សហស្ថាបនិកគណបក្សសង្រ្គោះជាតិដែលត្រូវបានតុលាការរំលាយ លោក សម រង្ស៊ី បានអំពាវនាវទៅប្រជាពលរដ្ឋខ្មែរដែលរស់នៅទ្វីបអឺរ៉ុបឱ្យចូលរួមធ្វើបាតុកម្មឱ្យបានច្រើនកុះករ ដើម្បីប្រឆាំងវត្តមានលោកនាយករដ្ឋមន្ត្រីហ៊ុន សែន នៅពាក់កណ្តាលខែធ្នូនេះ ខណៈមេដឹកនាំរូបនេះ និងគណៈប្រតិភូកម្ពុជា នឹងទៅចូលរួមកិច្ចប្រជុំកំពូលអាស៊ាន-សហភាពអឺរ៉ុប ដែលធ្វើឡើងនៅប្រទេសប៊េលហ្សិក។
នៅលើបណ្តាញសង្គមហ្វេសប៊ុក លោក សម រង្ស៊ី បានបង្ហោះសារកាលពីថ្ងៃទី១០ ខែធ្នូ ថា ទស្សនកិច្ចរបស់លោក នាយករដ្ឋមន្ត្រី ហ៊ុន សែន នៅទ្វីបអឺរ៉ុប គឺជាទស្សនកិច្ចចុងក្រោយ នៅក្នុងនាមជានាយករដ្ឋមន្ត្រីកម្ពុជា ដោយលោកថា លោក ហ៊ុន សែន នឹងចុះចេញពីតំណែងកំពូលមួយនេះនៅឆ្នាំ២០២៣ខាងមុខ។ លោក សម រង្ស៊ី អះអាងថា នៅក្រោយពេលចុះចេញពីតំណែងនៅឆ្នាំ២០២៣ គឺលោក ហ៊ុន សែន នឹងត្រូវប៉ូលិសអន្តរជាតិចាប់ខ្លួន ពីបទឧក្រិដ្ឋ និងអំពើឃាតកម្មជាច្រើននៅកម្ពុជា។
ករណីនេះ លោក សម រង្ស៊ី អំពាវនាវទៅប្រជាពលរដ្ឋខ្មែរនៅអឺរ៉ុប ចូលរួមធ្វើបាតុកម្មប្រឆាំងនឹងលោកនាយករដ្ឋមន្ត្រី ហ៊ុន សែន ដែលនឹងទៅចូលរួមកិច្ចប្រជុំអាស៊ាន-សហភាពអឺរ៉ុប ក្នុងនាមជាប្រធានអាស៊ានឆ្នាំ២០២២ នៅទីក្រុងព្រុចស៊ែល (Bruxelles) ប្រទេសប៊េលហ្សិក (Belgique) ឱ្យបានកុះករ នៅថ្ងៃពុធទី១៤ធ្នូ ឆ្នាំ២០២២ខាងមុខនេះ ។
ឆ្លើយតបការអំពាវនាវនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន មានប្រសាសន៍ដោយចាត់ទុកការលើកឡើងរបស់លោក សម រង្ស៊ី ឱ្យប្រជាពលរដ្ឋខ្មែរចូលរួមធ្វើបាតុកម្មប្រឆាំងវត្តមានលោកនាយករដ្ឋមន្ត្រី ហ៊ុន សែន នៅទីក្រុងព្រុចស៊ែល (Bruxelles) ប្រទេសប៊េលហ្សិក (Belgique) នាថ្ងៃទី១៤ ខែធ្នូខាងមុខនេះ នឹងមិនទទួលបានជោគជ័យនោះទេ ពីព្រោះថ្នាក់ដឹកនាំកម្ពុជាធ្វើទស្សនកិច្ចនៅអឺរ៉ុប ក្នុងនាមជាប្រធានអាស៊ានឆ្នាំ២០២២ ។ ករណីនេះ អ្នកធ្វើបាតុកម្មទំនងជាមិនបានជួបមុខថ្នាក់ដឹកនាំកម្ពុជានោះឡើយ។
លោកមានប្រសាសន៍ថា៖ «ការធ្វើបាតុកម្មនៅស្រុកគេ គេឱ្យធ្វើដោយសេរី ប៉ុន្តែអាជ្ញាធរស្រុកគេកំណត់ទីតាំងឱ្យធ្វើ ដោយមិនមានប៉ះពាល់ដល់ការងារស្នួលរបស់គណៈប្រតិភូរបស់កម្ពុជាទេ។ អ៊ីចឹងកុំសង្ឃឹមថា បានឡើងឆាក ឬទៅអ៊ុកឡុក ឬទៅឈរជិតសម្តេច ប្រហែលមើលសម្តេចមិនឃើញផង»។
សាស្រ្តាចារ្យវិទ្យាសាស្ត្រនយោបាយ លោក ឯម សុវណ្ណរ៉ា មានប្រសាសន៍ថា បើប្រជាពលរដ្ឋខ្មែរនៅក្រៅប្រទេសចូលរួមបានច្រើនកុះករ តាមការអំពាវនាវរបស់លោក សម រង្ស៊ី ដើម្បីធ្វើបាតុកម្មប្រឆាំងវត្តមានលោកនាយករដ្ឋមន្ត្រី ហ៊ុន សែន ខាងមុខនេះ អាចអង្រួនចិត្តប្រជាពលរដ្ឋខ្មែរនៅក្នុងប្រទេស មានទឹកចិត្តបន្តគាំទ្របក្សប្រឆាំងនៅកម្ពុជា។ លោកបន្តថា បញ្ហានេះ អាចធ្វើឱ្យបក្សកាន់អំណាចថយប្រជាប្រិយភាពមួយកម្រិត បើបក្សនេះមិនផ្តល់ប្រយោជណ៍ច្រើនជូនពលរដ្ឋម្ចាស់ឆ្នោត ។
យ៉ាងណា លោក សុវណ្ណរ៉ា ផ្តល់ជាអនុសាសន៍ថា ដំណាក់កាលនេះ អ្នកនយោបាយខ្មែរគួរតែជួយដោះស្រាយបញ្ហាប្រឈមនានាជូនប្រជាពលរដ្ឋម្ចាស់ឆ្នោត ជាជាងប្រើវោហាសាសន៍ឈ្លោះគ្នា ដែលនាំឱ្យខាតប្រយោជន៍ជាតិ ។
លោកផ្តល់ជាអនុសាសន៍ថា៖ «ខ្ញុំគិតថា អ្នកនយោបាយមានសិទ្ធិក្នុងការប្រជែងគ្នា ក៏ប៉ុន្តែការប្រជែងគ្នាទាំងឡាយណា ដែលធ្វើឱ្យខាតបង់នូវប្រយោជន៍ជាតិ គួរតែអ្នកយោបាយជៀសវាង គាត់គួរតែវាយប្រហារគ្នាក្នុងក្របខណ្ឌ ប្រកួតប្រជែងគ្នាដោយស្មើភាព ក្នុងគោលការណ៍ច្បាប់ ប៉ុន្តែបើអ្នកនយបោយប្រើច្បាប់ជាលេស ដើម្បីយកអំណាចរិតត្បិតទៅលើអ្នកនយោបាយជាដៃគូប្រជែងទេ ជាការប្រាស់ចាកប្រយោជន៍ជាតិ»។
បើតាមសេចក្តីប្រកាសព័ត៌មានរបស់ក្រសួងការបរទេសកម្ពុជាកាលពីថ្ងៃទី៩ ខែធ្នូ បានឱ្យដឹងថា លោកនាយករដ្ឋមន្ត្រី ហ៊ុន សែន និងជាប្រធានអាស៊ានឆ្នាំ២០២២ នឹងដឹកនាំគណៈប្រតិភូជាន់ខ្ពស់ទៅចូលរួម និងធ្វើជាសហប្រធានកិច្ចប្រជុំកំពូលរំលឹកខួបអនុស្សាវរីយ៍អាស៊ាន-សហភាពអឺរ៉ុប។ កិច្ចប្រជុំនេះធ្វើឡើង ដើម្បីអបអរសាទរខួបលើកទី៤៥ នៃទំនាក់ទំនងដៃគូសន្ទនាអាស៊ាន-សហភាពអឺរ៉ុប និងធ្វើជាសហប្រធាននៃកិច្ចប្រជុំជាមួយប្រធានក្រុមប្រឹក្សាអឺរ៉ុប លោក ឆាល មីសែល នៅថ្ងៃទី១៤ ខែធ្នូ ឆ្នាំ២០២២ នៅទីក្រុងព្រុចសែល។
ក្រសួងការបរទេសកម្ពុជាបន្តថា កិច្ចប្រជុំពេញអង្គនៃជំនួបកំពូលរម្លឹកខួបនេះ នឹងពិនិត្យឡើងវិញនូវកិច្ចសហប្រតិបត្តិការអាស៊ាន-សហភាពអឺរ៉ុបនាពេលបច្ចុប្បន្ន និងកំណត់ទិសដៅអនាគតសម្រាប់ទំនាក់ទំនងអាស៊ាន-សហភាពអឺរ៉ុប។ បន្ថែមពីនេះ ថ្នាក់ដឹកនាំរំពឹងថា នឹងផ្តោតការពិភាក្សាទៅលើវិធីដើម្បីពង្រឹងសេដ្ឋកិច្ច និងទំនាក់ទំនងរវាងប្រជាជននិងប្រជាជន ការផ្លាស់ប្តូរឌីជីថល ការតភ្ជាប់ ការធានាបាននូវការផ្លាស់ប្តូរបៃតង ថាមពល និងសន្តិសុខស្បៀង និងការអភិវឌ្ឍប្រកបដោយចីរភាព។ ថ្នាក់ដឹកនាំ ក៏នឹងផ្លាស់ប្តូរទស្សនៈគ្នាលើបញ្ហាតំបន់ និងអន្តរជាតិ ដែលជាការព្រួយបារម្ភ និងការចាប់អារម្មណ៍រួម ផងដែរ។
សេចក្តីប្រកាសព័ត៌មានបន្តថា នៅមុនពេលចូលរួមកិច្ចប្រជុំកំពូលរម្លឹកខួប លោកនាយករដ្ឋមន្ត្រី ហ៊ុន សែន នឹងទៅបំពេញទស្សនកិច្ចការងារនៅសាធារណរដ្ឋបារាំង ហើយប្រធានាធិបតីនៃសាធារណរដ្ឋបារាំង លោក អេម៉ានូអែល ម៉ាក្រុង នឹងទទួលស្វាគមន៍នាយករដ្ឋមន្រ្តីកម្ពុជា នៅវិមានអេលីហ្សេ (Élysée Palace) ហើយនឹងរៀបចំអាហារការងារពេលល្ងាចជាកិត្តិយស។ ក្រៅពីនេះ លោក ហ៊ុន សែន ក៏នឹងជួបសំណេះសំណាលជាមួយជនរួមជាតិខ្មែរដែលកំពុងរស់នៅអឺរ៉ុប ព្រមទាំងកម្មវិធីមួយចំនួនទៀតផងដែរ៕
