យោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១៤ ខែធ្នូ ឆ្នាំ២០២២ បានឱ្យដឹងថា សហរដ្ឋអាមេរិកបានចោទប្រកាន់ជនជាតិរុស្សី ចំនួន៥នាក់ និងជនជាតិអាមេរិក ២នាក់ ពីបទ សមគំនិតពាក់ព័ន្ធនឹងការផ្តល់ឱ្យរដ្ឋាភិបាលរុស្ស៊ីនូវបច្ចេកវិទ្យាការពារប្រទេស អាវុធដែលត្រូវបានហាមឃាត់ និងពាក់ព័ន្ធនឹងការលាងលុយកខ្វក់។
សេចក្តីថ្លែងការណ៍របស់ក្រសួងយុត្តិធម៌អាមេរិក បាននិយាយថា ក្នុងចំណោមបុគ្គលដែលត្រូវបានចោទប្រកាន់ រួមមាន មន្ត្រីសេវាសន្តិសុខសហព័ន្ធរុស្ស៊ី (FSB) ម្នាក់ផងដែរ។
សេចក្តីថ្លែងការណ៍នោះបានបន្ថែមទៀតថា ជនជាប់ចោទបានគប់គិតគ្នា ដើម្បីទទួលបានបច្ចេកវិទ្យាការពារប្រទេសពីបណ្តាក្រុមហ៊ុនអាមេរិក សម្រាប់វិស័យការពារជាតិរបស់រុស្ស៊ី និងរត់ពន្ធគ្រាប់កាំភ្លើងសម្រាប់បាញ់សីប (sniper) ដោយបំពានលើទណ្ឌកម្មថ្មីរបស់សហរដ្ឋអាមេរិកដែលបានដាក់កាលពីដើមឆ្នាំនេះ។
ក្នុងចំណោមអ្នកដែលត្រូវបានចោទប្រកាន់មានឈ្មោះ យ៉េហ្គេនី ហ្រ្គីនីន (Yevgeniy Grinin) អាយុ៤៤ឆ្នាំ, អាឡេកស៊ី អ៊ីប៉ូលីតូ (Aleksey Ippolitov) អាយុ៥៧ឆ្នាំ និង វ៉េតឡាណា វ៉ូតសូវ៉ា (Svetlana Skvortsova) អាយុ៤១ឆ្នាំ អ្នកទាំងអស់នេះនៅទីក្រុងម៉ូស្គូ, បូរីស លីវស៊ីត (Boris Livshits) អាយុ៥២ឆ្នាំ និង វ៉ាឌីម កូណូឆេណុក (Vadim Konoshchenok) អាយុ៤៨ឆ្នាំ អ្នកទាំងពីររស់នៅផ្លូវ Petersburg និងជនជាតិអាមេរិកឈ្មោះ អាឡិកហ្ស៊ី ប្រេមែន (Alexey Brayman) អាយុ៣៥ឆ្នាំ មកពីរដ្ឋ New Hampshire និង វ៉ាឌីម យឺម៉ូលេនកូ (Vadim Yermolenko) អាយុ៤១ឆ្នាំ មកពីរដ្ឋ New Jersey។
ជនជាប់ចោទទាំងនេះត្រូវបានចោទប្រកាន់ថាបានទិញ និងនាំចេញដោយខុសច្បាប់នូវសមាសធាតុអេឡិចត្រូនិចដែលត្រូវបានហាមប្រាម ដែលសមាសធាតុមួយចំនួនអាចប្រើក្នុងការអភិវឌ្ឍអាវុធនុយក្លេអ៊ែរ និងផលិតអាវុធលឿនជាងសំឡេង និងកម្មវិធីយោធាផ្សេងទៀត។
ក្រសួងយុត្តិធម៌អាមេរិក បានលើកឡើងថា ជនជាប់ចោទឈ្មោះ Konoshchenok បានដឹកជញ្ជូន ឬរត់ពន្ធវត្ថុធាតុដើមរបស់សហរដ្ឋអាមេរិក ពីប្រទេសអេស្តូនី (Estonia) ទៅកាន់ប្រទេសរុស្ស៊ី រួមទាំងបច្ចេកវិទ្យាការពារប្រទេស និងសម្ភារដែលត្រូវបានហាមប្រាមមិនឱ្យនាំចេញផ្សេងទៀត។
ក្រសួងយុត្តិធម៌អាមេរិកបានបន្ថែមថា ជនជាប់ចោទមានទំនាក់ទំនងជាមួយក្រុមហ៊ុន Serniya Engineering និង Sertal LLC ដែលជាក្រុមហ៊ុនមានមូលដ្ឋាននៅទីក្រុងមូស្គូ ដែលប្រតិបត្តិការក្រោមការដឹកនាំរបស់សេវាស៊ើបការណ៍សម្ងាត់របស់រុស្ស៊ី។
កាលពីថ្ងៃអង្គារ ក្រសួងពាណិជ្ជកម្មអាមេរិកបានលើកឡើងថា ទីក្រុងវ៉ាស៊ីនតោន បានផ្អាកជាបណ្តោះអាសន្ននូវសិទ្ធិនាំចេញទំនិញរបស់មនុស្ស៣នាក់ និងក្រុមហ៊ុនចំនួន២ បន្ទាប់ពីនាំចេញ «ទំនិញហាមឃាត់» ដោយគ្មានការអនុញ្ញាតទៅកាន់ប្រទេសរុស្ស៊ី។
សហរដ្ឋអាមេរិក និងសម្ពន្ធមិត្ត បានដាក់ទណ្ឌកម្មជាបន្តបន្ទាប់លើទីក្រុងមូស្គូ ចាប់តាំងពីរុស្ស៊ីបានឈ្លានពានអ៊ុយក្រែននៅថ្ងៃទី២៤ ខែកុម្ភៈ ឆ្នាំ២០២២៕
