ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) បាននិយាយថា ការការពារព្រំដែនអ៊ុយក្រែន គឺជា «អាទិភាពជានិច្ច» ហើយប្រទេសរបស់លោកត្រៀមខ្លួនរួចជាស្រេចសម្រាប់អ្វីដែលនឹងអាចកើតមានជាមួយរុស្ស៊ី និងបេឡារុស ខណៈលោក ពូទីន នឹងទៅបំពេញទស្សនកិច្ចនៅប្រទេសបេឡារុស។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី១៩ ខែធ្នូ ឆ្នាំ២០២២ នេះ។
ថ្លែងនៅក្នុងសុន្ទរកថាតាមវីដេអូ លោក Zelenskiy បានអំពាវនាវឱ្យលោកខាងលិចផ្តល់ឱ្យទីក្រុងកៀវ (Kyiv) នូវប្រព័ន្ធការពារដែនអាកាសទំនើប ដែលជា «ជំហានមួយដ៏មានប្រសិទ្ធភាពបំផុត» ដើម្បីបញ្ឈប់ការឈ្លានពានរបស់រុស្ស៊ី។
លោក Zelenskiy បាននិយាយថា៖ «ការការពារព្រំដែនរបស់យើង ទាំងជាមួយរុស្ស៊ី និងបេឡារុស គឺជាអាទិភាពជានិច្ចរបស់យើង។ យើងកំពុងត្រៀមខ្លួនការពារតាមដែលអាចធ្វើទៅបាន»។
លោក Zelenskiy បាននិយាយនៅមុនថ្ងៃនៃដំណើរទស្សនកិច្ចទៅកាន់ប្រទេសបេឡារុសរបស់ប្រធានាធិបតីរុស្ស៊ី លោក វ្លាឌីមៀរ ពូទីន (Vladimir Putin) ចំពេលមានការពិភាក្សាអំពីការវាយលុកថ្មីរបស់រុស្ស៊ី និងបានលើកឡើងថា ការវាយលុកថ្មីលើអ៊ុយក្រែនអាចកើតចេញពីប្រទេសបេឡារុស។
មន្ត្រីនៅទីក្រុងកៀវ (Kyiv) បានក្រើនរម្លឹកប៉ុន្មានខែមកនេះថា បេឡារុសអាចចូលរួមជាមួយកងកម្លាំងរុស្ស៊ី និងធ្វើជាកន្លែងចាប់ផ្តើមសម្រាប់ការវាយប្រហារថ្មី ដើម្បីបង្កើតជាខ្សែបន្ទាត់រណសិរ្ស ទី២ នៅក្នុងសង្រ្គាម។
លោក Zelenskiy បន្ថែមថា៖ «អ្វីដែលប្រធានាធិបតីបេឡារុស លោក អេឡិចហ្សានដឺ លូកាហ្សិនកូ [Alexander Lukashenko] ត្រូវបានប្រទេសរុស្ស៊ីបញ្ចុះបញ្ចូលឱ្យធ្វើសម្រាប់ខ្លួន នឹងមិនជួយពួកគេ [ប្រទេសបេឡារុស] ឡើយ នៅក្នុងសង្គ្រាមប្រឆាំងនឹងប្រទេសអ៊ុយក្រែន និងប្រជាជនអ៊ុយក្រែន»។
គួរបញ្ជាក់ថា ប្រទេសបេឡារុស គឺជាសម្ពន្ធមិត្តដ៏ជិតស្និទ្ធបំផុតរបស់រុស្ស៊ី ហើយលោក Lukashenko បានអនុញ្ញាតឱ្យកងទ័ពរុស្ស៊ីប្រើប្រាស់ទឹកដីបេឡារុស បើកការឈ្លានពានទៅលើអ៊ុយក្រែន នៅថ្ងៃទី២៤ ខែកុម្ភៈ។ ទោះយ៉ាងណា លោកបាននិយាយម្តងហើយម្តងទៀតថា លោកមិនមានបំណងបញ្ជូនកងទ័ពបេឡារុសចូលរួមក្នុងសង្គ្រាមនៅអ៊ុយក្រែនឡើយ៕
