកៀកពេលតុលាការក្រុមលោក ហ៊ុន សែន រៀបចំធ្វើសវនាការស្ងាត់ៗថ្ងៃទី៨ ខែធ្នូ ឆ្នាំ២០២២ ហ្នឹងទើបមានអ្នកសារព័ត៌មានក្នុងខ្លះដឹងអំពីរឿងនេះ ហើយសួរខ្ញុំ។ មែនទែនទៅ ក្រុមលោក ហ៊ុន សែន លួចប្តឹងខ្ញុំ និងលួចធ្វើសវនាការស្ងាត់ៗតែគ្នាហ្នឹង»។
ចំណែកក្រឡាបញ្ជីបានអានរបាយការណ៍នៅក្នុងបន្ទប់ជំនុំជម្រះថា នគរបាលយុត្តិធម៌បានបញ្ជូនដីកាទៅដល់ទីតាំងស្នាក់នៅរបស់ជនជាប់ចោទដែរ ប៉ុន្តែគ្មានអ្នកទទួល ហើយរកមិនឃើញពួកគេថែមទៅទៀត។
ទាក់ទិនសំណុំរឿងនេះ វីអូឌី មិនអាចស្នើសុំការបំភ្លឺពីកញ្ញា មាស លក្ខិណា និងលោក ហ៊ុយ សុខគ្រៀល បានទេ នៅថ្ងៃព្រហស្បតិ៍នេះ។
បើទោះបែបណា ជុំវិញការបំភ្លឺនៅក្នុងបន្ទប់ជំនុំជម្រះរបស់ប្រធានការិយាល័យប្រយុទ្ធប្រឆាំងភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ លោក ចាន់ ដារិទ្ធ នៅថ្ងៃនេះ បង្ហាញថា អ្នកទាំង៣ ពិតជាបានប្រព្រឹត្តបទល្មើស និងមានភស្តុតាងជាវីដេអូគ្រប់គ្រាន់ ដែលពួកគេបានបង្ហោះការជេរប្រមាថថ្នាក់ដឹកនាំនៅលើបណ្តាញសង្គមផ្ទាល់ខ្លួន ដែលបានប្រព្រឹត្តកាលពីអំឡុងខែមិថុនា ដល់ខែសីហា ឆ្នាំ២០២០។
យ៉ាងនេះក្តី លោក គឹម សុខ អ្នកវិភាគនយោបាយ និងសង្គម នៅតែថ្លែងការពារថា អ្វីដែលលោកធ្វើ គឺគ្មានចេតនាណាមួយអាក្រក់ ដែលនាំទៅដល់ការញុះញង់ និងបង្កឱ្យមានចលាចលសង្គមនោះទេ។
សម្រាប់លោក សេង សុជាតិ ស្ថាបនិកអង្គការអភិវឌ្ឍន៍ផ្នត់គំនិត យល់ឃើញថា សិទ្ធិបញ្ចេញមតិគួរត្រូវបានប្រើប្រាស់ឱ្យបានពេញលេញសម្រាប់ជនជាប់ចោទទាំង៣រូបនេះ។ លោកថា ការយកច្បាប់ផ្សេងមកដាក់បន្ទុកប្រឆាំងពួកគេ ជារឿងដែលធ្ងន់ធ្ងរ ដែលនាំឱ្យការអនុវត្តមិនមានភាពសុក្រឹតនៅក្នុងការបំពេញនីតិវិធីរបស់តុលាការ។
លោកបន្តថា៖ «ប្រសិនបើក្នុងករណីដែលរដ្ឋាភិបាលអនុវត្តច្បាប់ដ៏តឹងរ៉ឹងខ្លាំងពេក ហើយវាមិនឆ្លើយតបទៅនឹងច្បាប់ជាតិដែលបានកំណត់ និងបានអនុម័តរួចហើយជាធរមានទេ យើងអាចមើលឃើញថា ការអនុវត្តនេះ វាមិនឆ្លើយតបទៅនឹងការពិត។ ដូច្នេះ វាធ្វើឱ្យមានភាពចម្រូងចម្រាស ហើយវាក៏ឆ្លុះបញ្ចាំងពីការអនុវត្តលម្អៀងរបស់អាជ្ញាធរ ក៏ដូចជាតុលាការដែរ »។
ចំពោះលោក គឹម សុខ មកដល់ពេលនេះ ធ្លាប់ត្រូវបានតុលាការផ្តន្ទាទោសដាក់ពន្ធនាគាររយៈពេល ១៨ខែ រួចមកហើយ ក្រោមបទចោទ «បរិហារកេរ្តិ៍ និងញុះញង់»។ នៅក្នុងបទសម្ភាសទាំង២លើកជាមួយវិទ្យុអាស៊ីសេរី កាលពីខែកុម្ភៈ ឆ្នាំ២០១៧ អ្នកវិភាគរូបនេះបានភ្ជាប់គណបក្សប្រជាជនកម្ពុជា និងលោកនាយករដ្ឋមន្រ្តី ហ៊ុន សែន ទៅនឹងអំពើឃាតកម្មលោកបណ្ឌិត កែម ឡី ដែលត្រូវបានឃាតកបាញ់សម្លាប់កាលពីខែកក្កដា ឆ្នាំ២០១៦។
បើទោះបែបណា សវនាការនៅថ្ងៃនេះ គ្មានជនជាប់ចោទ និងគ្មានមេធាវីការពារក្តីទាំងសងខាងនៅក្នុងបន្ទប់ជំនុំជម្រះទេ។ គេសង្កេតឃើញមានតែចៅក្រម តំណាងអយ្យការ ក្រឡាបញ្ជី និងមន្រ្តីនគរបាល២រូបមកពីនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃក្រសួងមហាផ្ទៃ ដែលជាម្ចាស់បណ្ដឹងនៅក្នុងសំណុំរឿងព្រហ្មទណ្ឌនេះ៕
