សមាជិកសភាអឺរ៉ុបចំនួន ៤រូប ត្រូវបានចោទប្រកាន់ពីបទ «ទទួលសំណូកពីប្រទេសកាតា» ដែលក្នុងនោះមានអនុប្រធានសភាអឺរ៉ុប លោកស្រី អេវ៉ា កាយលី (Eva Kaili) ស្ថិតក្នុងចំណោមបុគ្គលដែលត្រូវបានចាប់ខ្លួនក្នុងករណីនេះ។ នេះបើយោងតាមការចេញផ្សាយរបស់សារព័ត៌មាន BBC នៅថ្ងៃទី១២ ខែធ្នូ ឆ្នាំ២០២២។
ប្រភពដដែលបន្តថា រដ្ឋអាជ្ញាសង្ស័យថា ប្រទេសកាតា បានព្យាយាមមានឥទ្ធិពលលើការសម្រេចចិត្តរបស់សភាអឺរ៉ុប ដោយផ្ដល់ជាប្រាក់ ឬអំណោយ។
ទោះយ៉ាងណា រដ្ឋាភិបាលកាតាបានបដិសេធចំពោះការចោទប្រកាន់នេះ។
ក្រុមឃ្លាំមើល និងសមាជិកសភាមកពីគណបក្សប្រឆាំង បានលើកឡើងថា វាអាចជារឿងអាស្រូវពុករលួយដ៏ធំបំផុតមួយ ដែលមិនធ្លាប់មាននៅក្នុងសភាអឺរ៉ុប។
លោកស្រី Kaili ត្រូវបានព្យួរពីតួនាទីជាអនុប្រធានសភា ក្នុងចំណោមអនុប្រធានសភាចំនួន១៤រូបផ្សេងទៀត និងព្យួរតួនាទីពីក្រុមសង្គមនិយម និងអ្នកប្រជាធិបតេយ្យរបស់សភា។ លោកស្រីក៏ត្រូវបានបណ្តេញចេញពីគណបក្សឆ្វេងនិយម Pasok របស់ក្រិក។
ប្រធានសភាអឺរ៉ុប លោកស្រី រ៉ូបឺតា មេតសូឡា (Roberta Metsola) បានធ្វើដំណើរពីប្រទេសម៉ាល់តា (Malta) ដែលជាស្រុកកំណើតរបស់លោកស្ រីទៅកាន់ទីក្រុងព្រុចសែល (Brussels) កាលពីល្ងាចថ្ងៃសៅរ៍ ដើម្បីទៅមើលការឆែកឆេរគេហដ្ឋានរបស់សមាជិកសភាដែលត្រូវបានចោទប្រកាន់ ដែលតម្រូវដោយរដ្ឋធម្មនុញ្ញប្រទេសបែលហ្ស៊ិក។
អ្នកនាំពាក្យរបស់លោកស្រី Metsola បាននិយាយថា លោកស្រីបានសម្រេចចិត្តព្យួរភ្លាមៗនូវអំណាច តួនាទី និងភារកិច្ចទាំងអស់ដែលត្រូវបានផ្ទេរទៅឱ្យលោកស្រី អេវ៉ា កាយលី (Eva Kaili)។ អ្នកនាំពាក្យរូបនេះបានបន្ថែមថា សភាអឺរ៉ុប «ឈរយ៉ាងម៉ឺងម៉ាត់ប្រឆាំងនឹងអំពើពុករលួយ» និងកំពុង «សហការទាំងស្រុង» ជាមួយអ្នកស៊ើបអង្កេត។
ចំនួនទឹកប្រាក់ប្រមាណ ៦០០ ០០០អឺរ៉ូ (ឬស្មើប្រមាណ ៦៣២ ០០០ដុល្លារ) ត្រូវបាននគរបាលបែលហ្ស៊ិក រឹបអូសក្នុងការឆែកឆេរចំនួន១៦ករណី ក្នុងទីក្រុងព្រុចសែល កាលពីថ្ងៃសុក្រ រួមទាំងកុំព្យូទ័រ និងទូរសព្ទដៃផងដែរ។
មនុស្សសរុបចំនួន ៦នាក់ ត្រូវបានឃាត់ខ្លួនដើម្បីសាកសួរ ក្នុងនោះមាន២នាក់ត្រូវបានដោះលែង។
ការិយាល័យរដ្ឋអាជ្ញាសហព័ន្ធរបស់ប្រទេសបែលហ្ស៊ិក បានលើកឡើងនៅក្នុងសេចក្តីថ្លែងការណ៍មួយថា៖ «បុគ្គលចំនួន៤នាក់ត្រូវបានចាប់ខ្លួនដោយចៅក្រមស៊ើបអង្កេតរបស់ទីក្រុងព្រុចសែល ដែលកំពុងដឹកនាំការស៊ើបអង្កេត»។
ការិយាល័យនេះបន្ថែមថា៖ «ពួកគេត្រូវបានចោទប្រកាន់ពីបទចូលរួមក្នុងអង្គការឧក្រិដ្ឋកម្ម ការលាងលុយកខ្វក់ និងអំពើពុករលួយ។ មនុស្ស២នាក់ត្រូវបានដោះលែងដោយចៅក្រមស៊ើបអង្កេត»។
រដ្ឋអាជ្ញាបាននិយាយថា ក្រុមអ្នកស៊ើបអង្កេតបានសង្ស័យថា ប្រទេសកាតាមានឥទ្ធិពលលើការសម្រេចចិត្តផ្នែកសេដ្ឋកិច្ច និងនយោបាយរបស់សភាអឺរ៉ុបអស់រយៈពេលជាច្រើនខែ ជាពិសេសតាមរយៈការកំណត់គោលដៅជំនួយ។
ពាក់ព័ន្ធនឹងករណីនេះ អ្នកនាំពាក្យរដ្ឋាភិបាលកាតា បានប្រាប់ទីភ្នាក់ងារសារព័ត៌មាន AFP ថា៖ «យើងមិនបានដឹងព័ត៌មានអំពីការស៊ើបអង្កេតនោះទេ។ ការអះអាងណាមួយអំពីការប្រព្រឹត្តខុសដោយរដ្ឋកាតា គឺត្រូវបានរាយការណ៍ខុសយ៉ាងធ្ងន់ធ្ងរ»។
លោកបានបន្ថែមថា ប្រទេសនេះ [កាតា] «ធ្វើប្រតិបត្តិការដោយអនុលោមតាមច្បាប់ និងបទប្បញ្ញត្តិអន្តរជាតិ»៕