ក្រសួងការពារជាតិរុស្ស៊ី បានឱ្យដឹងនៅថ្ងៃចន្ទនេះថា រុស្ស៊ី និងចិន នឹងធ្វើសមយុទ្ធយោធាជើងទឹករួមគ្នានៅក្នុងសប្តាហ៍នេះ ដោយរាប់ចាប់ពីថ្ងៃទី២១ ដល់ថ្ងៃទី២៧ ខែធ្នូ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters នៅថ្ងៃទី១៩ ខែធ្នូ ឆ្នាំ២០២២។
ក្រសួងការពារជាតិរុស្ស៊ី បន្តថា សមយុទ្ធកងទ័ពជើងទឹករួមគ្នាដែលតែងតែធ្វើឡើងជារៀងរាល់ឆ្នាំ គិតចាប់តាំងពីឆ្នាំ២០១២មក និងរួមទាំងមានការបាញ់កាំជ្រួច និងកាំភ្លើងធំ នៅសមុទ្រចិនខាងកើត។
រុស្ស៊ីបន្តថា នាវាយោធារបស់ខ្លួនចំនួន៤ នឹងធ្វើដំណើរចេញពីកំពង់ផែ Far Eastern នៃទីក្រុង Vladivostok ដើម្បីចូលរួមក្នុងសមយុទ្ធនេះ ខណៈភាគីចិននឹងមាននាវាចំនួន៦ រួមជាមួយនឹងយន្តហោះ និងឧទ្ធម្ភាគចក្រពីភាគីទាំងពីរផងដែរ។
ប្រភពដដែលបន្ថែមថា៖ «គោលបំណងសំខាន់នៃសមយុទ្ធនេះ គឺដើម្បីពង្រឹងកិច្ចសហប្រតិបត្តិការខាងកងទ័ពជើងទឹក រវាងរុស្ស៊ី និងចិន ក៏ដូចជាការរក្សាសន្តិភាព និងស្ថិរភាពនៅក្នុងតំបន់អាស៊ីប៉ាស៊ីហ្វិក»។
គិតចាប់តាំងពីរុស្ស៊ីបានឈ្លានពានលើអ៊ុយក្រែនកាលពីខែកុម្ភៈមក ប្រទេសមួយនេះបានព្យាយាមបង្កើនទំនាក់ទំនងទាំងផ្នែកនយោបាយ សន្តិសុខ និងសេដ្ឋកិច្ចរបស់ខ្លួនជាមួយនឹងប្រទេសចិន ខណៈខ្លួនមើលឃើញថា ប្រធានាធិបតីចិន លោក ស៊ី ជីនពីង គឺជាសម្ពន្ធមិត្តដ៏សំខាន់មួយក្នុងការប្រឆាំងនឹងលោកខាងលិច។
ទាក់ទិននឹងករណីនេះ ក្រសួងការបរទេសអាមេរិក កាលពីពេលកន្លងទៅ ក៏ធ្លាប់បានលើកឡើងពីការព្រួយបារម្ភអំពីការពង្រឹងទំនាក់ទំនងកាន់តែស៊ីជម្រៅរវាងចិន និងរុស្ស៊ីផងដែរ ដោយថា ការពង្រឹងទំនាក់ទំនងកាន់តែស៊ីជម្រៅរវាងប្រទេសទាំង២នេះ គឺមិនមែនធ្វើឡើងតែក្នុងរយៈពេលមួយថ្ងៃ មួយសប្តាហ៍ ឬមួយខែឡើយ ប៉ុន្តែអាចនឹងធ្វើឡើងក្នុងរយៈពេលជាច្រើនឆ្នាំ។
ជាមួយគ្នានេះ ប្រធានាធិបតីសហរដ្ឋអាមេរិក លោក ចូ បៃឌិន កាលពីពេលកន្លងទៅ ក៏ធ្លាប់បានព្រមានលោកប្រធានាធិបតី ស៊ី ជីនពីង អំពីផលវិបាកដែលចិនអាចនឹងទទួលបាន ប្រសិនបើប្រទេសមួយនេះផ្ដល់ការគាំទ្រណាមួយ ដើម្បីជួយឱ្យរុស្ស៊ីរួចផុតពីផលប៉ះពាល់នៃទណ្ឌកម្មរបស់លោកខាងលិច ឬផ្តល់ជំនួយផ្នែកយោធាជាដើមនោះ។
ទោះជាយ៉ាងណា ប្រទេសចិនបានបដិសេធម្ដងហើយម្ដងទៀតនូវផែនការបែបនេះ ក្នុងនោះខ្លួនក៏ធ្លាប់ច្រានចោលការអះអាងរបស់មន្ត្រីអាមេរិក ដែលថារុស្ស៊ីបានព្យាយាមស្វះស្វែងរកជំនួយយោធាពីខ្លួននៅអ៊ុយក្រែនផងដែរ និងបានចោទអាមេរិកថាបានផ្សព្វផ្សាយព័ត៌មានមិនពិត ដែលធ្វើឱ្យស្ថានការណ៍ជម្លោះកាន់តែធ្ងន់ធ្ងរបន្ថែមទៀត៕