នៅសល់ពេលតែ២ថ្ងៃទៀតទេ ដល់ពេលដែលភាគីពាក់ព័ន្ធនានានៅក្នុងសំណុំរឿងព្រហ្មទណ្ឌ «រួមគំនិតក្បត់ជាតិ ហើយចង់ផ្ដួលរំលំរដ្ឋាភិបាល» ត្រូវឡើងការពារពីការដាក់បន្ទុក និងដោះបន្ទុករបស់ខ្លួន ខណៈមេធាវីការពារសិទ្ធិឱ្យលោក កឹម សុខា អះអាងថា ខ្លួនកំពុងពិចារណាក្នុងការដាក់និក្ខេបបទ ឬសារណា នេះទៅតាមការកំណត់របស់តុលាការ។
លោក ផែង ហេង សហមេធាវីម្នាក់ក្នុងចំណោមមេធាវី៣រូបផ្សេងទៀតដែលការពារសិទ្ធិឱ្យលោក កឹម សុខា បញ្ជាក់នៅថ្ងៃចន្ទនេះថា ចំពោះនិក្ខេបបទ ឬសារណានេះ មេធាវីទាំង៤រូបនឹងត្រូវដាក់រួមគ្នា ប៉ុន្តែការសម្រេចចិត្តដាក់ឬមិនដាក់បែបណានោះ ត្រូវពិភាក្សាគ្នាជាមុនសិន។
លោកបន្តថា៖ «គេ [តុលាការ] ប្រាប់ឱ្យដាក់ថ្ងៃហ្នឹងហើយ។ អ៊ីចឹងចាំមើលថ្ងៃរសៀលបន្តិចមើល៍! មានខាងណាដាក់ខ្លះ អត់ទាន់ដឹងដែរ! យើងមេធាវីជនត្រូវចោទ ក៏នឹងត្រូវដាក់ដែរ ប៉ុន្តែយើងចាំមើលគេដាក់ម៉េចអីម៉េចសិន»។
បើទោះជាបែបណា លោក ផែន ហេង នៅតែមានសុទិដ្ឋិនិយមថា បើពិនិត្យទៅលើគ្រប់នីតិវិធីសម្រាប់សវនាការក្នុងពេលកន្លងទៅ សំណុំរឿងព្រហ្មទណ្ឌនេះនៅតែគ្មានលក្ខណៈសម្បត្តិគ្រប់គ្រាន់នៃអង្គហេតុ ក្នុងការចោទប្រកាន់ប្រឆាំងលោក កឹម សុខា ថាមានទោសនោះឡើយ។
កាលពីថ្ងៃទី១៩ ខែតុលា ឆ្នាំ២០២២ កន្លងទៅ សាលាដំបូងរាជធានីភ្នំពេញ បានប្រកាសបិទបញ្ចប់នីតិវិធីនៃការសួរដេញដោលគ្រប់អង្គហេតុ ក្នុងសំណុំរឿងលោក កឹម សុខា ហើយប្រធានក្រុមប្រឹក្សាជំនុំជម្រះ លោក កូយ សៅ បានកំណត់យកថ្ងៃទី២១ ខែធ្នូ ឆ្នាំ២០២២ ខាងមុខនេះ ជាថ្ងៃដែលគ្រប់ភាគីពាក់ព័ន្ធនៅក្នុងរឿងក្តីនេះ ត្រូវធ្វើសេចក្តីសន្និដ្ឋានចុងក្រោយ មុននឹងតុលាការឈានទៅសម្រេចចោទប្រកាន់ ឬទម្លាក់បទចោទនេះ។
វីអូឌី មិនអាចសុំការបញ្ជាក់បន្ថែមជុំវិញករណីនេះពីអ្នកនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល និងមេធាវីការពារសិទ្ធិឱ្យដើមបណ្ដឹងពីខាងរដ្ឋាភិបាល បានទេ នៅថ្ងៃនេះ។
ទោះជាយ៉ាងណា គេសង្កេតឃើញថា មុននឹងតុលាការឈានទៅបិទបញ្ចប់នីតិវិធីនៃការសួរដេញដោលលើអង្គសេចក្តី កាលពីជាង១ខែមុននោះ ខាងសហព្រះរាអាជ្ញារងដែលកាន់សំណុំរឿងនេះ ស្នើសុំតុលាការទុកពេល ៣ខែ ដើម្បីរៀបចំនិក្ខេបបទ ខណៈមេធាវីដើមចោទពីខាងរដ្ឋាភិបាល សុំពេល២ខែ ហើយមេធាវីការពារសិទ្ធិឱ្យលោក កឹម សុខា ស្នើសុំទុកពេល២សប្តាហ៍ ដើម្បីបញ្ចប់និក្ខេបបទនេះ។
នៅនាទីចុងក្រោយ ប្រធានក្រុមប្រឹក្សាជំនុំជម្រះ លោក កូយ សៅ សម្រេចទុកពេល២ខែ ដូចការទាមទារពីខាងមេធាវីការពារក្តីរបស់រដ្ឋាភិបាល គិតចាប់ពីថ្ងៃបិទបញ្ចប់នីតិវិធីនៃការសួរដេញដោលគ្រប់អង្គហេតុនេះ រហូតដល់ថ្ងៃធ្វើសេចក្តីសន្និដ្ឋាន។
លោក អំ សំអាត នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្ស លីកាដូ យល់ឃើញថា ជានីតិវិធី គឺគ្រប់ភាគីពាក់ព័ន្ធត្រូវតែប្រើប្រាស់ឱ្យអស់ពីលទ្ធភាព ក្នុងការការពារសិទ្ធិរបស់ខ្លួន ទាំងដោះបន្ទុក និងដាក់បន្ទុក។ លោកបន្តថា ក្នុងពេលមជ្ឈដ្ឋានទូទៅសង្កេតឃើញថា រឿងក្តីនេះជាសំណុំរឿងបែបនយោបាយ ហេតុនេះ វាពិតជាមានភាពស្មុគស្មាញក្នុងការទស្សន៍ទាយពីសាលក្រមដែលនឹងចេញក្នុងពេលខាងមុខនេះ នឹងទៅជាបែបណាណាស់។
លោកបន្តថា៖ «បើយើងនិយាយទៅ តាំងពីដើមមក ដែលយើងមើលឃើញថា ហេតុផលដែលករណីនេះ បើតាមអង្គហេតុ អង្គច្បាប់ ដូចមេធាវីគាត់ធ្វើការសន្និដ្ឋាន និងលោក កឹម សុខា គាត់ថាអ៊ីចឹង! ប៉ុន្តែចំពោះករណីនេះ យើងដឹងហើយថា មតិជាតិ និងអន្តរជាតិ គេចាត់ទុកថា វាជារឿងនយោបាយច្រើនជាងការអនុវត្តច្បាប់។ យើងក៏មិនហ៊ានមើលឃើញថាតើវាយ៉ាងម៉េចនៅពេលដែលសាលក្រមនេះចេញ»។
សាលាដំបូងរាជធានីភ្នំពេញ ចាប់ផ្តើមបើកសវនាការក្នុងសំណុំរឿងលោក កឹម សុខា ក្រោមការចោទប្រកាន់ពីបទ «សន្ទិដ្ឋិភាព ត្រូវរ៉ូវដោយសម្ងាត់ជាមួយរដ្ឋបរទេស ឬភ្នាក់ងារបរទេស» ចង់ផ្តួលរំលំរដ្ឋាភិបាល កាលពីដើមខែមករា ឆ្នាំ២០២០។ តុលាការដំណើរការក្ដីនេះបានប្រមាណ១ខែ ក៏បង្ខំចិត្តផ្អាកទៅវិញ មូលហេតុដោយសារមានវិបត្តិជំងឺកូវីដ-១៩។ ក្រោយពីផ្អាកជិត២ឆ្នាំ ដោយសារជំងឺកូវីដ-១៩ សវនាការនេះក៏ចាប់ផ្តើមបន្តជំនុំជម្រះឡើងវិញ នៅថ្ងៃទី២២ ខែមករា ឆ្នាំ២០២២។
គិតមកដល់ថ្ងៃដែលតុលាការប្រកាសបិទបញ្ចប់នីតិវិធីនៃការសួរដេញដោលគ្រប់អង្គហេតុ នៅថ្ងៃទី១៩ ខែតុលា គឺសវនាការនេះបានបន្តអូសបន្លាយលើកទី ៦៣ មកហើយ។ តុលាការបានជម្រាបអង្គសវនាការថា សាក្សីចំនួន ២៧នាក់ ត្រូវបានកោះហៅឱ្យមកផ្តល់សក្ខីកម្ម ប៉ុន្តែមានតែសាក្សី៨នាក់ទេដែលចូលបំភ្លឺទៅតាមការកោះហៅរបស់តុលាការ។ គិតចាប់ពីថ្ងៃចាប់ខ្លួន ទាំងពាក់កណ្តាលអធ្រាត្រ កាលពីដើមខែកញ្ញា ឆ្នាំ២០១៧ អ្នកនយោបាយចាស់វស្សារូបនេះត្រូវបានតុលាការដកសិទ្ធិធ្វើនយោបាយប្រមាណ៥ឆ្នាំមកហើយ៕
